¿Ima qolqewanmi Diospa gobiernonta yanapanchis?

1, 2. a) ¿Imatan Russell iñiqmasinchis kutichirqan huk religioso runa payta tapuqtin? b) ¿Imakunamantan kay capitulopi yachasun?

HUK kutinmi Iglesia Reformada nisqamanta religioso runa Charles Russell iñiqmasinchista tapurqan: “¿Ima qolqewanmi Biblia estudiaqkuna tukuy imatapas ruwankichis?”, nispa.

Russell iñiqmasinchismi nirqan: “Ñoqaykuqa manan qolqetachu mañapakuyku”, nispa.

Chay religioso runataq nirqan: “Chhaynaqa, ¿maymantataq qolqeta horqonkichis?”, nispa.

Russell iñiqmasinchismi kutichirqan: “Cheqaqllata willaqtiyqa manachá creewankimanchu. Huñunakuyniykuman runakuna hamuqtinkuqa, manan necesariochu sapankamanta qolqeta mañayqa. Paykunaqa reparankun gastokuna kasqanta, hinaspan ninku: ‘Huñunakuna wasiyoq kayqa qolqepaqmi [...]. ¿Imaynatan yanapakuyman gastokuna pagakunanpaq?’”, nispa.

Chay religioso runaqa iskayaspan Russell iñiqmasinchista qhawarqan.

Chaymi Russell iñiqmasinchis nirqan: “Chaytaqa cheqaqllatan nishayki. Runakunaqa kaytan tapuwanku: ‘¿Imaynatan yanapakuyman gastokuna pagakunanpaq?’, nispa. Pipas qolqeyoq kaspaqa, chay qolqetan Señorpaq utilizayta munan. Ichaqa sichus mana qolqen kanmanchu chayri, ¿imaraykun obligasunman qolqeta qonanpaq?”, nispa.a

² Russell iñiqmasinchisqa manan yanqatachu nisharqan. Diosta serviqkunaqa ñawpaqmantaraqmi donacionkunata churaspa yanapakurqanku, chhaynapi cheqaq Diosllata yupaychanankupaq. ¿Imaynatan ñawpaq tiempopi chayta ruwarqanku? ¿Imaynatan kay tiemponchispi chayta ruwakushan? Chaykunatan kay capitulopi yachasun. Chaymantapas parrafokunata leeshaspan kayta tapukunanchis: “¿Imaynatan rikuchiyman Diospa gobiernonta yanapashasqayta?”, nispa.

“Llapa qoykukuq sonqoyoq runa, ñoqa Señor Diosman ofrendata apamuchun”

3, 4. a) ¿Imata ruwanankupin Jehová Dios siervonkunapi confian? b) ¿Imaynatan israelitakuna yanapakurqanku Dios yupaychana karpata ruwakunanpaq?

³ Jehová Diosqa confianmi siervonkunapi. Payqa yachanmi donacionkunata qonankupaq mañaqtin siervonkuna tukuy sonqomanta qonankuta. Yachasun ñawpaq tiempopi israelitakuna iskay kutipi chayta ruwasqankumanta.

⁴ Egipto llaqtamanta horqosqan qhepamanmi, Jehová Dios israelitakunata kamachirqan yupaychana karpata ruwanankupaq. Ichaqa chayta ruwanankupaqqa imaymanatan necesitarqanku. Hinan Jehová Diosqa Moisesta nirqan llaqtaman kayta ninanpaq: “Llapa qoykukuq sonqoyoq runa, ñoqa Señor Diosman ofrendata apamuchun”, nispa (Éx. 35:5). Egipto nacionpi israelitakunaqa ñak’arichisqa kamachikunallan karqanku; chhaynaqa, ¿imatan ruwarqanku Moisés chayta niqtin? (Éx. 1:14.) Paykunaqa tukuy sonqomantan yanapakurqanku, hinan qoritapas, qolqetapas, huk valorniyoq kaqkunatapas apamurqanku, chaykunataqa Egipto nacionpi patronninkumantachá chaskirqanku (Éx. 12:35, 36). Israelitakunaqa puchunan kamaraqmi apamurqanku, chaymi paykunata nirqanku: “Amaña pi qharipas warmipas karpapaq ofrendata apamuchunkuñachu”, nispa (Éx. 36:4-7).

5. ¿Imatan israelitakuna ruwarqanku ofrendankuta qonankupaq David niqtin?

