Jehová Diosta sonqomanta kasukusun

“Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu.” (1 JUAN 5:3.)

1, 2. a) ¿Imanaqtinmi runakuna mana pitapas kasukuyta munankuchu? b) ¿Munayninkuman hinapunichu mana kasukuq runakuna imatapas ruwanku?

KUNAN tiempo runakunaqa manan pitapas kasuyta munankuchu. Sapa kutillanmi uyarinchis niqta: “Ñoqaqa munasqayman hinapuni imatapas ruwani, manan pipas ñoqataqa niwanmanchu ima ruwanaytaqa”, nispa. Chayta niqkuna, ¿munayninkuman hinapunichu imatapas ruwanku? Manan. Aswanmi yaqa llapanku ‘runakunaq imaynatachus kawsashasqanta hinalla kawsanku’ (Rom. 12:2). Munayninkuman hina imatapas ruwanankumantaqa ‘qhelli kawsaymanmi watasqa kashanku’ (2 Ped. 2:19). Paykunaqa ‘kay pachaq purisqantan qatikunku, wayrapi atiyniyoq espirituq kamachikusqanta kasukuspa’, chay espirituqa Satanasmi (Efe. 2:2).

² Askha librokunata qelqaq abogadon niran: “Ñoqataqa manan tayta mamaypas, sacerdotekunapas, religionkunata umalliqkunapas, ni Bibliapas niwanmanchu imayna kawsanaytaqa”, nispa. Wakin runakunaqa atiyniyoq kaspanku runamasinkuta sarunchanku, chaymi chay runakunaqa mana kasunapaq hina kankuman. Ichaqa, ¿chayraykuchu manaña pitapas kasusunman? Periodicokuna, televisión, radiopas willankun askha runakuna imaymana llakikuykunapi tarikusqankuta, ¿imarayku chhaynapi tarikunku? Mana kasukuq kasqankurayku. Sasa tiempopi kawsasqanchisraykun runakunaqa astawan necesitanku imatapas ruwanankupaq pipas yacharichinanta, ichaqa yaqa llapankun mana pitapas uyarikuyta munankuchu.

¿Kasukuqchu kanchis cristianokuna?

3. Ñawpaq tiempomanta cristianokunaqa manan runakunaq lliw kamachisqantachu kasuranku, ¿imaynapin chayta yachanchis?

³ Diosta mana serviq runakunamantaqa cristianokunaqa kasukuqmi kanchis. Ichaqa manan lliw kamachikuytachu ch’inlla kasukunchis. Ñawpaq tiempopi cristianokunapas manan llapantachu kamachikuqkunaq nisqantaqa kasuranku. Huk kutinmi uma sacerdote judío religionpi umallikunapas apostolkunata kamachiranku: ‘Amaña predicaychischu’, nispa, paykunan ichaqa mana kasurankuchu. Apostolkunaqa allintan yacharanku Diosta ñawpaqta kasukunankuta, mana runakunatachu (leeychis Hechos 5:27-29).

4. Sasachakuykunapiña tarikunankuta yachaspapas, ¿imatan Diosta serviqkuna ruwaranku?

⁴ Manaraq Jesús kay pachaman hamushaqtinpas, Diosta serviqkunaqa apostolkuna hinan Diosta ñawpaqta kasukuranku. Hukninmi karan Moisés. Payqa “mana[n] munarqanchu Egipto rey Faraonpa ususinpa wawan nisqa kayta, aswanmi Diospa llaqtanwan kuska muchuchisqa kayta yuyaykurqan” “reypa phiñakusqanta mana manchaspa” (Heb. 11:24, 25, 27). Josepas Potifarpa warmin askha kutipi “ñoqawan puñuy” nisqantaqa manan kasuranchu yacharanña vengakunanta chaypas (Gén. 39:7-9). Danielpas reypa mikhunanwan vinonwan mana qhellichakuyta munaspan oficialkunaq umallinta valekuran ama chay mikhunakunata qonanpaq. Oficialkunaq umallin manaña usqhayllachu Danielpa valekusqanta kasuran chaypas, Danielqa allintan “yuyaykukurqan reypa mikhunanwanpas vinonwanpas mana qhellichakunanpaq” (Dan. 1:8-14). Qhawasqanchispas hina, Diosta serviqkunaqa paypa munaynintan ruwaranku yacharankuña sasachakuypi tarikunankuta chaypas. Paykunaqa manan runakunawan allinpi kanankuraykuchu Diospa kamachisqanta qonqaspa runakunaq tukuy kamachisqanta kasuranku. Ñoqanchispas paykuna hinan Diosta servinanchis.

