Jehová Dios Samuelwan riman

Uma sacerdote Elipan iskay wawankuna karqan Ofniwan Finehaswan. Paykunaqa sacerdotekunan karqanku yupaychana karpapitaq llank’arqanku. Ichaqa manan Jehová Diosta kasukuqkuchu, runakunatapas millaytan trataqku. Pipas Diosman sacrificiota apaqtinmi Ofniwan Finehaswanqa allin kaq aychata qhepachikuqku. Eliqa yacharqanmi wawankuna mana allin ruwasqanta, ichaqa manan imatapas ruwarqanchu correginanpaq. ¿Imatan Dios ruwarqan?

Samuelqa erqellaraq kashaspapas manan Ofní, Finehás jinachu millaykunata ruwarqan. Chaymi Jehová Diosqa paywan kusisqa kasharqan. Juj tutan Samuel puñushaqtin Elipa wajamusqanta jina uyarirqan. Jinan sayarispa Elipa kasqanman rispa nirqan: “Kaypin kashani”, nispa. Elitaq nirqan: “Manan wajamuykichu, puñuq kutipuy”, nispa. Samuel puñushaqtinmi wajmanta uyarillarqantaq. Kinsa kaq kutipin Eliqa repararqan Jehová Dios Samuelta wajamushasqanta. Jinan Eliqa Samuelta nirqan: “Wajmanta wajamuqtinqa, khaynata kutichinki: Niway Jehová Dios, kamachiykiqa uyarishanmi”, nispa.

Chay qhepamanmi uyarirqan “Samuel, Samuel” nimuqta, chaymi kutichirqan: “Niway Jehová Dios, kamachiykiqa uyarishanmi”, nispa. Diostaq nirqan: “Elitan ninki, qantapas familiaykitapas castigasaqmi. Qanqa manan wawaykikunata wanachirqankichu millaykunata yupaychana karpapi ruwashaqtinku”, nispa. Qhepantin p’unchaymi Samuelqa yupaychana punkukunata kicharqan. Manchakusharqanmi Diospa nisqanta uma sacerdoteman willayta. Elí ichaqa wajaspa tapurqan: “¿Imatan Jehová Dios willarqasunki?”, nispa. Chaymi Samuelqa llapanta willarqan.

Samuelqa Diospa amigollanpunin kasharqan kuraqña kashaspapas. Israel runakunaqa yacharqankun Jehová Dios Samuelta profeta, juez ima kananpaq ajllasqanta.