Jehová Dios contran jatarirqanku

Chay qhepamanmi Coré, Datán, Abiram, 250 runakuna ima Moisés contra Aarón contra jatarirqanku, nirqankun: “¡Sayk’uykuñan kamachiwasqaykikumanta! ¿Imaraykun qan kamachiwanaykiku? ¿Imaraykutaq Aaronpas uma sacerdote kanan? Jehová Diosqa manan qankunallawanchu kashan, llapanchiswanmi kashan”, nispa. Diosmi ichaqa chayta qhawarirqan pay contra jatariyta jina.

Moisesmi Coreta yanapaqninkunatawan nirqan: “Paqarin yupaychana karpaman jamuychis inciensota q’apachinaykichispaq. Chaypin Diosqa rikuchinqa pitachus ajllakusqanta”, nispa.

Qhepantin p’unchaymi Corewan 250 runakunapiwan yupaychana karpaman rirqanku. Jinan sacerdotekuna jina inciensota q’apachirqanku. Chaymi Diosqa Moisesta Aarontapas nirqan: “T’aqakuychis Coremanta apoyaqninkumantawan”, nispa.

Datanwan, Abiramwanqa manan yupaychana karpapichu kasharqanku. Jinan Jehová Diosqa Israel runakunata nirqan: “Corepa, Datanpa, Abirampa tiyasqanku karpakunamanta t’aqakuychis”, nispa. Runakunataq usqhayta t’aqakurqanku. Datanpas, Abirampas, familiankupas karpankupin qhepakurqanku. Jinan jallp’a kicharikuspa llapankuta millp’urqan. Yupaychana karpapitaq cielomanta nina uraykamuspa Coreta 250 runakunatawan rupharqan.

Chay qhepamanmi Diosqa Moisesta nirqan: “Ayllukunamanta umallikuna varankupi sutinkuta churachunku. Leví aylluq varanpiqa Aaronpa sutintan churankichis. Jinaspa chay varakunata yupaychana karpapi churankichis. Jinan ajllakusqay runaq varan t’ikarinqa”, nispa.

Qhepantin p’unchaymi Moisesqa varakunata orqomurqan. Jinan Aaronpa varanqa t’ikarispa almendrata rururqan. Chaywanmi Jehová Diosqa sut’ita rikuchirqan uma sacerdote kananpaq Aaronta ajllakusqanta.