Jehová Dios Jehosafat-ta yanapan

Judá nacionmanta rey Jehosafatmi Baal diospa altarninkunata llapa idolokunatapas thunichirqan. Payqa Jehová Diospa leyninkunata yachanankutan munarqan. Chaymi umalliqkunata Leví runakunatawan kacharqan Judapi kaq llapa runakunaman yachachinankupaq.

Judá nacionpa muyuriqninpi tarikuq llaqtakunaqa repararqankun Diospa yanapasqanta. Jinan regalokunataraq Jehosafatman aparqanku. Moab, Anmón, Seír llaqtamanta runakunan ichaqa, juñukurqanku Judá nacionwan maqanakunankupaq. Jehosafatqa yacharqanmi Diospa yanapayninta necesitasqankuta. Chaymi Jerusalenpi qharikunata, warmikunata, wawakunatawan juñurqan. Paykunaq ñaupaqenpin mañakurqan: “Jehová Diosníy, qanpa yanapaynillaykiwanmi atipasaqku. Imachus ruwanaykuta niwayku”, nispa.

Diosqa uyarirqanmi mañakusqanta, jinan nirqan: “Ama manchakuychischu, noqan yanapasaykichis. Maypichus kanaykichisman riychis, chaypi sayaychis, jinan rikunkichis imayna salvasqayta”, nispa. ¿Imaynatan salvarqan?

Qhepantin p’unchaymi Jehosafatqa takiqkunata juñuspa soldadokunaq ñaupaqenta purichirqan. Jinaspa Jerusalén llaqtamanta rirqanku Tecoa ladoman.

Takiqkunaqa kusisqan Jehová Diosman alto kunkawan takirqanku. Chaykaman Diosqa llaqtanrayku maqanakurqan. Anmón runakunatan Moab runakunatawan locoyachirqan, jinan paykunapura maqanakurqanku. Llapallankun wañurqanku, ichaqa Judá nacionpi runakuna, soldadokuna, sacerdotekunapas manan wañurqankuchu. Jinan muyuriqninpi tarikuq nacionkuna yacharqanku Diosqa llaqtanta enemigonkunamanta salvasqanta. ¿Imaynatan Jehová Dios llaqtanta salvan? Imaymana formamantan, payqa manan necesitanchu runakunaq yanapanantaqa.