2 YACHACHIKUY
Hunt’aq sonqo kaychis
“Diospa hukllachasqantaqa ama runaqa t’aqachunchu” (Marcos 10:9)
Jehová Diosqa manan allinpaqchu qhawarin ‘mana hunt’aq kayta’ (Malaquías 2:16). Chaytan astawanqa casarasqakuna reparananku. ¿Imarayku? Hunt’aq kayqa casadokunatan yanapan confianzawan qhawarinakunankupaq, confianza kaqtintaq astawan munanakunku.
Kay tiempopiqa manañan casarasqakuna hunt’aq sonqowanchu qhawarinakunku. Chaymi chaykuna mana kananpaq iskay yanapaykunamanta yachasun.
1 CASADO KAWSAYNIYKITA ANCHA CHANINPAQ QHAWARIY
BIBLIAN NIN: ‘Aswan allin kaqtapuni akllakuychis’, nispa (Filipenses 1:10). Casado kawsayniykiqa ancha importanten, chaymi paytaraq ñawpaqtaqa atiendenayki.
Jehová Diosmi munan sonqoyki esposallaykipaq, qosallaykipaq kananta, ima ruwasqaykichismanta kuskalla kusikunaykichistapas (Eclesiastés 9:9). Diosqa manan munanchu qonqarparinaykita, aswanmi munan sapa kutilla paypaq allinkuna ruwanaykita (1 Corintios 10:24). Payqa yachananmi ancha valorniyoqpaq qhawarisqaykita, payllawan kay munasqaykitapas.
¿IMATAN RUWAWAQ?
Sapa kutilla tiempota t’aqay esposaykiwan kanaykipaq.
Imata ruwanaykipaqpas iskayniykichispi yuyaykuychis.
2 SONQOYKITA ALLINTA CUIDAY
BIBLIAN NIN: “Pipas huk warmita munakuspa qhawaqqa ñan sonqonpi chay warmiwan wasanchay huchata ruwanña”, nispa (Mateo 5:28). Sichus warmipas otaq qharipas millay qhelli kaqkunata qhawanman chayqa, sonqonpin wasanchay huchapiña urmashanman.
Jehová Diosmi Bibliapi niwanchis sonqonchista allinta cuidanapaq (Proverbios 4:23; Jeremías 17:9). Chaypaqqa manan mana allinkunata qhawanachu (Mateo 5:29, 30). Job runa hinan sonqonchista kamachinanchis ama huk warmita, huk qharita qhawashananpaq (Job 31:1). Manan imaraykullapas pornografía nisqata qhawanachu, nitaq sonqonchispi hukta munapayanachu.
¿IMATAN RUWAWAQ?
Sut’ita hukkunaman rikuchiy esposaykita, qosaykita anchata munakusqaykita.
Sichus esposayki, qosayki mana allinpaq qhawarishan piwanpas huñukushasqaykita chayqa, t’aqakuy chay runamanta.