Jehoiadaqa mana manchakuqmi karqan

Jezabelpa jujnin wawanmi karqan Atalía, paypas maman jinan millay karqan. Payqa Judá nacionpi reywanmi casarakurqan. Qosan wañupuqtinmi wawan kamachiyta qallarirqan. Wawan wañupuqtintaq Ataliaqa payñataq kamachiyta qallarirqan. Jinaspa reypa familianmanta llapa qharikunata wañuchirqan, chhaynapi pipas reyna kasqanmanta mana orqonanpaq. Chaymi llapallanku payta manchakuqku.

Uma sacerdote Jehoiadapas esposanpas yacharqankun Ataliaq ruwasqanqa millay kasqanta. Jinan vidankuta peligropi churasparaq Ataliaq jujnin nietonta templopi pakaspa uywarqanku. Chay wawaq sutinmi karqan Jehoás.

Jehoás qanchis watanpi kashaqtinmi Jehoiadaqa umalliqkunata Leví runakunatapas templopi juñurqan. Kamachirqantaq ama pipas jaykumunanpaq, jinaspa Jehoaspa umanman coronata churarqan Judá nacionpi rey kananpaq. Jinan runakunaqa nirqanku: “Kausachun reyninchis”, nispa.

Ataliaqa uyarisqan runakunaq bulla ruwasqankuta, jinan temploman rispa reyta rikurqan, nirqantaq: “¡Noqa contran sayarinku!”, nispa. Umallikunataq payta jap’ispanku jawapi wañuchirqanku. Payqa mana allin ejemplon runakunapaq karqan. ¿Iman chay qhepaman pasarqan?

Jehoiadaqa Israel runakunatan yanaparqan Jehová Diosllata servinankupaq prometekunankupaq. Jinaspapas thunichirqanmi Baalpa templonta idolonkunatapas. Chaymantapas Jehová Diospa templonta allichanankupaqmi llank’aqkunata churarqan. Guardiakunatapas churarqanmi común runakuna ama jaykunankupaq. Chaymantataq Jehoasta palacionman aparqanku Judá nacionta kamachinanpaq. Wajmantan runakunaqa kusisqa tiyarqanku. Manañan Ataliapas idolokuna adoraypas karqanñachu. Jehoiadaqa mana manchakuqmi karqan ¿riki? Chhayna kasqanqa jujkunatan yanaparqan.