Mosoq umalli iskay mana manchakuq warmikunapiwan

Josueqa askha watakunan Diospa llaqtanta umallirqan, 110 watanpitaq wañupurqan. Josuepa kausasqan tiempopiqa Jehová Diostan servirqanku. Wañupusqan qhepamanmi ichaqa waj dioskunata adorarqanku Canaán runakuna jina. Chaymi Diosqa permitirqan Canaán llaqtamanta rey Jabín paykunata sufrichinanpaq. Jinan Israel runakunaqa Diosta valekurqanku yanapananpaq. Chaymi Diosqa juj mosoq umalliqta ajllarqan, sutinmi karqan Barac. Paymi Israel runakunata yanaparqan Jehová Diosta jujmanta servinankupaq.

Profetisa Deboran Baracman willarqan Diospa nisqanta, nirqanmi: “Cisón mayuta 10.000 soldadokunawan riy Jabinpa ejercitonwan maqanakunaykipaq. Chaypin atipanki Sisarata, paymi umallishan Jabinpa soldadonkunata”, nispa. Baractaq nirqan: “Noqawan riqtiykiqa risaqmi”, nispa. Deborataq nirqan: “Risaqmi, ichaqa manan qanchu Sisarataqa wañuchinki aswanpas juj warmi”, nispa.

Deboraqa Baracwan soldadokunawan kuskan Tabor orqoman wicharqan maqanakunankupaq. Chayta yachaspan Sisaraqa soldadokunata carretakunatawan juñuspa maqanakunanpaq rirqan. Deboran Baracta nirqan: “Jehová Diosmi atipachisunki”, nispa. Jinan Baracqa 10.000 soldadonkunawan orqomanta uraykamuspa Sisaraq soldadonkunawan maqanakurqan.

Chay qhepamanmi Diosqa Cisón mayuta askhayachispa unuta lloqsirachirqan, jinan Sisaraq carretankunaqa t’urupi mana puriyta atirqankuchu. Chaymi Sisaraqa carretanmanta uraykuspa ayqekurqan. Baracpa ejercitonmi Sisaraq ejercitonta atiparqan, Sisaran ichaqa ayqekuspa Jaelpa karpanman chayarqan chaypi pakakunanpaq. Chay warmin lecheta qospa juj mantawan tapaykurqan. Sisaraqa sinchi sayk’usqa kasqanraykun puñurapurqan. Jinan Jaelqa susigollawan qayllaykuspa juj estacawan umanpi clavaspa wañurachirqan.

Baracqa Sisarata maskhaspan Jaelpa karpanman chayarqan. Jaeltaq nirqan: “Jaykumuy, qhawachisqaykin maskhasqayki runata”, nispa. Jinan Baracqa rikurqan Sisarata pampapi wañusqata. Diosmi Israel llaqtata yanaparqan enemigonkunata atipanankupaq. Chaymi Baracpas Deborapas Diosta alabarqanku takispanku. Chay qhepamanmi Israel runakunaqa 40 wata thajpi kausarqanku.