¿Imaynatan Diosman asuykusunman?

1. ¿Llapa runaq mañakusqantachu Dios uyarin?

Diosmi lliw nacionkunapi runakunaman huk sumaq invitacionta mast’arin: mañakuspa payman asuykunankupaq (Salmo 65:2). Ichaqa manan llapa runaq mañakusqantachu uyarin. Biblian willan esposanta millayta trataq runakunaq mañakusqan ‘hark’asqa’ kananta (1 Pedro 3:7). Israelitakunatapas manan uyarirqanchu sapa kutilla mana allinkunata ruwasqankurayku. Chaywanpas, payqa uyarinmi hatun huchakunapi urmasqankumanta kutirikuq runakunata.​—Leey Isaías 1:15; 55:7.

Qhaway ¿Llapa runakunaq mañakusqantachu Dios aceptan? nisqa videota

2. ¿Imaynatan mañakunanchis?

Mañakuspanchisqa Jehová Diostan yupaychanchis, chaymi payllamanta mañakunanchis (Mateo 4:10; 6:9). Hinaspapas Jesuspa sutinpin mañakunanchis, huchanchiskunamanta pay wañusqanrayku (Juan 14:6). Jehová Diosqa manan munanchu umanchispi hap’isqanchis otaq qelqakunapi kaq rezokunawan mañakunanchista, payqa munan sonqomanta mañakunanchistan.​—Leey Mateo 6:7; Filipenses 4:6, 7.

Kamaqninchisqa sonqollanchispi mañakusqanchistapas uyarinmi (1 Samuel 1:12, 13). Payqa munanmi ima ratopas mañakunanchista; manaraq imatapas ruwayta qallarishaspa, mikhunanchis horata, tukuy ruwasqanchiskuna qhepata, otaq sasachakuykunapi tarikuqtinchis.​—Leey Salmo 55:22; Mateo 15:36.

3. ¿Imaynapin cristianokunaq huñunakuynin yanapawanchis?

Diospi mana iñiq runakuna ukhupin tiyanchis, paykunaqa burlakunku imaraqmi kay Hallp’apaq Diospa promesanmantapas. Chaykunan pisipachiwasunman Diosman asuykunapaq kallpachakushaqtinchis (2 Timoteo 3:1, 4; 2 Pedro 3:3, 13). Chaymi huk cristianokunawan huñunakunanchis kallpachasqa kanapaq. Ichaqa paykunapas necesitankun kallpachananchista.​—Leey Hebreos 10:24, 25.

Diosta munakuq runakunawan huñunakuspaqa astawanmi payman asuykusun. Jehová Diospa testigonkunaq huñunakuyninpi allin iñiyniyoq runakunata reqsisqaykipas allinniykipaqmi kanqa.​—Leey Romanos 1:11, 12.

4. ¿Imaynatan Diosman asuykuwaq?

Diosman asuykunaykipaqqa Bibliamanta yachasqaykipin yuyaymananayki. Yuyaykuy paypa ruwasqanpi, yuyaychayninpi, prometewasqanchispipas. Mañakuspa yuyaymanaspa iman aswan allinta entiendesun Diospa hatun munakuyninta yachaynintapas.​—Leey Josué 1:8; Salmo 1:1-3.

Diospa qayllallanpi kanapaqqa paypin hap’ipakunanchis iñinanchispas. Iñiyninchisqa huk planta hinan; sapa kutillanmi unuta hich’aykuna wiñananpaq. Iñiyninchis wiñananpaqpas sapa kutillanmi yuyaymanananchis imarayku Bibliaq yachachisqanpi creesqanchista.​—Leey Mateo 4:4; Hebreos 11:1, 6.

5. ¿Imapin yanapawanchis Diosman asuykusqanchis?

Jehová Diosqa interesakunmi munakuqnin runakunapi. Payqa wiñay kawsay suyakuyninchista otaq iñiyninchista pisiyachiq trampakunamantan hark’aykuwasunman (Salmo 91:1, 2, 7-10). Willawanchismi imakunan onqoykunaman, sasachakuykunaman tanqaykuwasunman chayta, yachachiwanchismi allinta kawsanapaq ima ruwananchistapas.​—Leey Salmo 73:27, 28; Santiago 4:4, 8.