¿Imaraykun Jesuspa sutinpi mañakunanchis?

JESUSQA allintan apostolninkunaman yachachirqan Diosmanta imayna mañakuyta. Chay tiempopi religionpi umallikunaqa “jatun calle esquinakunapi sayaykuspan” Diosmanta mañakuqku. ¿Imaraykun chhaynata mañakuqku? “Runakunaq rikusqan kanankurayku” otaq runakuna jatunchanankurayku. Paykunaqa unaytan mañakuqku kaq simikunallatataqmi yapa-yapamanta rimaqku, paykunaqa piensaqkun “askhata rimaspa” Dioswan uyarichikuyta (Mateo 6:5-8). Jesusqa manan allinpaqchu chhayna mañakusqankuta qhawarirqan, chaykunata rikuspan Jesusqa apostolninkunaman sut’ita yachachirqan Diosmanta imayna mañakuyta. Chaymantapas Jesusqa willarqanmi imakunamanta mañakunanchis kasqantapas.

Mañakuspaqa sut’itan rikuchinanchis Diospa sutin jatunchasqa kananpaq munasqanchista, gobiernon jamunanpaq munasqanchistapas, kay pachapi paypa munaynin ruwakunanpaq munasqanchistapas. Imatas noqanchispas yanapawananchista munanchis chaytapas mañakusunmanmi (Mateo 6:9-13; Lucas 11:2-4). Chaymantapas Jesusqa ejemplokunawanmi allinta entiendechirqan Jehová Dios mañakusqanchista uyariwananchispaqqa, allin iñiywan, juch’uyaykukuywan Diosmanta mañakunanchispaq (Lucas 11:5-13; 18:1-14). Jesusqa yachachisqanman jinan pay kikinpuni chhaynata Diosninchismantaqa mañakurqan (Mateo 14:23; Marcos 1:35).

Mañakuymanta Jesuspa yachachisqanqa may allinpunin karqan, chaywanmi discipulonkunaqa mana iskayaspa tukuy sonqo Diosmanta mañakurqanku. Ichaqa wañupunanpaq tutan Jesusqa, apostolninkunaman juj mosoq willakuyta mañakuymanta willarqan.

“Mañakuymanta juj mosoq yachachikuy”

Wañupunanpaq tutaqa yaqa illarimunankaman Jesusqa apostolninkunata kallpachasharqan. Chaypin Jesusqa paykunaman willarqan mañakuymanta juj mosoq yachachikuyta. Nirqanmi: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa. Nillarqantaqmi kay sumaq promesata: “Imatapas sutiypi mañakuqtiykichisqa noqan ruwapusaykichis, chhaynapi Yayaqa Churirayku jatunchasqa kananpaq”, nispa. Rimayta tukunanpaqtaq kayta nirqan: “Qankunaqa manan imatapas sutiypiqa mañakunkichisraqchu ¿riki? Mañakuychis, chaskinkichismi, chhaynapi ancha kusisqa kanaykichispaq”, nispa (Juan 14:6, 13, 14; 16:24).

¡Jesuspa chay willasqanqa ancha allinpunin karqan! Bibliamanta juj diccionarion nin: “Mañakuymanta juj mosoq yachachikuymi karqan”, nispa. Ichaqa chaywanqa manan Jesusqa nisharqanchu: “Amaña Diosmantaqa mañakunkichischu, aswanpas noqamanta mañakamuwankichis” nispachu. Aswanpas payqa juj ñan jinan karqan mañakuspa Diosman achhuykunanchispaq.

Jehová Diosqa uyarinmi serviqninkunaq mañakusqantaqa, chaytaqa ñaupaqmantapachan ruwarqan (1 Samuel 1:9-19; Salmos 65:2). Chaymantan ichaqa Israel llaqtata ajllarqan payta adoranankupaq, chaymi pipas payman mañakuyta munaspaqa Israel llaqtata rinan karqan. Rey Salomonpa tiemponpipas chhaynan karqan, sacrificiokunata jaywanankupaqqa Jehová Diosta adorasqanku templotan rinanku karqan (Deuteronomio 9:29; 2 Crónicas 6:32, 33). Ichaqa chaykuna ruwayqa juj tiempollan kanan karqan. Apóstol Pabloq willasqan jina, kamachikuy simiqa “imakunachus jamunan karqan chaykunaq llanthullanmi karqan” (Hebreos 10:1, 2). Chay llanthuqa Jesucriston karqan (Colosenses 2:17). Chaymi 33 watamantapacha Jesuspi iñiqkunaqa manaña kamachikuy simiman jinañachu kasukurqanku. Aswanpas Jesucristo imatas yachachirqan chayman jinan kasukurqanku chhaynapi Jehová Dioswan amigontin kanankupaq (Juan 15:14-16; Gálatas 3:24, 25).

