PHISQA T’AQA
Kutimpuychis michiwaqninchisman waqaychawaqninchisman
Kay folletopin rimakurqan kutimpuyta munaqkuna kinsa sasachakuykunapi tarikusqankuta, ¿huknin kaq sasachakuypichu yaqapas tarikushanki? Ama niychu “ñoqallachá chhaynapiqa tarikuni” nispaqa. Ñawpa tiempopi Diosta serviqkunapas chhayna problemakunapin tarikurqanku, qantapas Diosmi paykunata hina yanapasunki atipanaykipaq.
Jehová Diosmi yanapasunki llaqtanman kutimpunaykipaq
JEHOVÁ DIOSMI yanapasunki llaqtanman kutimpunaykipaq. Paymi yanapasunki llakikuyniykikunata atipanaykipaq, paymi hampinqa k’irisqa sonqoykita, paymi ch’uya concienciayoqman tukuchipusunki. Chhaynapin wakmanta Diosta serviyta atinki. Ñawpa tiempopi cristianokuna hinan sientekunki, paykunamanmi apóstol Pablo qelqarqan: “Ñawpaqqa chinkasqa oveja hinan purisharqankichis, kunanmi ichaqa kutimpunkichisña waqaychawaqninchis, michiwaqninchis Cristoman”, nispa (1 Pedro 2:25).
Diosqa anchatapunin kusikunqa llaqtanman kutimpuqtiykiqa, chay ruwasqaykiqa manan imawanpas tupanmanchu (Proverbios 27:11). Diosqa sienteq Diosmi, ruwasqanchiskunaqa kusichinmanmi otaq llakichinmanpas. Chaywanpas manan obligawanchischu payta munakunapaq (Deuteronomio 30:19, 20). Bibliamanta yachaq runan nirqan: “Runaq sonqonqa ukhullanmanta kichakuq punku hinan, chayraykun kikin runalla kichayta atinman manataq hukqa”, nispa. Munakusqanchisrayku Diosta servinchis chayqa soqonchistapas kicharishasunman hinan, chhaynata servisqanchiswanmi Jehová Diosqa anchatapuni kusikun. Imaña hayk’aña kaqtinpas Diosta munakusqanchisqa valorniyoq regalon paypaqqa. Manan imapas kusichiwasunmanchu Diosta servispa kusikusqanchista hinaqa (Hechos 20:35; Apocalipsis 4:11).
Chaymantapas Diospa llaqtanman kutimpuspaqa necesitasqayki espiritual mikhunatan tarinki (Mateo 5:3). Runakunaqa tapukunkun: “¿Imapaqtaq kawsanchisri?”, nispa, manataqmi kutichiyninta tarinkuchu. Runakunaqa mikhunata hinan necesitanchis Diosta serviytaqa, chhaynatan Dios kamawarqanchis. Chhaynaqa, munakusqaykirayku Diosta servispallan aswan kusisqaqa kanki, Diosqa yachanmi chayta (Salmo 63:1-5).
Jehová Diosqa maytan munashan llaqtanman kutimpunaykita. Chayraykun kay folletota makiykipi hap’ishanki. Diosmanta orakuspaykun allinta kay folletotaqa ruwamurqayku. Chaymantaqa iñiq t’aqaykimanta huk umallichá otaq huk iñiqmasichá entregarqasunki, kunantaq leeshanki. Sonqoykimanchá yachasqaykikunaqa chayashan. Chaykunapin Jehová Diosqa rikuchin mana qonqasqasuykita, kutimpuqtiyki ancha munakuywan chaskinasuykitapas (Juan 6:44).
Jehová Diosqa manan qonqanchu chinkasqa ovejankunataqa, chayta yachayqa sonqochawanchismi, Donna cristianan chayta repararqan, ninmi: “Pisi-pisimantan Diospa llaqtanmanta karunchakapurqani, ichaqa sapa kutillanmi piensaq kani Salmo 139:23, 24 textoq nisqanpi, ninmi: ‘Diosníy, t’aqwiriway, sonqoyta reqsiykuway, allinta probaykuway, yuyaykuyniykunata reqsiykuy. Qhawariway, urmachiq ñanpipaschá purishani, wiñay ñanninta pusakuway’, nispa. Saqraq kamachisqan pachaqa manan ñoqapaq hinachu karqan, manapunin gustoypaqchu chaypiqa karqani, Diospa llaqtanmi ñoqapaq hinaqa karqan. Repararqanin Jehová Diosqa mana hinatachu saqerpariwasqanta, kutimpunaypaq yanapaykunallatan kasukunay karqan. ¡Anchatan kusikuni llaqtanman kutimpusqaymanta!”, nispa.
“Repararqanin Jehová Diosqa mana hinatachu saqerpariwasqanta, kutimpunaypaq yanapaykunallatan kasukunay karqan”
‘Dios kusichiqniyki’ hukmanta kapunanpaqmi orakushayku (Nehemías 8:10). Manapunin ñakapakunkichu Diospa llaqtanman kutimpuspaqa.