Carmelo orqopi juj milagrota rikunku

Israel nacionpiqa yaqa llapa reykunan millay karqanku, rey Ajabmi ichaqa aswan millay karqan. Payqa Baal diosta adoraq Jezabel warmiwanmi casarakurqan. Paykunan runakunata tanqarqanku Baalta adoranankupaq. Jehová Diospa profetankunatapas wañuchirqankun. ¿Imatan Dios ruwarqan? Profeta Eliastan kacharqan Ajabwan rimananpaq.

Eliasmi Ajabta nirqan: “Israelpin kinsa wata más mana paramunqachu millay rey kasqaykirayku”, nispa. Jinan mana imapas wiñarqanchu runakunataq yarqaymanta karqanku. Chaymantan Diosqa Eliasta kacharqan Ajabwan rimananpaq. Jinan Ajabqa Eliasta nirqan: “Juchaykipin mana para kanchu”, nispa. Eliastaq kutichirqan: “Manan noqaq juchaypichu, aswanpas qanmi juchayoq kanki Baalta adorasqaykirayku. Runakunata, Baalpa profetankunatapas kamachiy Carmelo orqoman rinankupaq. Chaypin juj milagrota rikunkichis”, nispa.

Runakunaqa orqopin juñukurqanku, jinan Eliasqa nirqan: “Sichus Jehová cheqaq Dios chayqa payta serviychis, Baal kaqtintaq chayta serviychis. Kunanmi juj milagrota rikunkichis. Baalpa 450 profetankunan ofrendata preparaspa diosninkuta wajanqaku. Noqapas ofrendata preparaspan Jehová Diosta wajasaq. Ninawan kutichimuqmi cheqaq Diosqa kanqa”, nispa. Runakunataq “allinmi” nirqanku.

Jinan Baalpa profetankunaqa ofrendata preparaspa p’unchaynintin wajakurqanku: “¡Baal kutichimuwayku!”, nispa. Baalmi ichaqa mana kutichimurqanchu, Eliastaq burlakuspa nirqan: “Aswan kallpawan wajakuychis, puñushanpaschá, rijch’achinatapaschá necesitan”, nispa. Intipas chinkaykapusharqanñan Baalpa profetankunataq wajakushallarqanku, manataq pipas kutichimurqanchu.

Jinan Eliasqa altar pataman ofrendata churaspa unuta jich’arqan, jinaspa mañakurqan: “Jehová Diosníy, lliupas yachachunku cheqaq Dios kasqaykita”, nispa. Jinan Diospa kachaykamusqan ninaqa ofrendata rupharqan. Chaymi runakunaqa nirqanku: “¡Jehová Diosmi cheqaq Diosqa!”, nispa. Eliastaq nirqan: “Ama Baalpa juj profetanpas ayqechunchu”, nispa. Chay p’unchaymi 450 Baalpa profetankuna wañurqanku.

Chaymantan lamar-qocha patapi rijurirqan juch’uy phuyu, jinan Eliasqa Ajabta nirqan: “Sinchitan paramunqa, carretaykipi wasiykiman ripuy”, nispa. Jinan paramuyta qallarirqan. Chaywanmi ch’akiriy tiempo tukupurqan. Ajabqa carretanpin phawarqan. Diostaq Eliasta yanaparqan carretamantapas aswan usqhayta phawananpaq. Ichaqa, ¿chaypichu Eliaspa problemankuna tukukurqan? Qatimuqpi yachasun.