Jesusmi ñanpas, cheqaq kaqpas, kausaypas

Última cenata ruwasqan wasipin Jesusqa apostolninkunata niran: “Ama sonqoykichispi llakipakuychischu. Diospi iñiychis, noqapipas iñillaychistaq”, nispa (Juan 13:36; 14:1).

Chaymantataq ama llakikunankupaq niran: “Yayaypa wasinpiqa askhan kashan maypichus tiyanaykichispaq [...]. Maymanchus rinayman rispaqa maypichus tiyanaykichispaqmi preparamusaq, chaymantataq wajmanta qankunaman jamusaq, jinaspa wasiman pusapusaykichis, chhaynapi qankunapas maypichus kasqaypi kanaykichispaq”, nispa. Payqa cieloman ripunanmantan rimasharan, apostolkunan ichaqa mana chayta entienderankuchu, chaymi Tomasqa niran: ‘Señor, manan maymanchus rishanki chaytaqa yachaykuchu, manan chayman riq ñantapas reqsiykuchu’, nispa (Juan 14:2-5).

Jinan Jesusqa payta niran: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa (Juan 14:6). Chhaynaqa, pipas Yayanpa wasinman jaykunanpaqqa Jesuspin iñinan karan, pay jinataqmi kausananpas karan.

Jinan Felipeqa niran: “Señor, Yayata rikuchiwayku”, nispa. Felipeqa imaynan Moisespas, Eliaspas, Isaiaspas Diosta rijuriypi rikuranku chhaynatapaschá Diosta rikuyta munasharan, Jesusmi ichaqa niran: “Felipe, ¿khaytukuy tiempoña qankunawan kashaqtiychu manaraq reqsiwanki? Pipas noqata rikuwaqqa Yayatapas rikullantaqmi”, nispa. Jesusqa Yayan jinapunin tukuy imatapas ruwaran, chaymi payta rikuyqa Yayanta rikuy jina karan. Chaywanpas Yayanmi aswan atiyniyoqqa karan, chaymi Jesusqa niran: “Qankunaman imachus nisqaytaqa manan noqallamantachu rimani”, nispa (Juan 14:8-10). Chaywanmi Jesusqa rikuchisharan tukuy imatapas Yayanmanta yachasqanta.

Chaymantan Jesusqa niran: “Pipas noqapi iñiqqa, noqaq ruwasqaykunatan ruwanqa, chaykunamantapas aswantaraqmi ruwanqa”, nispa (Juan 14:12). ¿Imatan chaywan nisharan? Paypa discipulonkuna, ¿aswan jatun milagrokunatachu ruwananku karan? Manan. Jesusqa allin willakuykuna willaymantan rimasharan. Paypa discipulonkunaqa aswan unay tiempon willananku karan, aswan karu llaqtakunamanmi chayananku karan, aswan askha runakunamantaqmi willanankupas karan.

Jesusqa ripunanña karan chaypas, manan sapallankutachu discipulonkunata saqenan karan, chaymi niran: “Imatapas sutiypi mañakuqtiykichisqa ruwapusaykichismi [...]. Noqan Yayamanta mañakusaq, jinan payqa juj yanapaqta qosunkichis qankunawan wiñaypaq kananpaq, chayqa cheqaq kaqta sut’iman orqoq espiritun”, nispa (Juan 14:14, 16, 17). Paypa prometesqanman jinan paykunaqa Pentecostés p’unchaypi santo espirituta chaskiranku.

Jesusqa nillarantaqmi: “Juj chikanmantaqa manañan runakunaqa rikuwanqakuñachu, qankunan ichaqa rikuwankichis; noqaqa kausashallasaqmi, qankunapas kausashallankichismi”, nispa (Juan 14:19). Jesús kausarimpuqtinqa discipulonkunaqa rikunankun karan paytaqa, tiempowantaq janaq pachaman ripunanku karan paywan kuska kanankupaq.

Chaymantan Jesusqa nillarantaq: ‘Pipas kamachikuyniykunata ruwaqmi munakuwaqniyqa, munakuwaqniytaq Yayaypa munakusqan kanqa, noqapas paytaqa munakusaqmi, sut’itataq paymanqa rikuchikusaqpas’, nispa. Jinan Judas Tadeoqa tapuran: “Señor, ¿imanaqtintaq noqaykumanri sut’ita rikuchikunki, manataq runakunamanqa?”, nispa. Jinan Jesusqa payta niran: ‘Pipas munakuwaqniyqa kasukunqan simiyta, Yayaytaq payta munakunqa. Pipas mana munakuwaqqa manan kasukunchu simiyta’, nispa (Juan 14:21-24). Runakunaqa manan Jesusta kasukurankuchu, chaymi mana iñirankuchu ñan, cheqaq kaq, kausay ima kasqanpi.

Chaymantan Jesusqa apostolkunata niran imaynapichus ima nisqantapas yuyarinanku karan chayta. Niranmi: “Yanapaq santo espiritun tukuy imaymanata yachachisunkichis, tukuy imaymana nisqaytataq yuyarichisunkichispas, chay espiritutan Yayaqa sutiypi kachamunqa”, nispa. Apostolkunaqa rikurankuñan santo espirituq atiyninta, chayqa anchatachá Jesuspa chay nisqanwanqa kallpachakuranku. Chaymantataq Jesusqa niran: “Noqaq qosqay thaj kaytan saqeshaykichis [...]. Aman sonqoykichispi llakipakunkichischu, amataq manchapakunkichispaschu”, nispa (Juan 14:26, 27). Chhaynaqa Jesuspa Yayanmi paykunataqa yanapanan karan, chaymi mana manchakunankuchu karan.

Pisillamantan paykunaqa Diospa atiyninta rikunanku karan Jesusta imayna cuidasqanpi. Chaymantan Jesús niran: “Kay pacha kamachikuqqa ñan jamushanña [...]. Payqa manan imanaytapas atiwanmanchu”, nispa (Juan 14:30). Jesuspiqa manan ima mana allinpas karanchu, chaymi Saqraqa mana imanaytapas atiranchu pantachinanpaqqa, chaymantapas Jesusqa ‘Yayanpa kamachisqanman jinapunin ruwasharan’, chaymi Saqraqa mana kausarichisqa kanantaqa jark’ayta atinanchu karan (Juan 14:31).