¿Abrahanchu taytanku karan, icha Saqrachu?

Jerusalenpi ch’ujlla ruway fiestapi Jesús yachachishaqtinmi wakin judiokuna payta niranku: “Noqaykuqa Abrahanpa wawankunan kayku, manataqmi jayk’aqpas noqaykuqa piqpa kamachinpaschu karayku”, nispa. Chaymi Jesusqa niran: “Noqaqa yachanin Abrahanpa wawankuna kasqaykichista, ichaqa wañuchiytan munawashankichis, yachachisqayta mana jap’ikusqaykichisrayku. Yayaywan kashaspa imachus rikusqaykunamantan noqaqa rimani; qankunataq taytaykichismanta imachus uyarisqaykichista ruwankichis”, nispa (Juan 8:33, 37, 38).

Chaywanmi Jesusqa nisharan paykunaq taytanqa mana Abrahanchu kasqanta. Chay judiokunan ichaqa chayta mana entiendespa wajmanta niranku: “Taytaykuqa Abrahanmi”, nispa (Juan 8:39; Isaías 41:8). Paykunaqa Abrahanmantataq jamuranku chayqa, pay jina iñiyniyoq kanankupaqmi piensakuranku.

Jesusmi ichaqa niran: “Abrahanpa wawankunachus kawaqchis chayqa, Abrahanpa ruwasqankunatachá ruwawaqchis. Noqaqa Diosmanta uyarisqay cheqaq kaqtan willaykichis, qankunataq ichaqa wañuchiyta munawashankichis. Abrahanqa manan jayk’aqpas chaytaqa ruwanmanchu karan. Qankunaqa taytaykichispa ruwasqankunatan ruwashankichis”, nispa (Juan 8:39-41).

Chaywanpas judiokunaqa manan entienderankuchu pimantachus Jesús rimasharan chayta, chaymi niranku: “Noqaykuqa manan qhelli juchamantachu naceyku, jujllan taytaykuqa, payqa Diosmi”, nispa. Jinan Jesusqa niran: “Dioschus taytaykichis kanman chayqa, munakuwankichismanchá; noqaqa Diosmantan jamuni, [...] manataqmi noqallamantachu jamuni, aswanpas paymi kachamuwan. Qankunaqa manan yachachisqayta chaskikuyta munankichischu, chaymi rimasqaytaqa mana entiendenkichischu”, nispa (Juan 8:41-43).

Jinaspan Jesusqa sut’inta niran: ‘Qankunaqa taytaykichis Saqramantan jamunkichis, paypa munaynintataqmi ruwaytapas munankichis. Payqa llullakuyta qallarisqanmantapachan runa wañuchiq karan; t’aqakapuranmi cheqaq kaqmantapas’, nispa. Jinaspa niran: “Pipas Diosmanta kaqqa uyarinmi Diospa nisqankunata. Qankunan ichaqa mana Diosmantachu kankichis, chaymi mana uyarinkichischu paypa nisqankunataqa”, nispa (Juan 8:44, 47).

Chayta niqtinmi judiokunaqa ancha phiñasqa niranku: “Noqaykuqa sut’illantan nishayku: ‘Qanqa Samaria runan kanki, supayniyoqtaq kashankipas’, nispaqa ¿riki?”, nispa. “Samaria runa” nisqankuwanmi paykunaqa Jesusta pisichasharanku. Jesusmi ichaqa chay nisqankuta mana kasuspa niran: “Noqaqa manan supayniyoqchu kashani, aswanpas noqaqa Yayaytan jatunchashani, qankunataq ichaqa noqata pisichawashankichis”, nispa. Jinaspa niran: “Pipas simiyta kasukuqqa manapunin jayk’aqpas wañunqachu”, nispa. Chaywanqa “manan wiñaypaqqa wañunqachu” ninantan payqa nisharan, chay wañuytan nikullantaq ‘iskay kaq wañuy’ nispa (Juan 8:48-51; Apocalipsis 21:8).

Judiokunataq chayta mana entiendespa niranku: “Kunanqa allintan yachayku supayniyoqpuni kasqaykita. Abrahanpas profetakunapas wañurankumá riki; qantaq ichaqa nishanki: ‘Pipas simiyta kasukuqqa manan jayk’aqpas wañunqachu’, nispa [...]. ¿Pin kani ninkitaqri?”, nispa (Juan 8:52, 53).

Jinan Jesusqa niran: “Noqachus jatunchakuyman chayqa, jatunchakusqayqa manan imapaschu kanman. ‘Diosniykun’ nisqaykichis Yayaymi noqataqa jatunchawan; qankunaqa manan payta reqsinkichischu, noqan ichaqa reqsini. ‘Manan reqsinichu’ niymanchus chayqa, qankuna jinachá llulla kayman”, nispa (Juan 8:54, 55). Jesusqa manaña sut’intachu nisharan “noqan Mesiasqa kani” nispa chaypas, imachus rimasqanpiqa sut’i reparaymi chayqa kasharan.

Chaymantan Jesusqa niran: “Taytaykichis Abrahanqa maytan munaran imakunatachus ruwanay karan chayta rikuyta, chaypi piensaspan payqa anchata kusikuran, rikurantaqmi kanpas”, nispa. Chay judiokunan ichaqa niranku: “Qanqa manamá pisqa chunka watallaykipipaschu kashanki, ¿chaychu Abrahanta rikuwaq karan?”, nispa. Jinan Jesusqa cielomanta jamusqanta rikuchinanpaq niran: “Cheqaqtapunin niykichis: Manaraq Abrahán kashaqtinqa ñan noqaqa karaniña”, nispa (Juan 8:56-58).

Chayta niqtinmi judiokunaqa sinchita phiñakuspa rumiwan ch’aqeyta munaranku, Jesusmi ichaqa mana imanasqalla chaymanta ripuran.