⁵ Yaqa 475 watakuna qhepamanmi, Davidpas kaqninkunawan yanapakurqan templota hatarichinankupaq, chay temploqa manan Diosta yupaychana karpa hinachu karqan maymanpas apanallapaq. Davidqa munarqanmi llaqtamasin israelitakunapas yanapakunankuta, chaymi tapurqan: “¿Mayqenniykichistaq mana mich’akuspa tukuy sonqo Señor Diospaq qoyta munankichis?”, nispa. Hinan israelitakunaqa “tukuy sonqo ofrendankuta aparqanku” (1 Crón. 29:3-9). Davidqa yacharqanmi tukuy imapas Jehová Diosmanta hamusqanta, chaymi mañakuspa nirqan: “Tukuymi qanpa, qanmanta chaskisqallaykutan qoykiku”, nispa (1 Crón. 29:14).

6. ¿Imakunapaqmi qolqeta necesitakun? ¿Ima tapuykunan kashan?

⁶ Moisespas Davidpas manan obligarqankuraqchu Diosta serviqkunata donacionkunata churanankupaq, aswanpas paykunaqa tukuy sonqomantan qorqanku. ¿Imatan nisunman kay tiemponchismanta? Ñoqanchisqa yachanchismi Diospa gobiernon kay pachapi huk hatun llank’ayta aparishasqanta, chayta ruwakunanpaq qolqeta necesitakusqantapas. Qolqeqa imaymanapaqmi necesitakun: Bibliakunata qelqakunata ima ruwanapaq, huñunakuna wasikunata hinallataq sucursal edificiokunata allichanapaq hatarichinapaq ima otaq imapas kaqtin iñiqmasinchiskunata yanapanapaqpas. Chaymi kay tapuykuna kashan: ¿Maymantan necesitakusqan qolqeta horqokun? ¿Obligankuchu rey Jesuspa qatikuqninkunata qolqeta qonankupaq?

“Manan hayk’aqpas qolqetaqa mañapakusaqkuchu”

7, 8. ¿Imaraykun Jehová Diospa testigonkuna mana mañakunkuchu qolqeta runakunamanta?

⁷ Russell iñiqmasinchispas yanapaqninkunapas manan munarqankuchu “cristianon kayku” niq religionkuna hina qolqe mañapakuyta. Iskay kaq kuti lloqsimusqanpin Qhawaq revistapi lloqsimurqan “¿munawaqchu chaskiyta Qhawaq revistata?” nisqa willakuy, chaypin Russell iñiqmasinchis nirqan: “Ñoqaykupaqqa JEHOVÁ Diospa munayninpin Qhawaq revistaqa lloqsimushan, paypa yanapayninwan ruwashallasaqku chayqa, manan hayk’aqpas qolqetaqa mañapakusaqkuchu. Diosmi nin: ‘Ñoqaqmi qolqepas, ñoqaqmi qoripas’, nispa, chhaynaqa necesitasqayku qolqeta pay mana qowallaqtinkuñan kay qelqataqa mana ruwasaqkuchu”, nispa (Ageo 2:7-9). Ñan 130 wataña pasarqon, chaywanpas Qhawaq revistata hinallataq chay revistata ruwaqkunapas ruwayninkutan allinta hunt’ashanku.

⁸ Diosta serviqkunaqa manan qolqeta mañapakuspachu kanku, huñunakuyninkupipas manan runakunataqa obligankuchu qolqeta qonankupaq nitaqmi cartakunata apachinkuchu donacionkunata mañakuspa. Chaymantapas paykunaqa manan ruwankuchu bingo rifa otaq hukkunatapas qolqeta huñunankupaq. Aswanpas paykunaqa ñawpaq watakunapi Qhawaq revistaq nisqantan kasukunku, nirqanmi: “Huk iglesiakuna hina Señorninchispa sutinpi qolqeta mañakuytaqa manapunin allinpaqchu qhawariyku [...]. Wakinqa runakunata engañasparaqmi Señorninchispa sutinpi qolqeta huñunku, ñoqaykuqa sinchi mana allinpaqmi chayta qhawariyku, hinaspapas Señorninchisqa manan bendecinchu qolqe qoqkunata hinallataq chay qolqewan ima ruwasqankutapas”, nispa.b

“Sapanka imaynatachus sonqonpi yuyaykusqanman hina qochun”

9, 10. ¿Mayqenmi ñawpaq kaq razón donacionkunata qonanchispaq?

⁹ Kay tiempopi Diosta serviqkunaqa manan obliganataraqchu necesitanchis imatapas qonanchispaq. Aswanpas kusikuywanmi qolqenchiswan kaqninchiskunawan ima Diospa gobiernonta yanapanchis. ¿Imaraykun tukuy sonqomanta imatapas qonchis? Yachasun kinsamanta.