5. ¿Imanaqtinmi mayninpi mana kasunchischu runakunaq kamachisqanta?

⁵ ¿Imanaqtintaq cristianokunari mayninpi mana kasunchischu runakunaq kamachisqanta? Chaytaqa ruwanchis manan k’ulluchakuspachu nitaq runakuna hina llaqta kamachikuqkuna contra hatariyta munaspachu, aswanpas Jehová Diospa kamachisqanta ñawpaqta kasukuyta munaspanchismi. Chayrayku, imatapas runakuna Diospa kamachisqan contranpi kamachiwaqtinchisqa, apostolkuna hina ñawpaqta Diosta kasukunchis, mana runakunatachu.

6. ¿Imanaqtinmi Diospa kamachikuyninkunata kasukunanchispuni?

⁶ Jehová Diospa kamachisqanta sonqomanta kasukunapaqqa Proverbios 3:5, 6 textoq nisqantan yuyarinanchis, chaypin nin: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu. Tukuy ruwasqaykikunapi Señor Diosta yuyariy, paymi cheqan ñanninta pusasunki”, nispa. Kay textoq nisqan hina, Diospa kamachisqanta kasukuyqa allinninchispaqpunin (leeychis Deuteronomio 10:12, 13). Jehová Diosmi llaqtanta niran: “Ñoqan allinniykipaq yachachiyki, ñoqan purinayki ñantapas pusayki. Kamachikuyniykunallata uyariwaq karqan, thak-kayniykiqa mayu hinan hunt’a kanman karqan, chanin-kayniykipas lamar-qochaq phoqchiqesqan hinaraqmi kanman karqan”, nispa (Isa. 48:17, 18). Cristianokunaqa yachanchismi Jehová Diospa chay nisqan cheqaq kasqanta. Diospa kamachikuyninkuna kasukuyqa allinninchispaqpunin.

7. Mayninpiqa manan entiendenchischu Diospa wakin kamachikuyninkunata, ¿chaywanpas imatan ruwananchis?

⁷ Cristianokunaqa sonqomantan Diosta kasukunchis mayninpi manaña wakin kamachisqanta entiendenchischu chaypas. Chayta ruwaspaqa manan mana yuyayniyoq hinachu Diosta kasushanchis, aswanpas tukuy sonqon payman hap’ipakushanchis, yachanchismi Jehová Diosqa allinninchispaqpuni imatapas kamachiwasqanchista. Chaymantapas Diosta kasuspaqa paytan munakushanchis. Apóstol Juanmi niran: “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu”, nispa (1 Juan 5:3). ¿Iman yanapawallasunmantaq tukuy sonqowan Diosta kasukunapaq?

‘Allinkaqta mana allinkaqta reparasun’

8. Sichus ‘allinkaqta mana allinkaqtapas reparasun’ chayqa, ¿imaynatan Diosta kasukusun?

⁸ Biblian niwanchis: ‘Yuyayniykichispi allinkaqta mana allinkaqta reparaychis’, nispa (Heb. 5:14). Diospa kamachikuyninkunataqa manan kasuyllachu kasunanchis, aswanpas ‘allinkaqta mana allinkaqta’ reparaspan kasukunanchis, chayta reparanapaqqa Bibliawanmi yanapachikunanchis. Diospa kamachikuyninkuna allinninchispaq kasqanta qhawarisun chayqa, Salmo takita qelqaq hina nisunchis: “Yachachikuy simiykitan [otaq kamachikuyniykitan] sonqoy ukhupi hap’ini”, nispa (Sal. 40:8).

9. ¿Imatan ruwasunman Dios hina yuyaykunanchispaq? ¿Imanaqtinmi pay hina yuyaykunanchis?

