Rutwan Noemiwan

Israelpi yarqay kasqanwanmi Noemiwan qosanwan iskay qhari wawankunawan Moab llaqtaman ripurqanku. Chaypin qosan wañupurqan, wawankunataq Moab warmikunawan casarakurqanku, sutinkun karqan: Rut, Orpá. Chay qhepamanmi wawankunapas wañupurqanku.

Israelpi yarqay manaña kasqanta uyarispan Noemiqa decidikurqan kutipunanpaq. Rutpas Orpapas paywanmi ripusharqanku, chaymi Noemiqa paykunata nirqan: “Allin esposa, allin qhachunmi karqankichis. Maytan munayman jujmanta casarakunaykichista. Kutipuychis wasiykichisman”, nispa. Warmikunataq nirqanku: “Anchatan munakuykiku, manan saqeykikumanchu”, nispa. Noemí ichaqa askha kutita nirqan llaqtankuman kutipunankupaq. Jinan Orpaqa kutipurqan, Rutmi ichaqa mana munarqanchu. Chaymi Noemiqa Rut-ta nirqan: “Orpaqa kutipunmi llaqtanman diosninkunamanpas, paywan kutipuy”, nispa. Rut-taq nirqan: “Manan saqesaykichu. Llaqtaykin llaqtay kanqa Diosniykin Diosniy kanqa”, nispa. ¿Imaynan Noemí sientekunman karqan chayta uyarispa?

Jinan cebada cosechay tiempopi Israelman chayarqanku. Juj p’unchaymi Rutqa chajrakunapi cebadata pallapakuq rirqan, Boazpa chajranpin pallapakurqan, Boazqa Rahabpa wawanmi karqan. Boazmi uyarisqa allin warmi kasqanta, Noemita munakuspa paywan qhepakusqantapas. Jinan Boazqa llank’aqninkunata kamachirqan cebadata puchunankupaq, chhaynapi Rut pallapakunanpaq.

Chay tutan Noemiqa Rut-ta tapurqan: “¿Maypin kunan p’unchay llank’amurqanki?”, nispa. Rut-taq kutichirqan: “Boazpa chajranpi”, nispa. Jinan Noemiqa nirqan: “Boazqa qosaypa familianmi. Paypa chajrallanpi llank’amuy sipaskunawan kuska. Chaypiqa allinmi kanki”, nispa.

Rutqa cosecha tukunankaman Boazpa chajranpi llank’arqan. Boazqa repararqanmi sumaq warmi allin llank’aq kasqanta. Chay tiempopiqa juj runa mana wawayoq kashaspa wañupuq chayqa, jujnin parientenmi viudawan casarakuq. Chaymi Boazqa Rutwan casarakurqan. Juj wawayoqmi karqanku, Obed sutitataq churarqanku. Obedqa rey Davidpa abuelonmi karqan. Noemipa amigonkunan kusisqa nirqanku: “Jehová Diosqa Rut-tan qorqasunki cuidanasuykipaq, chaymantapas kunanqa nietoyoqmi kapunki. Chayrayku Jehová Diosta alabasun”, nispa.