Jehová Dios yanapan Joseta

Egiptopi reykunatan faraón nispa niqku. Carcelpi José kashaqtinmi faraonqa mosqokurqan, manataqmi pipas mosqokusqanta entienderqanchu. Jujnin kamachinmi faraonman willarqan mosqokusqanta José explicay atisqanta. Chaymi kamachirqan Joseta apamunankupaq.

Jinan faraonqa tapurqan: “¿Explicawankimanchu mosqokusqay imachus significasqanta?”, nispa. Jinan Joseqa nirqan: “Egiptopin qanchis wata askha mijuykuna kanqa, chaymantataq qanchis wata yarqay kanqa. Yachaysapa runata maskhay mijuykunata juñunanpaq, chhaynapi runakuna yarqaymanta mana wañunankupaq”, nispa. Jinan faraonqa nirqan: “¡Qantan ajllayki! Qanmi noqaman qatimuq autoridadniyoq runa kanki”, nispa. ¿Imaynapin José yacharqan faraonpa mosqokusqan imachus significasqanta? Jehová Diosmi yanaparqan.

Qanchis watantinmi Joseqa mijuykunata juñurqan. Chay qhepamanmi mundontinpi yarqay karqan, jinan waj llaqtakunamanta runakuna mijuyta rantiq jamurqanku. Jacobqa uyarisqan Egiptopi mijuykuna kasqanta, chaymi chunka wawankunata kacharqan mijuyta rantimunankupaq.

Paykunaqa Josepa kasqanmanmi rirqanku, Josetaq kaqpacha reqsirurqan, hermanonkunan ichaqa mana reqsirqankuchu. Jinan paypa ñaupaqenpi k’umuykurqanku. Joseqa yachaytan munarqan payta cheqnikushankuraqchus icha manachus chayta, chaymi paykunata probananpaq nirqan: “Qankunaqa llaqtaykuta qhawaqmi jamushankichis”, nispa. Jinan paykunaqa kutichirqanku: “¡Manan señor! Noqaykuqa Canaán llaqtamantan kayku, 12 hermanokunan kayku. Jujninmi ichaqa wañupunña, sullk’aykutaq papaykuwan qhepamun”, nispa. Josetaq nirqan: “Sullk’aykichista apamuqtiykichismi creesaykichis”, nispa. Chay qhepamanmi paykunaqa papankuq wasinman kutipurqanku.

Jacobpa familianqa jujmantan yarqaypi kapurqan chaymi wawankuna Egiptota kutirqanku. Chay kutipin ichaqa Benjaminpas rirqan. Jinan Joseqa hermanonkunata probananpaq qolqemanta copanta Benjaminpa costalninpi pakarqan, jinaspa paykunata nirqan: “Copaytan suwawankichis”, nispa. Copanta Benjaminpa costalninpi tariqtinkun hermanonkunaqa mana imanakuyta atirqankuchu. Josetan valekurqanku Benjaminpa rantinpi castigasqa kanankupaq.

Chaypin Joseqa yacharqan hermanonkuna cambiapusqankuta. Manaña aguantakuspataq waqarqan, nirqantaq: “Hermanoykichis José kashani. ¿Papay kausashanraqchu?”, nispa. Jinan hermanonkunaqa anchata admirakurqanku. Nillarqantaqmi: “Amaña juchachakuychischu. Diosmi kayman apamuwarqan vidaykichista salvanaypaq. ¡Usqhayta papayta kayman apamuychis!”, nispa.

Jinan hermanonkunaqa papankuman kutispa willarqanku chay sumaq noticiata, jinaspa papankuta Egiptoman aparqanku. Unay tiempomantan Joseqa papanwan kuska kapurqanku.