⁹ Salmo takita qelqaq hina sonqonchis ukhupi Diospa kamachiyninta hap’inapaqqa yuyaymanananchismi Biblia leesqanchispi. Qhawarisunchis imaynata chayta ruwasunman. Bibliata leeshaspa Diospa huk kamachikuyninta tarirusunman chayqa, kaykunatan tapukusunman: “¿Imanaqtinmi allinpuni chay kamachikuy? ¿Chayta kasukuqtiy imapin yanapawanman? ¿Chay kamachikuyta mana kasukuqkuna ima sasachakuykunapin rikukunkuman?”, nispa. Kaykunata tapukuspa yuyaymanasunchis chayqa Dios hina yuyaykusunchis, hinaspa paypa munasqanman hina imatapas ruwasunchis. Chhaynapin “imachus Señorpa munaynin kasqanta allintapuni [reparashallasun]” kasukunanchispaq (Efe. 5:17). Ichaqa kasukuyqa sasan kanman. Yachasunchis imanaqtin.

Satanasqa imaymanatan ruwan Diosta mana kasunanchispaq

10. ¿Imaynatan Satanás Diospa kamachikuyninkunata mana allinpaq qhawarichin?

¹⁰ Satanasqa munayllanmanmi imatapas ruwan, chaymi unayña runakunata kallpachashan pay hina kanankupaq, Diospa kamachikuyninkunatapas mana allinpaq qhawarinankupaq. ¿Imaynatan chayta ruwan? Qhawarisunchis hukta: Diospa qallarichisqan casado kawsayta mana allinpaq qhawarichin. Kay tiempopiqa askha runakunan mana casarakuspa tiyanku, wakintaq imaymanata ruwanku t’aqanakunankupaq. Paykunaqa huk allin reqsisqa warmi hinapaschá yuyaykunkuman, chay warmin niran: “Manan pipas hukllawanqa tiyayta atinmanchu. Manan pitapas reqsinichu qosanta otaq warminta mana wasanchaqtaqa, llapankupas wasanchayllatan munanku”, nispa. Huk allin reqsisqa runapas huk warmikunawan pantasqanmanta rimaspan niran: “Manachus hina runaqa esposallanwan otaq qosallanwan wañunankama tiyananpaqchu ruwasqa karan”, nispa. Chaykunata uyarispaqa kaykunatan tapukunanchis: “¿Allinpaqchu qhawarini casadokunapaq Dios kamachisqanta? ¿Icha Diosta mana serviq runakuna hinachu casado kawsayta qhawarini?”, nispa.

11, 12. a) ¿Imanaqtinmi wakin wayna sipaskunapaq sasa kanman Jehová Dios kasukuy? b) ¿Iman Sharonta sucederan? ¿Imatan chaymanta yachanchis?

¹¹ Cristiano wayna sipaskuna, qankunatan Satanasqa astawan urmachiyta munan. Payqa manan munanchu Jehová Diosta kasukunaykita. Chayrayku ‘wayna-kaypa waqllisqa munapayayninkunawan’ urmachiyta munasunki. Mana Diosta serviq wayna sipaskunawanpas creechisukimanmi Diospa kamachikuyninkuna hunt’ay sinchi sasa kasqanta (2 Tim. 2:22). Ama chaykunataqa kasuychu. Aswanpas allinta reparay Diospa kamachikuyninkuna allinniykipaq kasqanta. Qhawarisunchis imaynatan chayta ruwasunman. Biblian niwanchis: “Qhelli huchapi puriymanta ayqeychis”, nispa (1 Cor. 6:18). Kaykunatan tapukusunman: “¿Imanaqtinmi allinpuni chay kamachikuy? Kasukusaq chayqa, ¿imakunapin allinniypaq kanqa?” nispa. Reqsinkipaschá wakin cristianokunata chay kamachikuyta mana kasukusqankurayku sinchi llakikuykunapi kashaqta. Wakinqa manañapaschá Diospa llaqtanpiñachu kashanku. ¿Aswan kusisqachu kunan paykuna kanku? ¿Aswan allintachu Diosta mana servispa kawsashanku? ¿Diosta serviqkunamantaqa astawanchu kunan yacharunku kusisqa kawsanapaq ima ruwanata? (Leeychis Isaías 65:14.)

