Juj esclavo Diosta kasukun

Joseqa Jacobpa wawanmi karqan. Anchatan papanqa payta munakurqan, chayta reparaspan kuraq hermanonkuna envidiakurqanku cheqnikurqanku ima. Juj p’unchaymi Joseqa mosqokusqanta hermanonkunaman willarqan. Mosqokusqanman jinaqa hermanonkunan payman k’umuykunanku karqan. Chaywanmi astawanraq Joseta cheqnikurqanku.

Juj p’unchaymi Josepa hermanonkunaqa Shejen llaqtaq qayllanpi ovejakunata michisharqanku. Jinan Jacobqa Joseta kacharqan imayna kashasqankuta yachamunanpaq. Joseta rikuspan hermanonkunaqa nirqanku: “Mosqokuq runan jamushan. ¡Wañurachisun!”, nispa. Joseta jap’ispanku jatun t’oqoman wijch’uykurqanku. Judá ichaqa nirqan: “Ama wañuchisunchu, aswanpas esclavo kananpaq venderapusun”, nispa. Jinan Madián runakunaman iskay chunka qolqepaq venderqanku, chay runakunaqa Egipto llaqtamanmi risharqanku.

Chay qhepamanmi hermanonkunaqa Josepa p’achanta cabraq yawarninwan llusirurqanku, jinaspa papankuman apaspa tapurqanku: “¿Manachu kayqa wawaykiq p’achan kashan?”, nispa. Jinan Jacobqa nirqan: “Juj phiña animalchá wawaytaqa mijurqapun”, nispa. Chaymi sinchitapuni wawanmanta waqarqan, manan pipas consolayta atirqanchu.

Egiptopin Josetaqa Potifar oficialman venderqanku. Diosmi ichaqa Josewan kasharqan. Potifarqa repararqanmi José allin llank’aq confianapaq jina kasqanta. Chaymi wasinpi tukuy cosasninkunamanta encargakunanpaq churarqan.

Potifarpa esposanmi rikurqan José kallpasapa munay rijch’ayniyoq kasqanta, chaymi sapa kutilla nirqan paywan puñunanpaq. ¿Imatan José ruwarqan? Nirqanmi: “Manan chaytaqa ruwaymanchu, chayqa manan allinchu. Patronniyqa noqapin confian, paypa esposanmi kanki. Qanwan puñuqtiyqa Dios contrachá juchallikuyman”, nispa.

Juj p’unchaymi Potifarpa esposanqa Joseta p’achanmanta jap’ispa obligarqan paywan puñunanpaq, José ichaqa ayqekurqan. Potifar wasinman jamuqtinmi warminqa llullakuspa nirqan: “José abusayta munawarqan”, nispa. Jinan Potifarqa sinchita phiñakuspa carcelpi wisq’achimurqan. Jehová Diosmi ichaqa Joseta mana qonqarqanchu.