¡Wawayoq kanku!

Abrahanwan Sarawanqa unayñan casarasqa kasharqanku. Ur llaqtapi wasinkuta saqespan karpa-karpapi tiyarqanku. Chhaynaña kaqtinpas Saraqa Jehová Diospin confiarqan.

Saraqa wawayoqpunin kayta munarqan chaymi Abrahanta nirqan: “Esclavay Agarwan wawayoq kanki chayqa, wawaypas kanman jinan kanqa”, nispa. Tiempowanmi Agarqa qhari wawata onqokurqan, sutinmi karqan Ismael.

Unay watakuna qhepamanmi Abrahán 99 watanpi kashaqtin Sarataq 89 watanpi kashaqtin kinsa runakuna visitamurqanku. Abrahanmi paykunata valekurqan sach’aq ladonpi samarispa imallatapas mijunankupaq. ¿Pikunan karqan chay runakuna? Angelkunan karqanku. Paykunan Abrahanta nirqanku: “Jamuq watapin kay killakunapi jina esposayki qhari wawata onqokunqa”, nispa. Saraqa karpa ukhumantan uyarimusharqan, jinan sonqonpi asikuspa nirqan: “¿Khayna edadniypi wawayoq kaymanchu?”, nispa.

Jamuq watapitaq angelpa nisqanman jina Saraqa qhari wawata onqokurqan. Sutinmi karqan Isaac, chayqa “asikuy” ninanmi.

Pisqa watayoq Isaac kashaqtinmi Saraqa rikurqan Ismael Isaacmanta burlakusqanta. Payqa wawantan cuidayta munarqan, chaymi Abrahanta nirqan: “Agarta Ismaeltawan qarqopuy”, nispa. Abrahanqa manan munarqanchu chay ruwayta. Jehová Diosmi ichaqa Abrahanta nirqan: “Uyariy Saraq nisqasuykita. Ismaeltaqa cuidasaqmi, ichaqa Isaacwanmi promesaykunaqa junt’akunqa”, nispa. Chaywanmi Jehová Diosqa rikuchirqan Isaacta cuidayta munasqanta.