11 YACHACHIKUY
¿Pikunan Jesusmanta qelqarqanku?
Qhawariy kay dibujopi runakunata. Paykunaqa kanku Mateo, Marcos, Lucas, Juan, Pedro, Santiago, Judas, Pablo ima. Chay runakunaqa Jesuspa tiemponpin kawsarqanku, Jesuspa kawsayninmantataqmi qelqarqanku. Chaykunaqa Bibliapin kashan. ¿Munawaqchu paykunamanta astawan yachayta?...
¿Imatan yachanki kay runakunamanta?
Paykunamantaqa Mateo, Juan, Pedro ima Jesuswan predicarqanku. Paykunaqa apostolninkunan karqanku. Kay dibujopi, ¿mayqenkunan paykuna kanku?... Mateowan Juanwanqa sapankankun Jesuspa kawsayninmanta huk librota qelqarqanku. Juanqa qelqallarqantaqmi Apocalipsis librota, 1 Juan, 2 Juan, 3 Juan nisqa cartakunatapas. Apóstol Pedrotaqmi qelqarqan 1 Pedro, 2 Pedro nisqa cartakunata. Iskay kaq carta qelqasqanpin Pedroqa qelqarqan huk kutipi Jehová Dios hanaq pachamanta Jesusta kay nimusqanta: “Kaymi munakusqay Churiy, paymi kusichiwan”, nispa.
Jesuspa kawsayninmanta huk qelqaqkunapas dibujopin kashanku. Hukninmi Marcos. Payqa yaqapaschá rikurqan Jesusta hap’iqtinku imakuna sucedesqanta. Hukninkaqqa Lucasmi. Payqa medicon karqan, yaqapaschá payqa Jesuspa wañupusqan qhepamanña cristiano kapurqan.
Jesuspa sullk’a wawqenkunapas paymantan qelqarqanku, paykunapas dibujopin kashanku. ¿Yachankichu sutinkuta?... Paykunaqa kanku Santiagowan Judaswanmi. Qallariypiqa manan creerqankuchu Jesuspa yachachisqankunapi, paykunamantaqa Jesusqa locoyapusharqanmi. Qhepamanmi ichaqa Jesuspa qatikuqnin kapurqanku.
Pablopas qelqaqmi karqan, paypas dibujopin kashan. Manaraq cristiano kashaqtinmi sutinqa Saulo karqan. Payqa cristianokunatan millayta trataq. Ichaqa Pabloqa cristianomanmi tukupurqan, ¿munawaqchu chaymanta yachayta?... Huk p’unchaymi Pablo chakipi viajasharqan, hinaspan hanaq pachamanta Jesuspa rimamusqanta qonqaylla uyarirqan. Nimurqanmi: “¿Imaraykun cheqnikunki ñoqapi iñiqkunata?”, nispa. Chay qhepamanmi Pabloqa cambiapurqan, hinaspan cristiano kapurqan. Pabloqa 14 librokunatan Bibliapi qelqarqan, Romanos libromanta Hebreos librokama.
¿Sapa p’unchaychu Bibliata leeshanki?... Bibliapiqa askha willakuykunan kashan Jesusmanta. ¿Munawaqchu Jesusmanta astawan yachayta?...