Idoloman mana k’umuykurqankuchu

Rey Nabucodonosormi qorimanta jatunkaray idolota ruwachirqan, jinan Dura llaqtapi churaspa wajachimurqan llaqta umallikunata, chaypin kasharqanku Sadrac, Mesac, Abednegopas. Jinan reyqa kamachirqan: “Waqraq, arpaq, qenaq tocasqanta uyarispan chay idoloman k’umuykunkichis. Mana k’umuykuqqa nina hornomanmi wijch’uykusqa kanqa”, nispa. Chay kinsantin waynakuna, ¿k’umuykurqankuchu chay idoloman, icha Jehová Diosllatachu adorankuman?

Tocanankupaq rey kamachiqtinmi llapallanku k’umuykurqanku. Sadrac, Mesac, Abednegon ichaqa mana k’umuykurqankuchu. Jujkunaqa rikusharqankun chayta, jinan reyman willarqanku: “Reyníy, chay judiokunaqa manan idolota adorankuchu”, nispa. Chaymi reyqa paykunata wajachimuspa nirqan: “Wajmanta oportunidadta qosaykichis k’umuykunaykichispaq, mana chayqa hornomanmi wijch’uykusqa kankichis. Manataqmi mayqen diospas salvasunkichischu”, nispa. Paykunataq nirqanku: “Diosniykuqa salvawankumanmi, manaña salvawaqtinkupas, manan chay idolomanqa k’umuykusaqkuchu”, nispa.

Jinan reyqa sinchita phiñakuspa kamachirqan qanchis kutikama hornota q’oñichinankupaq, nirqantaq: “Chay runakunata wataspa hornoman wijch’uykuychis”, nispa. Hornoqa sinchi ruphan kasharqan, chaymi judiokunata wijch’uykuq soldadokunaqa ninaq ruphasqan kaqpacha wañupurqanku. Nabucodonosorqa hornotan qhawaykurqan, jinan rikurqan tawa runakuna chaypi purishasqankuta. Jinan oficialninkunata nirqan: “Manachu kinsa runakunata wijch’uykurqanchis, hornopiqa tawa runatan rikushani, jujninqa angelchus jina”, nispa.

Jinan Nabucodonosorqa hornoq punkunman qayllaykuspa nirqan: “Ancha jatun Diospa kamachinkuna lloqsimuychis”, nispa. Llapankun admirakurqanku Sadracta, Mesacta, Abednegotapas hornomanta lloqsimusqankuta rikuspa. Manan p’achankupas chujchankupas ruphakusqachu, nitaq q’osñimanpas asnarisqakuchu.

Nabucodonosormi nirqan: “Sadracpa, Mesacpa, Abednegopa Diosninqa ancha jatun Diosmi. Chaymi angelninta kachamurqan kamachinkunata salvananpaq”, nispa.

Kinsantin waynakunaqa Jehová Diospaqmi junt’aq sonqo karqanku imaña kaqtinpas. Qanri, ¿paykuna jinachu kayta munanki?