¡Viudaq wawan kausarin!

Ch’akiriy tiempopin Diosqa Eliasta nirqan: “Sarepta llaqtata riy, chaypin juj viuda mijunata qosunki”, nispa. Elías llaqtaman jaykushaqtinmi wajcha viuda llant’ata pallashasqa, jinan unuta mañakurqan. Unuta apamunanpaq rishaqtintaq juj chhikan t’antatawan mañakurqan. Viudataq nirqan: “Manan imaypas kanchu. Jak’uwan aceitellawanmi kashan, chayqa noqawan wawaywan mijunallaykupaqmi kashan”, nispa. Eliastaq nirqan: “Jehová Diosmi prometen t’antata jaywariwanki chayqa, manan aceiteykipas jak’uykipas tukukunqachu wajmanta paramunankama”, nispa.

Chaymi viudaqa wasinman rispa t’antata ruwarqan Jehová Diospa profetanpaq. Diospa prometesqanman jinan viudapaqpas wawanpaqpas mana aceitenpas jak’unpas tukukurqanchu ch’akiriy tiempo tukunankama.

Chay qhepamanmi viudaqa sinchi llakipi tarikurqan. Wawanmi sinchita onqospa wañupurqan, jinan mamanqa Eliasta valekurqan yanapananpaq. Eliastaq wawata marq’arikuspa altos patapi cuartoman aparqan. Camaman churaspataq mañakurqan: “Jehová Diosníy, kay wawata kausarichiy”, nispa. Chay wawata kausarichiyqa admirakunapaqmi karqan. ¿Imarayku? Chay tiempokamaqa manan pipas wañusqanmanta kausarirqanchu. Jinaspapas chay viudaqa manan Israel llaqtamantachu karqan.

Jinan wawaqa kausarirqan, Eliastaq viudata nirqan: “¡Qhawariy! ¡Wawaykin kausashan!”, nispa. Payqa anchata kusikuspan Eliasta nirqan: “Kunanqa yachanin cheqaq Diospa profetan kasqaykita. Rimasqaykiqa Jehová Diosmantan jamun, chaymi junt’akun”, nispa.