4 YACHACHIKUY
Qolqeta allinta aypachikuychis
“Imatapas ruwanaykipaqqa yuyaychachikuyraq” (Proverbios 20:18)
Llapallanchismi qolqeta necesitanchis familianchista uywanapaq (Proverbios 30:8). Bibliapunin nin: ‘Qolqeyoq kayqa runatan waqaychan’, nispa (Eclesiastés 7:12). Ichaqa mayninpin qolqemanta rimasqaykichis hawa ima ch’aqwaypas hatarinman (Efesios 4:32). Chaykuna mana kananpaqmi confianza kanan, kuskamantataqmi qhawarinaykichis imakunapi qolqe gastanaykichista.
1 GASTOKUNAMANTA RIMAYCHIS
BIBLIAN NIN: “Pipas torreta sayarichiyta munaspaqa tukunankama gastananpaqmi ñawpaqtaraq qolqenta yupan hayk’achus kasqanta”, nispa (Lucas 14:28). Ñawpaqtaqa qhawariychis imakunapin gastokunata ruwankichis chayta (Amós 3:3). Chaymantaqa qolqeykichispa kasqanman hina, qhawariychis imakuna necesitasqaykichista (Proverbios 31:16). Kashanmanña qolqeykichis chaypas, ama comuntaqa imatapas rantiychischu. Qolqeykichispa kasqanman hinalla imatapas rantiychis, mana chayqa manun rikhuriwaqchis (Proverbios 21:5; 22:7).
¿IMATAN RUWAWAQ?
Killa tukuyta qolqeykichis puchuqtinqa, parlariychis imatan chay qolqewan ruwankichis chayta.
Qolqeykichis mana aypaqtinqa, parlariychis imakunapin pisita gastawaqchis chayta. Yaqapaschá pensionpi mikhunaykichismantaqa wasipi wayk’ukuwaqchis.
2 HONRADO KAYCHIS
BIBLIAN NIN: “[Honradon kanaykichis] manan Señorpa qayllallanpichu, aswanpas runakunaq qayllanpiwanmi”, nispa (2 Corintios 8:21). Sut’illanta esposaykiman, qosaykiman willay hayk’a ganasqaykita hayk’a gastasqaykitapas.
Ima hatun gastotapas ruwayta munashanki chayqa, esposaykiwan, qosaykiwan ñawpaqta parlay (Proverbios 13:10). Iskayniykichismanta imatapas decidinkichis chayqa, manan ima ch’aqwapas kanqachu. Hinaspapas kayta yuyariy: Qolqe ganasqaykiqa iskayniykichispan (1 Timoteo 5:8).
¿IMATAN RUWAWAQ?
Rimaychis hayk’a qolqetan sapankaykichispas gastawaqchis chayta.
Qolqemanta parlariychis manaraq ima sasachaykuypas kashaqtin.