Juj capitán rikuchin ancha iñiyniyoq kasqanta

Orqopi yachachiyta tukuspan Jesusqa Capernaum llaqtata riran. Chaypin judiokunamanta wakin kuraq runakuna payman achhuykuranku, paykunatan kachamusqa Roma ejercitopi 100 soldadokunata kamachiq capitán.

Chay capitanpa kamachinmi ‘wasinpi sinchita onqospa ñak’arisharan, manan jatariytapas atiranchu’, yaqañan wañupusharanpas (Mateo 8:6). Chaymi chay capitanqa munasharan Jesuspa yanapananta. Payqa sumaq runan karan, chaymi chay kachasqan kuraq judiokunaqa Jesusta rogakuranku: “Payqa mañakusqanta ruwapunaykipaq jinapunin, munakunmi llaqtanchistapas, chaymi sinagogatapas jatarichipuwaranku”, nispa (Lucas 7:4, 5).

Jinan Jesusqa kaq rato chay capitanpa wasinman riran. Chay capitanmi ichaqa amigonkunata kachamusqa: ‘Wiraqocha, ama jamuychu, noqaqa manan wasiyman jaykumunaykipaq jinachu kani. Chayraykun mana noqa kikiychu qanman jamurani’, nispa Jesusta ninankupaq (Lucas 7:6, 7). Chaywanmi payqa rikuchisharan k’umuykukuq llamp’ulla kasqanta. Payqa manan jujkuna jina millaytachu trataq kamachinkunataqa (Mateo 8:9).

Chay capitanqa yacharanchá judiokunaqa waj llaqtayoq runakunawan mana juñukuqchu kasqanta (Hechos 10:28). Chaypaschá payqa amigonkunawan Jesusta nichiran: “Aswanpas rimarillay, chhaynapi kamachiy qhaliyananpaq”, nispa (Lucas 7:7).

Chayta uyarispan Jesusqa admirasqa niran: “Manan Israel llaqtantinpipas khayna iñiyniyoq runataqa tariranichu”, nispa (Lucas 7:9). Chay capitanpa amigonkunataq wasiman kutipuranku, chaypin capitanpa kamachinta qhalita tariranku.

Chay qhepatan Jesusqa niran: “Askhan inti lloqsimuy ladomanta inti jaykuy ladomantawan jamunqaku, jinaspa janaq pacha gobiernopi Abrahanwan, Isaacwan, Jacobwan ima mesapi tiyaykunqaku”, nispa. Chaywanmi payqa rikuchiran mana judío kaqkuna iñisqankurayku bendecisqa kanankuta. Mana iñiq judiokunamantan ichaqa niran: ‘Tutayaq jawamanmi wijch’usqa kanqaku. Chaypin paykunaqa waqanqaku, kirunkutaraq k’achachachinqaku’, nispa (Mateo 8:11, 12).

Chhaynaqa mana iñiq judiokunaqa manan ‘Diospa gobiernonman’ jaykunankuchu karan. Waj llaqtayoq runakunan ichaqa iñisqankurayku chay gobiernopi chaskisqa kananku karan.