Jesusqa Diospa wawanmi

Sábado p’unchaypi juj runata qhaliyachisqanmanta juchachaqninkunatan Jesusqa niran: “Yayayqa kunankamapas llank’ashallanpunin, chaymi noqapas llank’ashallani”, nispa (Juan 5:17).

Jesusqa Yayan jinan sábado p’unchaypipas allin kaqkunata ruwasharan predicaspa onqosqakunatapas qhaliyachispa ima. Chayta ruwaspaqa manan Diospa kamachikuynintaqa p’akisharanchu. Juchachaqninkunan ichaqa paypaq sinchita phiñakuspa wañuchiytaraq munaranku.

Chay runakunaqa Diostapas k’amishanman jinatan Jesusta qhawariranku “Diosqa Yayaymi” nisqanrayku. Paykunapaqqa Jehová Dioswanpas Jesús igualakushanman jinan chayqa karan. Jesusmi ichaqa mana chay runakunata manchakuranchu, chaymi niran: “Yayaqa munakunmi Churita, chaymi tukuy ima ruwasqanta rikuchin”, nispa (Juan 5:20).

Ñaupaq tiempopin Jehová Diosqa Jesusman rikuchiran kausay qoq kasqanta, chaytan ruwaran wañusqakunata kausarichinankupaq wakin runakunaman atiyta qospa. Chaymi Jesusqa niran: “Imaynan Yayaqa wañusqakunata jatarichin jinaspa kausachin, chhaynatan Churipas munasqankunataqa kausachin”, nispa (Juan 5:21). Chaytapunin Jesusqa ruwanqa jamuq tiempopi. Kunanpas ñan kausarichishanña iñiyninpi wañusqa kaqkunata, chaychá payqa niran: ‘Pipas simiyta uyarispa kachamuwaqniyta creeqqa wiñay kausayniyoqmi kanqa, payqa wañuymantan kausayman jaykunqa’, nispa (Juan 5:24).

Chay judiokunawan rimashasqan tiempopaqqa manaraqmi Jesusqa pitapas kausarichiranchu, chaywanpas payqa niranmi: ‘Tiempon chayamunqa, chaypin sepulturakunapi llapa kaqkunaqa kunkayta uyarispa lloqsimunqaku’, nispa (Juan 5:28, 29).

Chaytaña pay ruwanan karan chaypas, niranmi: ‘Manan imatapas noqallamantaqa ruwayta atiymanchu, noqaqa kachamuwaqniypa munaynillantan ruwani’, nispa (Juan 5:30). Chaywanpas Jesusqa sut’itan willaran juez kananpaq, wañusqakunata kausarichinanpaqpas Diospa ajllasqan kasqanta. Ichaqa bautizaq Juanpas ñan paymantaqa willaranña. Chaymi Jesusqa chay judiokunata niran: “¿Manachu qankuna Juanmanqa runakunata kacharankichis? Payqa cheqaqtan noqamantaqa willaran”, nispa (Juan 5:33).

Chhaynaqa chay runakunaqa iskay wata jina ñaupaqtañan bautizaq Juanpa Cristomanta willasqanta uyarinkuman karan (Juan 1:20-25). Paykunaqa allinpaqmi rikuranku Juanpa nisqanta, chaymi Jesusqa niran: ‘Pisi tiempollan qankunaqa k’anchayninpi mayta kusirikuyta munasharankichis’, nispa (Juan 5:35). Ichaqa bautizaq Juanpa willasqanmantapas aswan jatun willakuyraqmi karan.

Chaymantan pay niran: ‘Imachus ruwasqaykunan rikuchin noqaqa Yayaq kachamusqan kasqayta’, nispa. Chay ruwasqankuna ukhupin kasharan estanquepi milagro ruwasqanpas. Chaymantapas ‘Yayan kikinmi Jesusmantaqa willaran’ pay bautizakushaqtin (Juan 5:36, 37; Mateo 3:17).

Chay runakunaq t’aqwisqanku qelqakunapipas willakusharanmi Jesusmantaqa, chaymi payqa niran: “Moisesta creewaqchis chayqa, noqatapas creewankichismanchá, payqa noqamantan qelqaran. Ichaqa manataq paypa qelqasqantapas creenkichischu chayqa, ¿imaynapitaq noqaq nisqaytari creewaqchis?”, nispa (Juan 5:46, 47). Chhaynaqa manan ima razonpas karanchu Jesusta mana chaskinankupaqqa.