Jerusalenta muyuriq perqakuna

Chhikanta ñaupa tiempoman kutirisun. Israel llaqtamanta Nehemiasmi Susa llaqtapi tiyarqan. Payqa rey Artajerjestan servirqan. Juj p’unchaymi Nehemiaspa wayqenqa Judá nacionmanta jamuspa willarqan: “Jerusalenman kutipuqkunaqa peligropin tarikushanku. Llaqtanchista muyuriq perqakunapas punkunkunapas thunisqallan kashan”, nispa. Jinan Nehemiasqa sinchita llakikurqan. Payqa munarqanmi Jerusalenman riyta, chaymi Nehemiasqa Diosta valekurqan rey permisota qonanpaq.

Chay qhepamanmi reyqa repararqan Nehemías llakisqa kasqanta. Jinan nirqan: “Manan jayk’aqpas llakisqata rikurqaykichu. ¿Iman pasarun?”, nispa. Nehemiastaq nirqan: “Jerusalén llaqtaymi thunisqa kashan”, nispa. Reytaq tapurqan: “¿Imaynatan yanapaykiman?”, nispa. Sonqollanpi Diosmanta mañakuspan Nehemiasqa nirqan: “Jerusalentan riyta munani perqankunata wajmanta jatarichinaypaq”, nispa. Jinan reyqa permisota qorqan, viajepi mana pipas jark’ananpaqtaq yanaparqan. Jinaspapas Judá nacionpi kamachikuq kananpaqmi nombrarqan, maderatapas qorqanmi llaqtaq punkunkunata ruwananpaq.

Jerusalenman chayaqtinmi Nehemiasqa llaqta muyuriq perqakunata qhawamurqan. Jinaspa sacerdotekunata umalliqkunatawan juñuspa nirqan: “Manan allinchu kashan, llank’ananchismi kanqa”, nispa. Chaymi paykunaqa “arí” nirqanku, jinan sayarichiyta qallarirqanku.

Chaytan wakin enemigonkuna yacharusqaku, jinan burlakuspa nirqanku: “Jatarichisqaykichis perqataqa atoqllan seqaruspa thunirunman”, nispa. Paykunan ichaqa mana kasuspa llank’ashallarqanku. Jinan llaqtata muyuriq perqaqa allintaña sayasharqan altopiñataq rikukurqan.

Jinan enemigonkunaqa rimanakurqanku Jerusalén llaqtata qonqaylla atacanankupaq. Chayta yacharuspan judiokunaqa mancharikurqanku. Nehemiasmi ichaqa nirqan: “Ama manchakuychischu. Diosmi noqanchiswan kashan”, nispa. Jinaspa guardiakunata churarqan llank’aqkunata cuidanankupaq. Chaymi enemigonkuqa mana atacayta atirqankuchu.

Llaqta muyuriq perqatapas punkunkunatapas 52 p’unchayllapin ruwayta tukurqanku. Jinan Nehemiasqa chayta festejanankupaq Leví runakunata juñumurqan. Jinaspa iskay t’aqapi takiqkunata juñurqan. Juj t’aqan Esdraswan rirqan, juj kaq t’aqataq Nehemiaswan rirqan. Unu Pujyu Punkuq gradasninta wicharqanku, jinaspa sapanka t’aqa llaqtaq perqanta muyurimurqanku. Temploman chayanankukaman cornetata, arpata tocaspa, Jehová Diosman takispa ima rirqanku. Llapa qharikuna, warmikuna, wawakunapas Jehová Diosmanmi sacrificiokunata jaywarqanku. Kusisqan kasharqanku, chaymi takisqankupas karumanraq uyarikurqan.