Jesuspa kausarimpusqan

José sutiyoq qhapaq runan Jesuspa cuerponta k’aspimanta urayachinanpaq Pilatomanta permisota mañakamurqan. Jinan Jesuspa cuerponta sumaq q’apaq aceitekunawan jawirqan, lino telawan k’uyuspataq chayllaraq ruwasqa sepulturaman churachimurqan, jatun rumiwantaq wisq’achimurqan. Sacerdotekunan Pilatota nirqanku: “Discipulonkunan Jesuspa cuerponta suwaruspa ninkuman: Jesusqa kausaripunmi”, nispa. Chaymi Pilatoqa nirqan: “Allinta sepulturaq punkunta seguramuspa guardiakunata churamuychis”, nispa.

Kinsa p’unchaymantan warmikuna tutamantanta sepulturaman rirqanku, jinan sepulturaq punkunta kichasqata tarirqanku. Jinaspa ukhuman jaykuqtinku juj ángel paykunata nirqan: “Ama manchakuychischu Jesusqa kausarimpunmi, discipulonkunaman willamuychis Galileata rinankupaq chaypi paywan tupamunankupaq”, nispa.

María Magdalenaqa Pedrota Juantawan tarispa nirqan: “Jesuspa cuerpontan aparapusqaku”, nispa. Jinan paykunapas sepulturata qhawaq rirqanku. Ch’usaq kasqanta rikuspataq wasinkuman kutipurqanku.

Mariapas sepulturamanmi kutirqan. Chaypin rikurqan iskay angelkunata jinan tapurqan: “Maymanchá Señorniyta aparunkupas”, nispa. Jinan rikurqan juj runata, jardinero kananpaq piensaspataq nirqan: “Señor, willaway mayman apasqankuta”, nispa. Paytaq nirqan: “María”, nispa. Jesús kasqanta reparaspataq “¡yachachikuq!” nispa nirqan, jinaspa abrazaykurqan. Jesustaq nirqan: “Wayqeykunaman willamuy rikuwasqaykita”, nispa. Jinan Mariaqa discipulokunaman willamurqan Jesusta rikumusqanta.

Chay p’unchaypin iskay discipulokuna Jerusalenmanta Emaús llaqtaman risharqanku. Jinan ñanpi juj runa puriysikuspa tapurqan imamantachus rimasqankuta. Paykunataq nirqanku: “¿Manachu yachanki? Kinsa p’unchayña karun Jesusta wañuchisqankumanta. Kunantaq wakin warmikuna nishanku: Jesusqa kausarimpunmi”, nispa. Chay runataq nirqan: “¿Manachu profetakunaq nisqanta creenkichis? Paykunaqa willarqankuñan Cristoq wañunanmanta kausarinanmantapas”, nispa. Astawantaq yachachirqan. Emausman chayaqtinkun discipulokunaqa nirqanku paykunawan qhepakunanpaq. Ichaqa cenanankupaq mañakusqanta uyarispan repararqanku Jesús kasqanta, jinan payqa chinkaripurqan.

Chay discipulokunaqa usqhayllan Jerusalenman kutirqanku apostolkunaq juñukusqanku wasiman, jinaspa willarqanku imachus pasasqanta. Chay ukhupi wisq’asqa kashaqtinkun Jesusqa ñaupankupi rijurirqan. Qallariypiqa manan creerqankuchu Jesús kasqanta. Chaymi Jesús nirqan: “Makiykunata qhawariychis, llamiwaychis. Qelqasqan kasharqan Cristoq kausarimpunanqa”, nispa.