¿Iman familiapi Diosta yupaychay?

Jehová Diosmi ñawpaq tiempomantapacha munarqan llapa familiakuna tiempota t’aqaspa kuska kanankuta, chhaynapi Dioswanpas paykunapurapas hukllachasqa kanankupaq (Deuteronomio 6:6, 7). Chaymi kunanpas Jehová Diospa testigonkunaqa sapa semana tiempota t’aqayku familiaykuwan Diosta yupaychanaykupaq. Chaypaqqa maypichus estudianapaq allin kanman chayta qhawarispan familiaykuq necesitasqanman hina huk temata t’aqwiriyku. Sapallanku tiyaqkunapas tiempotan t’aqanku huk temata akllaspa Diosmanta yachanankupaq.

Diosmanmi asuykachiwanku. Biblian nin: “Diosman asuykuychis, hinan payqa asuykamusunkichis”, nispa (Santiago 4:8). Jehová Dios imayna kasqanta, imakunachus ruwasqantawan Bibliapi yachaspan astawan payta reqsinchis. Familiaykiwan estudiota qallarinaykipaqqa Bibliata kunkawan leespan qallariwaqchis. Chaypaqqa Diospaq kausasunchis nisqa folletopi programawanmi yanapachikuwaq. Sapankankun Bibliamanta pisillata leespa imatachus entiendesqankumanta willankuman.

Familiantintan hukllachawanku. Bibliata kuska estudiaymi casado warmi-qharita hukllachan, hinallataq tayta-mamakunata wawankuwan. Chay estudioqa kusikunapaqmi kanan, chhaynapin llapankupas chay p’unchayta suyakunqaku. Yaqapaschá taytakuna wawankuq wiñasqanman hina Qhawaq, ¡Rijch’ariy! revistakunapi otaq Internetpi jw.org nisqapi lloqsimuq temakunamanta yachachiyta munankuman. Otaq escuelapi wawanku sasachakuykunapi tarikusqankumanta rimariyta munankuman. JW Broadcasting (tv.jw.org) nisqatapas qhawankumanmi, hinaspa chaypi rikusqankumanta parlarinkuman. Chaymantapas huñunakuypaq takikunatan takinkuman, qhepamantaq imallatapas mikhunkuman.

Familianchiswan Diosta yupaychanapaq sapa semana tiempo t’aqasqanchisqa yanapawanchismi Diospa Siminwan kusikunapaq. Hinaspapas Diosmi chay ruwasqanchismanta askhanpi kutichipuwasun (Salmo 1:1-3).

• ¿Imaraykun tiempota t’aqayku familiaykuwan Diosta yupaychanaykupaq?

• ¿Imatan taytakuna ruwankuman chay estudiopi llapanku kusisqa kanankupaq?