¹⁰ Ñawpaq kaq, donacionkunataqa qonchis Jehová Diosta munakusqanchisrayku ‘paypa munasqanta ruwayta’ munasqanchisraykupiwanmi (1 Juan 3:22). Jehová Diosqa anchatan kusikun siervonkuna tukuy sonqomanta imatapas qoqtinku. Apóstol Pabloqa chhayna qoymantan qelqarqan (leey 2 Corintios 9:7). Cheqaq cristianoqa manan llakisqachu, nitaqmi kamachisqa hinachu qon, aswanpas payqa “sonqonpi yuyaykusqanman” hinan imatapas qon.c Chaywanqa kaytan nishan: Cheqaq cristianoqa reparanmi imachus necesitakusqanta, chaymantataq yuyaykun imaynatachus yanapakunanta, hinaspan chayman hina ruwan. Chhayna clase runatan Jehová Diosqa munakun, “Diosqa kusisqa qoqtan munakun”.

11. ¿Iman sonqonchista tanqarin Jehová Diosman aswan allin kaqta qonanchispaq?

¹¹ Iskay kaq, donacionkunataqa qonchis imaymanata qowasqanchismanta Jehová Diosman anchata agradecekusqanchisraykun. Yachasun Moisesman Diospa qosqan huk kamachikuymanta, chaymi reparachiwasun imayna runa kasqanchista (leey Deuteronomio 16:16, 17). Jerusalenpiqa sapa watanmi kinsa hatun fiestakuna aparikuq, chayman riq qhari israelitakunaqa ‘Diospa saminchasqanman hinan’ huk ofrendata apananku karqan. Chayraykun manaraq chay fiestakunaman rishaspa, sapanka qhariqa bendicionkuna chaskisqanpi yuyaymananan karqan sonqontapas t’aqwikunan karqan, chay qhepamantaq decidinan karqan imayna ofrenda qoyta. Chay hinallataqmi, sichus Diospa imaymana bendicionkuna qowasqanchispi yuyaymanasun chayqa, sonqonchismi tanqawasun aswan allin kaqta Jehová Diosman qonanchispaq. Tukuy sonqomanta kaqninchiskunawan qolqenchiswan ima yanapakuspaqa, rikuchinchismi imaymana bendicionkuna qowasqanchismanta Jehová Diosta anchata agradecekusqanchista (2 Cor. 8:12-15).

12, 13. a) ¿Imaynapin donacionkuna qosqanchis rikuchin reyninchis Jesucristota munakusqanchista? b) ¿Hayk’a qolqetan qonanchis?

¹² Kinsa kaq, donacionkunata qospaqa rikuchinchismi reyninchis Jesucristota munakusqanchista. ¿Imaynapin chayta rikuchinchis? Chayta entiendenanchispaq yachasun manaraq wañushaqtin imatachus Jesús qatikuqninkunaman nisqanta (leey Juan 14:23). Jesusmi nirqan: “Pipas munakuwaqniyqa simiytan kasukunqa”, nispa. Jesuspa ‘siminmi’ kay pachantinpi allin willakuykunata willanapaq kamachikuypas (Mat. 24:14; 28:19, 20). Chay ‘simintaqa’ kasukunchis tiemponchiswan, kallpanchiswan, kaqninchiskunawan ima predicacionta yanapakuspan. Chayta ruwaspan rikuchinchis reyninchis Jesucristota munakusqanchista.

¹³ Ñoqanchisqa Diospa gobiernonpa partenmantan kanchis, chaymi tukuy sonqomanta chay gobiernota yanapayta munanchis donacionkunata qospa. ¿Hayk’a qolqetan qonanchis? Chaytaqa sapankanchismi decidinchis, atisqanchisman hinataqmi qonchis. Ichaqa askha iñiqmasinchiskunan pisi qolqellayoq kanku (Mat. 19:23, 24; Sant. 2:5). Chhaynaña kaqtinpas manan llakikunankuchu, ¿imarayku? Jehová Diospas Jesuspas ancha allinpaqmi qhawarinku tukuy sonqomanta qosqankuta, nishu pisillaña kaqtinpas (Mar. 12:41-44).

¿Maymantan qolqeta horqonchis?

14. ¿Imaynatan ñawpaq tiempopi Jehová Diospa testigonkuna qelqakunata saqeqku?

¹⁴ Jehová Diospa testigonkunaqa askha watan huk contribucionta mañakuspa qelqakunata saqeqku. Chay mañakusqa contribucionqa nishu pisillan karqan, chhaynapi pisi qolqeyoq runakunapas qelqakunata chaskinankupaq. Ichaqa sichus mayqen runapas Bibliamanta astawan yachayta munaq, manataq qolqen kaqchu chayqa, predicaqkunaqa gratisllan saqeqku, ¿imarayku? Paykunaqa munaqkun chay allin sonqoyoq runakuna chay qelqakunata leespa astawan yachanankuta.

15, 16. a) ¿Ima cambiotan ruwarqan umalliq t’aqa 1990 watapi? b) ¿Imaynatan donacionkuna ruwakun? (Qhawallaytaq “¿Imakunapin donacionninchiskuna utilizakun?” nisqa recuadrota.)