¹² Pananchis Sharonmanta kunan yachasun, paymi qaynalla kayta qelqaran: “Jehová Diosta mana kasukusqayraykun mana hanpiy atina sida onqoyniyoq kashani. Yuyarillanipunin ñawpaq watakunapi tukuy sonqowan Jehová Diosta servispa kusisqa kawsasqayta”, nispa. Sharonqa nillarantaqmi: “Mana yuyayniyoq hinan Jehová Diosta mana kasukuranichu, ¡ay, kasukullayman karan Diospa kamachikuyninkunata!” nispa. Diospa kamachikuyninkunata kasukusun chayqa, manan chhayna llakikuykunapichu tarikusun. Sharonqa qanchis semanallatawanñan chayta qelqasqanmantaqa kawsaran. ¿Imatan chaymanta yachasunman? Satanasqa manan ima allintapas ruwanmanchu paypa munayninman hina kawsaqkunapaqqa. Payqa imaymanatan prometen, ichaqa ‘llullakunaq taytantaq’ chayqa, manan ni huk promesallantapas hunt’anchu, Evaman prometesqantapas manan hunt’aranchu (Juan 8:44). Rikusqanchispas hina, Jehová Diosta kasukuyllan allinninchispaqqa.

Ama munaynillanchistachu ruwayta munasun

13. ¿Imanaqtinmi mana munayllanchisman hinachu imatapas ruwayta munananchis?

¹³ Jehová Diospa kamachikuyninkunata kasunapaqqa manan munasqanchisman hinallachu imatapas ruwayta munananchis. Chayrayku mana hatunchakuqchu kananchis, hatunchakuq kaspaqa manan pitapas uyarikuyta munasunchu, Diospa churasqan umalliqkunatapas manan kasusunmanchu. Ichaqa manan kayta qonqananchischu: Jehová Diosmi allin yuyayniyoq hunt’aq kamachita churaran llaqtanman ‘tiempollanpi mikhunata qonanpaq’ (Mat. 24:45-47). Chayraykun sonqomanta paykunata kasukunanchis, paykunawanmi Diosqa llaqtanta qhawarishan. Jesuspa hunt’aq apostolninkuna hinan kananchis. Huk kutinmi Jesuspa wakin qatikuqninkuna paypaq phiñakuspa manaña payta qatikurankuchu aswanpas qhepamanmi kutipuranku, chaymi Jesusqa apostolninkunata tapuran: “¿Qankunapas kutipuytachu munankichis? nispa. Chaymi Simón Pedroqa nirqan: Señor, ¿pimantaq risaqku? Qanpa rimasqaykikunaqa wiñay kawsay simikunan [...], nispa” (Juan 6:66-68).

14, 15. ¿Imanaqtinmi k’umuykukuspa kasukunanchis Bibliawan yuyaychawaqninchiskunata?

¹⁴ Jehová Diospa kamachikuyninkunata kasunapaqqa Bibliawan yuyaychawaqninchiskunatan kasukunallanchistaq. Allin yuyayniyoq hunt’aq kamachiqa sapa kutillanmi niwanchis: ‘Rikch’ashallaychis, allin yuyayniykichispitaq kaychis’, nispa (1 Tes. 5:6). Chay niwasqanchisqa allinpunin kay tukukuy p’unchaykunapaqqa, kay tiempo runakunaqa “paykuna kikinkuta munakuqkuna, qolqe sonqokuna” iman kanku (2 Tim. 3:1, 2). Mana rikch’asqalla kashasunchis chayqa, paykuna hinan kasunman. Sichus Dios serviyniyninchista qonqaspa imaymanata ruwayta munashanchis chayqa, Diosmantan karunchakapusunman, ratullataq qolqe sonqomanpas tukupusunman (Luc. 12:16-21). Chaykuna mana sucedewananchispaqqa Diospa kamachikuyninkunatan kasukunanchis, manataq mana Diosta serviq runakuna hinachu kawsananchis allinnillanchista maskhaspa (1 Juan 2:16).