“Lliu sutimantapas aswan allin sutitan qorqan”

Imaynan juj reqsisqanchis amigo yanapawasunman atiyniyoq autoridadwan rimananchispaq chay jinatan Jesuspas yanapawanchis Jehová Dios mañakusqanchista uyariwananchispaq kutichimuwananchispaqpas. ¿Imaraykun Jesús chay ruwayta atin?

Llapa runakunan juchallikuq kanchis chayraykun mana atinchischu Diosman achhuykuyta, manataqmi ima sacrificio ruwasqanchispas chay juchamantaqa librawasunmanchu (Romanos 3:20, 24; Hebreos 1:3, 4). Jesusmi ichaqa vidanta sacrificaspa chay juchamanta limpiawarqanchis (Romanos 5:12, 18, 19). Chhaynaqa Jehová Diosman mana manchakuspa achhuykunanchispaqqa, Jesuspa sacrificionpin iñinanchis paypa sutinpitaqmi mañakuspa achhuykunanchis (Efesios 3:11, 12).

Jesuspa sutinpi Diosmanta mañakunchis chayqa, Jesuspi iñisqanchistan rikuchishanchis. Payqa Diospa munaynin junt’akunanpaqmi imaymana ruwaypi nombrasqa kashan: 1) Jesusqa “Diospa corderonmi” paymi sacrificakurqan juchamanta limpiasqa kananchispaq 2) Chaymantapas Jesusqa “uma sacerdotenchismi” paymi yanapawanchis juchanchismanta pampachasqa kananchispaq 3) Chaymantapas “juj ñan” jinan mañakuspa Diosman achhuykunanchispaq (Juan 1:29; 14:6; Hebreos 4:14, 15).

Chaymantapas Jesuspa sutinpi mañakunchis chayqa payta respetasqanchistan rikuchishanchis. Jehová Diosqa munanmi wawan Jesusta respetananchista. Chaymi Bibliapi khaynata qelqachirqan: “Jesuspa sutinman qonqorikunankupaq, payqa Dios Yaya jatunchasqa kananpaq Señor kasqanta lliu runa rimarinanpaqwan”, nispa (Filipenses 2:10, 11, willakuy). Chhaynaqa Jesuspa sutinpi Diosmanta mañakunchis chayqa Jehová Diostan jatunchashanchis, paymi wawantaqa kachamurqan noqanchisrayku vidanta sacrificananpaq (Juan 3:16).

Bibliapin willawashanchis Jesús imakuna ruwananpaqsi encargasqa kashan chaykunata. Chaykunamanta yachaspaqa sut’itan reparasunchis Jesús noqanchisrayku allinkunata ruwasqanraykun imaymana bendicionkuna chaskisqanchista. (Astawan yachanaykipaq kay recuadrota qhaway: “¿Imakuna ruwananpaqmi Jesús nombrasqa kashan” nisqata” ). Jehová Diosqa allin puestotan qorqan wawan Jesusmanqa sumaq sonqo kayninpitaq “lliu sutimantapas aswan allin sutita qorqan” otaq tukuy atiyta qorqan janaq pachapipas kay pachapipas (Filipenses 2:9; Mateo 28:18).

Jesuspa sutinpiqa manan jawa sonqollachu mañakunanchis

Kaypi qhawarimusqanchis jina Dios mañakusqanchista uyarimunanpaqqa, Jesuspa sutinpin mañakunanchis (Juan 14:13, 14). Ichaqa Jesuspa sutinpi mañakusqanchistaqa sonqomantan ninanchis manan jawa sonqollachu. ¿Imarayku?

Chayta entiendenanchispaq kay ejemplota churasunchis. Imata rantisqanchismantapas wakin vendeq runakunaqa “gracias rantiwasqaykimanta” nispan ninku. Chaytaqa ninku manan sonqomantapuni agradecesqa kasqankuraykuchu, aswanpas chhaynatapuni lliupas nisqankuraykun. Jesuspa sutinpi Diosmanta mañakuspaqa manan vendeq runakuna jinachu jawa sonqolla ninanchis, aswanpas sonqomantapunin ninanchis. Bibliapin nishan: “Diosmantaqa mañakushallaychispuni”, nispa. Ichaqa “tukuy sonqon waqyakunanchis” manan jawa sonqollachu (1 Tesalonicenses 5:17; Salmos 119:145).

¿Iman yanapawasuman Jesuspa sutinpi tukuy sonqowan Diosmanta mañakunanchispaq? Chaypaqqa astawanmi Jesús imayna kasqanta yachananchis. Chaymantapas piensananchismi imakunatas Jesús noqanchisrayku ruwarqan, imakunatas kunanpas noqanchispaq ruwashan chaykunapi. Diosman mañakuspataq chaykunamanta gracias ninanchis. Chaykunata ruwasun chayqa manan iskayasunchu Jesuspa kay nisqanmanta, paymi nirqan: “Yayamanta sutiypi imatapas mañakuqtiykichisqa qosunkichismi payqa”, nispa (Juan 16:23).