Jehová Diospa ejerciton

Siria nacionmanta rey Ben-Adajmi askha kutipi Israel nacionta phawaykuyta munarqan. Profeta Eliseon ichaqa Israelpi reyman willaq, jinan Israel soldadokunaqa ayqekuqku. Chaymi Ben-Adajqa soldadonkunata kacharqan Eliseota jap’imunankupaq. Payqa Dotán llaqtapin kasharqan.

Tutatan soldadokunaqa llaqtaman chayarqanku. Tutamantantaq Eliseoq yanapaqninqa rikurqan askha soldadokuna paykunata muyuykusqanta, jinan Eliseota nirqan: “Ay señorníy, imanaykusuntaq”, nispa. Jinan Eliseoqa nirqan: “Ama manchakuychu, noqanchiswanmi aswan askha kashanku”, nispa. Chay ratun Diosqa Eliseoq yanapaqninman rikuchirqan llapa orqokunaq muyuriqninpi caballokunayoq nina carretakunayoq ejercitota.

Siria soldadokuna Eliseota jap’iyta munaqtinkun, payqa Diosmanta mañakurqan: “Diosníy, kay soldadokunata ñausayachiy”, nispa. Jinan soldadokunaqa rikusharqankuña chaypas, mana reparakurqankuchu maypi kashasqankuta. Chaymi Eliseoqa nirqan: “Manan kaypichu tarikun maskhasqaykichis runaqa, payman pusasaykichis”, nispa. Jinan reypa tiyasqan Samaria llaqtaman pusarqan.

Eliseota jap’iyta munaq soldadokunaqa wañuy patapi kashaspañan reparakurqanku maypi kashasqankuta. Chaymi Israelmanta reyqa Eliseota tapurqan: “¿Wañuchisaqchu?”, nispa. Eliseon ichaqa nirqan: “Ama wañuchiychu, aswanpas mijuchispa kachapuy”, nispa. Jinan reyqa mijuchispa chay soldadokunata kachapurqan.