Diosmanta jamuq iskay willakuykuna

Bibliapin tarikun Diosmanta jamuq willakuykuna, chaykunawanmi janaq pacha Yayanchisqa allinta yachachiwanchis. Kunan yachasun iskay allin willakuykunamanta, chaykunatan willaran Gabriel sutiyoq ángel 2.000 wata ñaupaqtaraq, chay angelqa ‘tukuy tiempo Diospa ñaupanpi sayaqmi’ (Lucas 1:19). ¿Imaynapin chay willakuykunata willaran?

Chaykunatan willaran kinsa watapi manaraq Jesús jamushaqtin. Ñaupaq willakuytan willaran Zacarías sutiyoq sacerdoteman, payqa Judea orqo-orqo ladopin Jerusalén llaqta cercallapi tiyaran. Paypa esposanpa sutinmi karan Elisabet. Paykunaqa iskayninkun edadniyoqña karanku, manataqmi wawankupas karanchu. Juj kutinmi Zacariasqa templopi ruwasharan sacerdote ruwananta. Chayllamanmi ángel Gabriel payman rijuriran incienso ruphachina altarpa ladonpi.

Zacariasqa anchatan mancharikuran chay angelta rikuspa. Chaymi angelqa niran: “Ama mancharikuychu, Zacarías; rogakusqaykitan Dios uyarimun, esposayki Elisabetmi juj qhari wawata qanpaq onqokunqa, paytan sutichanki ‘Juan’ nispa [...] Jehová Diospa ñaupanpin payqa jatun kanqa”, nispa. Nillarantaqmi: ‘Paymi llaqtata preparanqa Jehová Diospaq jina’, nispa (Lucas 1:13-17).

Zacariasmi ichaqa mana chay nisqanta creeranchu wawayoq kananpaq machuña kasqanrayku, esposanpas edadniyoqña kasqanrayku. Chaymi Gabrielqa niran: “Mana creewasqaykiraykun mana rimayta atinkichu chaykuna junt’akunan p’unchaykama”, nispa (Lucas 1:20).

Chaykamataq jawapi kashaq runakunaqa Zacariasta suyasharanku “¿imanaqtintaq kunankama mana lloqsimunchu?” nispa. Chaymantañan Zacariasqa lloqsimuran, ichaqa manan rimayta atiranchu, chaymi makillanwan paykunata rimapayaran. Chayta rikuspan runakunaqa niranku: “Imatachá templo ukhupi rikuramun”, nispa.

Templopi servinan p’unchaykuna junt’akuqtinmi Zacariasqa wasinta kutipuran. Chay qhepallamanmi esposan Elisabetqa onqoq rijuriran. Chaymi payqa pisqa killa wasillanpi karan, manan maymanpas lloqsiranchu.

Chaymantataq Gabrielqa María sutiyoq sipasman rijuriran. Chay sipasqa Galilea provinciapi Nazaret llaqtapin tiyaran. Paytan Gabriel niran: “María, qanqa Diospa sumaq qhawarisqanmi kanki. Qanmi onqoq rijurinki, jinan juj qhari wawata onqokunki, paytan sutichanki ‘Jesús’ nispa. Payqa jatunmi kanqa, ‘ancha jatun Diospa Churin’ nisqataqmi kanqapas. [...] Jacobpa mirayninta[n] wiñaypaq kamachinqa, kamachikuynintaq mana tukukuq kanqa”, nispa (Lucas 1:30-33).

Ángel Gabrielqa anchatachá kusikuran chay iskay importante willakuykunata willaspa. Bautizaq Juanmanta Jesusmantawan astawan yachaspan allinta entiendesun imaraykuchus chay willakuykuna importante karan chayta.