Davidwan Goliatwan

Diosmi Samuelta nirqan: “Jesepa wasinta riy, jujnin wawantan ajllani rey kananpaq”, nispa. Jinan Samuelqa Jesepa wasinta rispa kuraq wawanta rikuspa sonqonpi nirqan: “Paytachá ajllakun”, nispa. Diosmi ichaqa willarqan mana paychu kasqanta, jinaspa nirqan: “Noqaqa sonqotan qhawani, manan rijch’aynintachu”, nispa.

Jeseqa soqta wawankunatawanmi pusamurqan. Samuelmi ichaqa nirqan: “Diosqa manan mayqentapas ajllanchu. ¿Chayllachu qhari wawaykikuna?”, nispa. Jesetaq nirqan: “Kashanraqmi sullk’a kaqqa, sutinmi David, ovejakunatan michimushan”, nispa. David jamuqtinmi Diosqa Samuelta nirqan: “¡Paytan ajllani!”, nispa. Jinan Davidpa umanman aceiteta jich’aykurqan. Chaywanmi ajllarqan rey kananpaq.

Tiempowanmi Israel runakunaqa Filistea runakunawan guerrapi karqanku. Filistea runakunamanta Goliat sutiyoq jatunkaray runan, sapa p’unchay Israel soldadokunamanta burlakuspa nirqan: “Juj runata kachamuwaychis noqawan maqanakunanpaq. Ganawaqtinqa servisaykikun. Noqa ganaqtiytaq qankuna serviwankiku”, nispa.

Davidpa hermanonkunaqa soldadokunan karqanku, chaymi Davidqa paykunaq kasqanman rirqan mijunata aparikuspa. Goliat-ta uyarispan Davidqa nirqan: “¡Noqa maqanakusaq!”, nispa. Rey Saultaq nirqan: “Erqellaraqmi kanki”, nispa. Davidtaq nirqan: “Diosmi yanapawanqa”, nispa.

Jinan Saulqa Davidman qorqan armaduranta, Davidtaq nirqan: “Kaywan churakuspaqa manan maqanakuyta atiymanchu”, nispa. Chaymi Davidqa warak’anta aparikuspa mayuta rirqan pisqa llusk’a rumikunata pallananpaq, chaytataq ch’uspanman churaspa Goliatman rirqan. Goliat-taq nirqan: “¡Yau erqe jamuy, imataraq ruwarusayki! ¡Aychaykitan salqa animalkunaman qaraykusaq!”, nispa. Davidqa mana manchakuspan nirqan: “Qanqa espadawan lanzawan iman jamunki, noqan ichaqa Jehová Diospa sutinpi jamuyki. Manan noqaykuwanchu maqanakushanki, aswanpas Dioswanmi. Llapankun yachanqaku Jehová Diosqa espadamantapas lanzamantapas aswan atiyniyoq kasqanta. Paymi makiykupi qankunata entregawanqaku”, nispa.

Jinan Davidqa rumita warak’anman churaspa llapan kallpanwan wark’arqan. Jehová Diospa yanapayninwanmi rumiqa Goliatpa mat’inpi ch’antikurqan. Goliat-taq pampaman wañusqa urmarparirqan. Jinan Filistea soldadokunaqa ayqekurqanku mana wañunankupaq. Davidqa Diospin confiarqan, ¿pay jinachu qanpas Diospi confianki?