Ester llaqtanta salvan

Esterqa Susa llaqtapin tiyarqan, chayqa Persia nacionpin tarikurqan. Askha watakuna ñaupaqtan rey Nabucodonosor Esterpa familianta Jerusalén llaqtamanta apapusqa. Estertaqa primon Mardoqueon uywarqan. Payqa rey Asueropaqmi llank’arqan.

Rey Asueron juj reinata munarqan. Jinan reyman pusamurqanku sumaq rijch’ayniyoq sipaskunata, chaymi Estertapas pusarqanku. Jinan reyqa Esterta ajllarqan reina kananpaq. Primon Mardoqueotaq Esterta kamachirqan judía kasqanta ama pimanpas willananpaq.

Amanmi llapa umalliqkunata umallirqan, payqa jatunchakuqmi karqan. Jinan llapa runakuna payman k’umuykunankuta munarqan. Mardoqueon ichaqa mana k’umuykuqchu. Jinan sinchita phiñakuspa wañuchiyta munarqan. Amanqa yacharusqan Mardoqueo judío kasqanta, jinan llapa judiokunata wañuchiyta munarqan. Chaypaqmi reyta nirqan: “Judío runakunaqa sinchi millaymi kanku, wañuchinanchismi”, nispa. Chaymi reyqa Amanman permisota qorqan juj leyta churananpaq. Chay leymi nirqan: “Adar killapi 13 p’unchaypin llapa judiokunata wañuchinkichis”, nispa. Jehová Diosmi ichaqa chayta rikumusharqan.

Esterqa manan yacharqanchu. Jinan Mardoqueoqa chay leymanta juj copiata apachispa nirqan: “Reywanmi rimanayki”, nispa. Estertaq nirqan: “Reypa mana invitasqan payman riqtaqa wañuchinkun. 30 p’unchayñan reyqa mana invitawanchu. Chaywanpas risaqmi, varanta jaywarimuqtinqa kausasaqmi, mana chayqa jinachá wañusaqpas”, nispa.

Esterqa jaykurqanmi reypa pationman, reytaq varanta jaywarimurqan. Chaymi Esterqa reyman qayllaykurqan, reymi tapurqan: “Ester, ¿imatan munashanki?”, nispa. Estertaq nirqan: “Qanwan Amanwan mijuna wayk’uchisqayman jamunaykichista munani”, nispa. Riqtinkutaq Esterqa juj kaq p’unchaypaqwan invitarqan. Chaypin reyqa tapullarqantaq: “¿Imatan munasharqanki?”, nispa. Estertaq nirqan: “Reyníy, juj runan noqatapas llaqtaytapas wañuchiyta munawanku, salvawayku”, nispa. Jinan reyqa nirqan: “¡¿Pitaq wañuchiytari munasunkichis?!”, nispa. Estertaq nirqan: “Kay millay Amanmi”, nispa. Jinan reyqa kaqpacha kamachirqan Amanta wañuchinankupaq.

Amanpa churachisqan leytaqa manan reypas chinkachiyta atirqanchu. Chaymi reyqa Mardoqueota churarqan umalliqkunata umallinanpaq, jinaspa permisota qorqan mosoq leyta churananpaq. Chay leymi nirqan: “Judiokunaqa atinkun defiendekuyta atacasqa kaqtinku”, nispa. Jinan adar killa 13 p’unchaypi judiokunaqa enemigonkuta atiparqanku. Chaymi judiokunaqa sapa wata chay p’unchayta festejanku.