Jesús Mateota wajan

Mana kuyuriy atiq runata qhaliyachisqan qhepamanqa Capernaum ladollapin Jesusqa juj tiempo karan. Chaypin askha runakuna payman jamuranku, paytaq chay runakunata yachachiran. Chaymanta ripushaspan Jesusqa “Leví” nisqa Mateota rikuran impuesto cobranapi tiyashaqta, paytan Jesusqa niran “qatikamuway” nispa (Mateo 9:9).

Mateoqa yachanmanñan karan Jesuspa yachachikuyninkunamanta milagrokuna ruwasqanmantapas, imaynan Pedropas, Andrespas, Santiagopas, Juanpas paykunata Jesús wajaqtin yacharankuña jinata. Chaychá paypas kaq rato ‘sayarispa Jesusta qatikuran’ (Mateo 9:9). Chhaynapin Mateoqa impuesto cobrananta saqepuspa Jesuspa discipulon kapuran.

Chay qhepamanmi Mateoqa jatun mijuyta wasinpi ruwachiran, yaqapaschá chaytaqa ruwaran Jesuspa wajasqanmanta agradecekusqanrayku. Chaypin kasharanku Jesuspa discipulonkuna, impuesto cobraqkuna ima. Chay runakunan Romapi autoridadkunaq kamachisqan impuestota cobraqku barco chayamuqkunamanta, negociantekunamanta, juj llaqtakunamanta imapas apamusqa kaqkunamanta, jujkunamanta ima. Chaymantapas paykunaqa manan iman kaqllatachu impuestokunata cobraqku, chaymi judío runakunaqa paykunata cheqnikuqku. Chay mijuymanqa askhan jamuranku “juchasapa” runakunapas (Lucas 7:37-39).

Chayta rikuspan fariseokunaqa Jesuspa discipulonkunata niranku: “¿Imaraykun yachachiqniykichis mijun impuesto cobraqkunawan juchasapa runakunawan ima?”, nispa (Mateo 9:11). Jesustaq chayta uyarispa niran: “Qhali runakunaqa manan doctorta necesitankuchu, onqosqakunan ichaqa necesitanku. Chayrayku, riychis, jinaspa Diospa imachus nisqanta yachamuychis, paymi nin: ‘Khuyapayakuq kanaykichistan munani, manan sacrificiokuna jaywawanaykichistachu’, nispa. Noqaqa manan allin kausaq runakunata wajaqchu jamuni, aswanpas juchasapakunata wajaqmi”, nispa (Mateo 9:12, 13; Oseas 6:6). Chay fariseokuna manaña yachachiqninkupaq jinachu Jesusta qhawariranku chaypas, allin kaq ruwaytan Jesusqa paykunaman yachachisharan.

Jesusqa manan chay fariseo runakuna jinachu karan, payqa manan chay juchasapa runakunata pisicharanchu, aswanmi Diosman achhuykunankupaq yanaparan. Chaychá Mateoqa chay runakunata wasinman invitaran. Jesusqa chay runakunata anchata khuyapayaspan juj doctor jina paykunata yanaparan iñiyninkupi qhaliyanankupaq, chaymi chay runakunamanta ‘askha Jesusta qatikuranku’ (Marcos 2:15).

Jesusqa chay runakunata khuyapayasqanwanqa manan “juchaykichisqa manan imananpaschu” nisharanchu. Payqa khuyay onqosqa runakunata jina yanapananpaqmi paykunata khuyapayaran; imaynan lepra onqoyniyoq runatapas: “Arí, munanin, qhali kapuy”, nispa khuyapayaran, chhaynatan paykunatapas khuyapayaran (Mateo 8:3). Chhaynaqa Jesús jinan noqanchispas iñiyninkupi onqosqa kashaq runakunata khuyapayaspa yanapaykunanchis.