Diosta yupaychanapaq karpa

Sinaí orqopi Moisés kashaqtinmi Diosqa kamachirqan juj karpata ruwanankupaq. Chay karpapin Israel runakunaqa Jehová Diosta adorananku karqan. Jinaspapas chaytaqa atirqankun maymanpas apayta.

Jehová Diosmi nirqan: “Runakunata niy karpata ruwanapaq imachus necesitakusqanta atisqankuman jina apamunankupaq”, nispa. Jinan Israel runakunaqa apamurqanku qorita, qolqeta, sumaq rumikunata, alajakunata, q’aytuta, linota, animalkunaq qaranta, jujkunatawan. Qoykukuq kasqankuraykun imaymanata apamurqanku, chaymi Moisesqa llaqtata nirqan: “Askhañan kashan, amaña apamuychischu”, nispa.

Askha qharikuna, warmikuna iman yanapakurqanku karpa ruwayta. Jehová Diosmi yachayta qorqan allinta ruwanankupaq. Wakinmi puskarqanku, tejerqanku, bordarqanku ima. Jujkunataq qoriwan llank’arqanku, rumita parterqanku, k’ullukunata iman llaqllarqanku.

Jehová Diospa kamachisqanman jinan yupaychana karpata ruwarqanku. Juj sumaq cortina ruwasqankuwanmi t’aqarqanku ch’uya cuartota ch’uyay-ch’uya cuartomanta. Ch’uyay-ch’uya cuartopin tarikurqan Diospa rimanakuynin arca, chayqa maderamanta ruwasqa qoriwan llut’asqa karqan. Ch’uya cuartopitaq tarikurqan qorimanta candelero, juj mesa, inciensota q’apachinapaq altarpas. Patiopin tarikurqan jatun puruña, jatun altarpas. Diospa rimanakuynin arcata rikuspan yuyarirqanku Diosta kasukunankupaq prometekusqankuta. ¿Imataq juj rimanakuyri? Chayqa juj promesata ruwaymi.

Jehová Diosmi Aaronta wawankunatawan ajllarqan sacerdote kanankupaq, Dios yupaychana karpapi llank’anankupaqpas. Chay karpata cuidaspan Diosman ofrendakunata jaywananku karqan. Uma sacerdote Aaronllan ch’uyay-ch’uya cuartomanqa jaykurqan. Watapi juj kutillatan jaykurqan juchanmanta, familianpa juchanmanta, llaqtaq juchanmantawan sacrificiota jaywananpaq.

Egiptomanta juj wata lloqsimusqanku qhepamanmi yupaychana karpata ruwayta tukurqanku. Chayraqmi paykunaqa juj lugarpi Jehová Dios adorayta atirqanku.

Jehová Diosmi karpaq patanpi phuyuta tiyaykachirqan, jinaspa k’anchayninta k’anchaykurqan. Chaywanmi rikuchirqan kusisqa kasqanta. Phuyu altoman oqarikuqtinmi Israel runakunaqa yacharqanku puririnanku kasqanta, jinaspa karpata paskaspa phuyuta qatikurqanku. Phuyu tiyaykuqtintaq paykunaqa yacharqanku chay lugarpi qhepakunanku kasqanta.