Puka lamar-qochapi milagro

Faraonqa Israel runakunata kacharisqanmanta pesapakuspan soldadokunata nirqan: “Carretakunata alistaychis, jinaspa jaku qhepanta, manan kacharinanchischu karqan”, nispa. Jinan soldadonkunawan Israel runakunaman aypaq rirqanku.

Jehová Diosmi llaqtanta pusasharqan, p’unchaytaqa phuyuwanmi pusarqan tutatataq nina k’anchaywan. Puka lamar-qochaq ladonmanmi aparqan, chaypitaq samachirqan.

Chay qhepamanmi Israel runakunaqa faraonta ejercitontawan rikurqanku. Manan ayqeyta atirqankuchu, ñaupankupin qocha kasharqan qhepankutataq soldadokuna jamusharqanku. Jinan Moisesta nirqanku: “¡Wañusunchismi! ¿Imapaqmi Egiptomanta orqomuwarqankiku?”, nispa. Moisestaq nirqan: “Ama manchakuychischu. Kunanmi rikunkichis Dios salvawasqanchista”, nispa. Moisesqa confiarqanmi Diospi.

Chay qhepamanmi Jehová Diosqa Israel llaqtata kamachirqan jatarinankupaq. Chay tutan Diosqa phuyuta Israel llaqtaq qhepanman churarqan. Jinan Egipto soldadokunapaq tutayaq karqan, Israel runakunapaqtaq k’anchay.

Chay qhepamanmi Jehová Diosqa Moisesta kamachirqan makinta qochaman jaywarinanpaq. Jinan sinchi kallpayoq wayra qochata iskayman t’aqarqan, jinaspa juj ñanta kicharqan, chaynintan millonninpi Israel runakunaqa ch’aki pampanta chimparqanku.

Israel runakuna qochata chimpashaqtinkun faraonpas soldadonkunapas qatipamurqanku. Jehová Diosmi ichaqa carretankuq ruedankunata p’akirqan mana usqhayta purinankupaq. Chaymi soldadokunaqa nirqanku: “¡Ayqekusun! ¡Jehová Diosmi llaqtanrayku maqanakushan!”, nispa.

Jehová Diosmi Moisesta nirqan: “Makiykita lamar-qochaman jaywariy”, nispa. Jinan sayashaq unuqa soldadokunaq patanman urmaykurqan. Chaypin faraonpas soldadonkunapas wañupurqanku. Manan jujpas salvakurqanchu.

Jinan qochata chimpaq Israel runakunaqa Diosman takirqanku: “Jehová Diosniymanmi takisaq, paymi ancha jatunchasqa Diosqa. Caballokunatan runakunantinta lamar-qochaman wijch’uykun”, nispa. Llaqtantin takishaqtinmi, warmikunaqa tususpa panderetata tocasharqanku. Llapankun kusisqa kasharqanku, kunanmi ichaqa librepuniña kapurqanku.