Divorciakuymanta wawakuna munakuymantawan

Galileamantan Jesusqa discipulonkunapiwan Jordán mayuta chimparanku, jinaspa uray ladoman puririranku Perea ladonta. Chaypin juj kuti fariseokunaman willaranña imaynatachus Dios divorciakuyta qhawarin chayta (Lucas 16:18). Kay kutipin ichaqa Jesusta pruebaman churayta munaspa divorciakuymanta tapuranku.

Moisespa chaskisqan kamachikuyman jinaqa pi qharipas warminpa “mana allin ruwayninta” yachaspaqa divorciakullanmanmi karan (Deuteronomio 24:1). Wakinqa chayta mana allinta entiendespan piensaqku ima jawallapas divorciakuy atikunanpaq. Chaymi fariseokunaqa Jesusta tapuranku: “¿Atinmanchu juj runa esposanmanta imaraykullapas t’aqakapuyta?”, nispa (Mateo 19:3).

Jinan Jesusqa niran: “¿Manachu leerankichis runata kamaqqa qallariymantapacha qharita warmitawan kamasqanta? Paymi niran: ‘Chayraykun runaqa taytantapas mamantapas saqepunqa, jinaspa esposanman jujllachakapunqa, iskayninkutaq juj aychalla kapunqaku’, nispa. Chhaynaqa manan iskayñachu kanku, aswanpas juj aychallañan. Chayrayku, Diospa jujllachasqantaqa ama pipas t’aqachunchu”, nispa (Mateo 19:4-6). Chhaynaqa, Adanwan Evawanqa manan jayk’aqpas divorciakuypiqa piensanankuchu karan.

Fariseokunataq Jesusta niranku: “Chhaynaqa, ¿imaraykutaq Moisesri kamachiran pi runapas t’aqanakuy papelta qospa esposanmanta t’aqakapunanpaq?”, nispa (Mateo 19:7). Jesustaq niran: “Moisesqa k’ullu sonqo kasqaykichisraykun mana jark’arasunkichischu esposaykichismanta t’aqakapunaykichista, ichaqa manan chhaynachu qallariypiqa karan”, nispa (Mateo 19:8). ‘Qallariypi’ nisqanwanqa Adán Evata Dios casarachisqanmantan rimasharan.

Chaymantan Jesusqa niran: “Pipas esposan qhelli juchaman mana urmashaqtin paymanta t’aqakuspa jujwan casarakunman chayqa, pantay juchamanmi urmashanman”, nispa (Mateo 19:9). Chay pantay juchaqa griego rimaypi por·neiʹa ninmi, chay jucha kallaqtinmi pipas divorciakuytaqa atinman.

Jinan Jesuspa discipulonkunaqa niranku: “Chhaynataq chayqa, yanqañachá kanman casarakuyqa”, nispa (Mateo 19:10). Chhaynaqa pipas casarakuyta munaqqa manan jayk’aqpas divorciakuypiqa piensananchu.

Chaymantan Jesusqa soltero kaymanta rimaran. Wakinqa manas casarakuyta atinkuchu mana allin nacesqankurayku otaq capasqa kasqankurayku. Wakintaqsi mana casarakunkuchu tukuy tiemponkuwan Diospa gobiernonmanta willanankupaq; paykunamantan Jesusqa niran: “Pipas chhayna kayta atiqqa kallachun”, nispa (Mateo 19:12).

Chaymantataq runakunaqa wawankuta Jesusman apamuyta qallariranku. Jesuspa discipulonkunataq paykunata phiñarikuranku. Chayta rikuspan Jesusqa discipulonkunapaq phiñakuspa niran: “Jinalla wawakunaqa noqaman jamuchunku, ama jark’aychischu; Diospa gobiernonqa paykunapaqmi. Cheqaqtan niykichis: Pipas Diospa gobiernonta mana juj wawa jinachu chaskinqa chayqa, manapunin chaymanqa jaykunqachu”, nispa (Marcos 10:14, 15; Lucas 18:15).

Jesuspa chay nisqanmi llapanchista kallpachawananchis wawakuna jina llamp’u sonqo, yachachina ima kananchispaq. Chaymantan Jesusqa chay wawakunata marq’arikuspa allinlla kanankupaq Diosmanta mañapuran. Chhaynatan payqa qhawarin llapan ‘Diospa gobiernonta wawa jina chaskiqta’ (Lucas 18:17).