Davidwan Saulwan

Goliat-ta wañuchisqan qhepamanmi Davidqa Saulpa ejercitonta umallirqan. Davidqa askha guerrakunatan ganarqan chaymi allin reqsisqa kapurqan. Maqanakuymanta sapa kutimuqtinmi warmikunaqa takispa tususpa nirqanku: “Saulqa waranqanpi runakunata wañuchirqan, Davidmi ichaqa chunka waranqanpi wañuchirqan”, nispa. Chaymi Saulqa Davidmanta envidiakuspa wañuchiyta munarqan.

Davidqa allintan arpa tocayta yacharqan. Juj p’unchaymi Saulpaq arpata tocashaqtin Saulqa lanzanwan chanqarqan. Davidmi ichaqa k’umururqan jinan lanzaqa perqapi ch’antikurqan. Saulqa askha kutipin Davidta wañuchiyta munarqan. Chaymi Davidqa ayqekurqan ch’inneq ladoman.

Jinan Saulqa Davidta qatiparqan 3000 soldadokunawan. Chay kutipin Saulqa Davidpa pakakusqan t’oqoman jaykurqan. Chaymi soldadonkuna Davidta nirqanku: “Wañurachiy”, nispa. Davidtaq sumaqllata qayllaykuspa Saulpa p’achanmanta juj parteta mana reparachikuspalla kuchurqan. Davidpa sonqonmi ichaqa ñit’irqan, jinan soldadonkunata kamachirqan Saulta ama wañuchinankupaq. Saúl ripushaqtintaq Davidqa nirqan: “¡Makiypin kasharqanki, ichaqa manan wañuchirqaykichu!”, nispa. Chay qhepaman, ¿cambiarqanchu Saúl?

Manan, Davidtan qatikachashallarqan wañuchinanpaq. Juj tutan Davidqa sobrinon Abisaiwan Saulpa karpakusqanman rirqan, manan pipas repararqanchu. Saulta cuidaq Abnerpas misk’itan puñusharqan, jinan Abisaiqa Davidta nirqan: “Saulta wañurachisaq”, nispa. Davidmi ichaqa nirqan: “Diosmi paymanta encargakunqa. Lanzanta jarrantawan aswanpas aparikusun”, nispa.

Jinan Davidqa orqoman wichaspa alto kunkawan nirqan: “¡Abner! ¿Imaraykun reyniykita mana cuidarqankichu? ¿Maytaq jarranpas lanzanpas?”, nispa. Saulqa repararqanmi David kasqanta, jinan nirqan: “Wañuchiwankimanmi karqan, ichaqa manan chaytachu ruwarqanki. Kunanqa yachanin rey kanaykita”, nispa. Jinan Saulqa wasinman kutipurqan. Saulpa wakin familianqa munakurqanmi Davidta.