¹⁵ Allin yuyayniyoq hunt’aq kamachiqa umalliqninchiskunawanmi Diospa yachachiyninkunata yachachiwanchis. Biblian niwanchis: “Umalliykichiskunata uyariychis, paykunata kasuychis, paykunaqa qankunatan michishallasunkichispuni, qankunamanta Diosman cuenta qonayoq kasqankuta yachaspa. Paykunata kasuychis kusisqa llank’anankupaq, mana chayqa llakisqan kankuman, qankunapaqpas manan allinniykichispaqchu kanman”, nispa (Heb. 13:17). Chhaynaqa, ¿mana pantaqchu umalliqkuna kanku? Manan. Paykunapas mayninpiqa pantankun, Diosqa allintan yachan imakunapi pantasqankutaqa. Chaywanpas Diosqa munanmi paykuna kasunanchista. Pantaqña kanku chaypas umalliqninchiskunataqa kasunanchismi, chhaynapin Jehová Diosta kasukushanchis.

K’umuykukuq kayqa ancha allinpunin

16. Sichus Jesusta respetanchis chayqa, ¿imatan ruwasunchis?

¹⁶ Ama hayk’aqpas qonqasunchu, Jesusmi Diospa llaqtantaqa umallishan (Col. 1:18). Chayraykun umalliqkunataqa k’umuykukuspa kasukunanchis ‘allintataq rikunanchispas’ (1 Tes. 5:12, 13). Umalliqkunapas k’umuykukuqmi kanku, chaymi yuyaykusqankuman hinalla yachachinankumantaqa Diospa yachachikuyninkunata wayqe panakunaman yachachinku. ‘Diospa Simin Qelqaq nisqanmantaqa manan astawanqa yuyaykunkuchu’ (1 Cor. 4:6).

17. ¿Imanaqtinmi mana munananchischu hatunchasqa kayta?

¹⁷ Amapuni munasunchu hatunchasqa kaytaqa (Pro. 25:27). Ñawpaq tiempopin huk cristiano hatunchasqa kayta munaran, chaymi apóstol Juan paymanta niran: “Diotrefesmi paykuna ukhupi kamachikuq churakuspa mana chaskiyta munawankuchu. Chayraykun hamuspayqa, contraykupi llullakuspa yanqa rimasqanmanta anyasaq”, nispa (3 Juan 9, 10). ¿Imatan Diotrefesmanta yachanchis? Manapunin imaraykupas munananchischu hatunchasqa kaytaqa. Biblian niwanchis: “Uma hoqariqqa qhepamanmi waqllinqa, anchaykachaq sonqoqa qhepamanmi urmanqa”, nispa. Diosta kasukuqkunaqa kallpachakunankun mana hatunchakuq kanankupaq, mana chayqa p’enqaypin rikukunkuman (Pro. 11:2; 16:18).

18. ¿Imapin yuyaymanananchis Diospa kamachikuyninkunata kasukunapaq?

¹⁸ Tukuy atisqanchista ruwasun Diospa kamachikuyninkunata kasunapaq, amataq mana Dios serviq runakuna hinachu munasqanchisman hinalla imatapas ruwayta munasun. ¡May sumaqmi Jehová Diosta serviyqa! Sapa kutillanmi chaypiqa yuyaymanananchis. Diospa llaqtanpiqa kashanchis Jehová Dios santo espiritunwan pusamuwasqanchisraykun (Juan 6:44). Chay hinaqa, ancha allinpaq hap’isun Jehová Dioswan allinpi kasqanchista, kallpachakushallasun tukuy imapipas Jehová Diosta kasukunapaq, amataq munayllanchisman hinachu imatapas ruwasun.

¿Yuyarishankichu?

• Jehová Diosta kasukunchis chayqa, ¿pikunatan kasukunallanchistaq?

• ‘Allinkaqta mana allinkaqta reparaspaqa’, ¿imaynatan Jehová Diosta kasukusunchis?

• ¿Imaynatan Satanás Diospa kamachikuyninkunata mana allinpaq qhawarichin?

• Diosta kasukunapaq, ¿imaraykun k’umuykukuq kananchis?

[24 paginapi dibujo]

“Diostan ñawpaqtaqa kasunayku, manan runakunatachu”

[26 paginapi foto]

Diospa kamachikuyninkunata kasukuyllan ancha allinqa