¹⁵ 1990 watapin umalliq t’aqa huk cambiota ruwarqan. Chayqa qallarirqan Estados Unidos nacionpin, ¿ima cambiotan ruwakurqan? Huk cartatan apachirqanku chay nacionpi kaq llapa iñiq t’aqakunaman, chaypin nirqan: “Predicaqkunapas Bibliamanta yachayta munaq runakunapas gratisllan ima qelqatapas chaskinqaku, manan qolqeta qonankutaraqchu suyananchis ima qelqatapas chaskinankupaqqa [...]. Munaspaqa pipas qollanmanmi qolqetaqa, ichaqa manaña qoqtinkupas qonanchismi qelqakunataqa”, nispa. Chay cambio ruwakusqanqa kaytan rikuchirqan: Ñoqanchisqa manan qolqepaqchu imatapas ruwanchis, aswanpas Diosta servinanchispaqmi, hinaspapas manan Diospa siminta negociaqchu kanchis (2 Cor. 2:17). Qhepamanqa pachantinpi llapa sucursalkunan chhayna ruwayta qallarirqanku.

¹⁶ ¿Imaynatan donacionkuna qokun? Jehová Diospa testigonkunaq huñunakunanku wasipiqa kanmi donacionta churanapaq cajachakuna. Chaymantapas donaciontaqa apachikunmanmi Jehová Diospa testigonkunaq mayqen corporacionninmanpas. Sapa watanmi Qhawaq revistapi huk willakuy lloqsimun donacionkuna imayna qoymanta.

¿Imapin utilizanchis qolqe chaskisqanchista?

17-19. ¿Imakunatan ruwakun kaykunapaq churakuq qolqewan: a) pachantinpi predicakunanpaq, b) huñunakuna wasikunata hatarichinapaq, c) iñiq t’aqapi gastokunapaq?

¹⁷ Pachantinpi predicakunanpaq. Chay cajachaman churakuq qolqeqa pachantinpi predicación aparikunanpaqmi utilizakun. Chay qolqewanmi qelqakunata ruwaspa pachantinman rakinku, Betel wasikunata hatarichinku allichanku ima, escuelakunatapas preparanku. Hinaspapas chay qolqetan utilizanku misionerokunaq, watukuq umallikunaq, precursor especialkunaq imachus necesitasqankuta paganankupaq. Chaymantapas chay qolqewanmi terremoto otaq imapas kaqtin iñiqmasikunata yanapanku.d

¹⁸ Huñunakuna wasikunata pachantinpi hatarichinapaq. Chay qolqetan utilizakun huñunakuna wasikunata allichanankupaq otaq hatarichinankupaqpas. Chay qolqetaqa iñiq t’aqakunan apachinku, astawan qolqeta apachiqtinkuqa astawanmi huñunakuna wasikuna ruwakun.e

¹⁹ Iñiq t’aqapi gastokunapaq. Chay cajachaman churakuq qolqetaqa huñunakuna wasipi gastokunapaqmi utilizanku otaq imatapas allichanankupaq. Umallikunaqa mayninpin munankuman chay cajachaman churakuq wakin qolqeta sucursalman apachiyta, chhaynapi pachantinpi predicacionta yanapanankupaq. Chhayna kaqtinqa, umallikunan chayta iñiq t’aqaman willananku. Sichus iñiq t’aqa allinpaq chayta qhawarin chayqa, apachinkumanmi chay qolqeta. Iñiq t’aqapi qolqemanta encargakuq iñiqmasiqa sapa killanmi iñiq t’aqaman willan qolqewan imakunatachus ruwakusqanta.

20. ¿Imaynatan “tukuy kaqniykikunawan” Jehová Diosta yupaychawaq?

²⁰ Kay tiempopiqa pachantinpin predicakushan runakunatapas Jesuspa qatikuqnin kanankupaq yachachikushan, chay hatun llank’ay aparikunanpaqqa imaymanatan necesitakun, chayta yachasqanchismi kallpachawanchis ‘tukuy kaqninchiskunawan [Diosta] yupaychananchispaq’ (Prov. 3:9, 10). Chay kaqninchiskunaqa kaykunan: kallpanchis, yuyayninchis, Diosta yupaychananchispaq imaymana ruway atisqanchispas. Chaykunataqa allintan utilizayta munanchis Diospa gobiernonta yanapananchispaq. Ichaqa atillanchistaqmi qolqenchiswan otaq hukkunawanpas yanapakuyta. Chhaynaqa kallpachakusun atisqanchisman hina aswan allin kaqta qonanchispaq. Donacionkuna qosqanchisqa Jehová Diostan hatunchan, chayta ruwaspataq rikuchinchis Jesuspa kamachisqan gobiernota yanapakusqanchista.