Jesuspa yachachiyninkuna

Wañusqakunaqa kawsarimpunqakun

Jesusmi kawsarichiran kinsa wañusqakunata, chhaynapin rikuchiran wañusqakuna kawsarimpunankuta (Lucas 7:11-17; 8:49-56; Juan 11:1-45). Chayta allinta yachanapaqqa ñawpaqtan yachananchis imaraykuchus, hayk’aqmantapachachus runakuna wañusqanta.

¿Imaraykun runakuna onqonchis wañupunchis ima?

Jesús runakunaq huchanta pampachapuqtin otaq perdonapuqtinqa qhaliyapuqkupachan. Chaypaq huk such’u runawan ima ruwasqanmanta yachasun, chay runata payman apamuqtinkun niran: “¿Mayqentaq aswan atikuq: Huchaykikunatan pampachayki, niychu, icha: Sayarispa puririy, niytaqchu? Yachanaykichispaqpas Runaq Churinqa atiyniyoqmi kay pachapi huchakunata pampachananpaq”, nispa. Chaymantataq such’uta niran: “Sayariy, puñunaykita hoqarispa wasiykita ripuy”, nispa (Mateo 9:2-6). Chaypi Jesuspa nisqan hina, hucha hawan runakunaqa onqonchis wañunchispas. ¿Imaynapitaq huchari paqariran? Adanwanmi paqariran, paypa miraynin kasqanchisraykun llapa runakuna huchasapa kanchis (Lucas 3:38; Romanos 5:12).

¿Imaraykutaq Jesusri wañuran?

Jesusqa manan hayk’aqpas huchallikuranchu. Chhaynaqa, ¿imaraykutaq wañuranri? Payqa wañuran ñoqanchisraykun, chhaynapi huchanchis perdonasqa kananpaq. Pay kikinmi niran: “Yawarniy[qa] askha runaq huchankuna pampachasqa kananpaqmi hich’asqa kanqa”, nispa (Mateo 26:28).

Chaymantan nillarantaq: “Runaq Churinqa manan servichikunanpaqchu hamurqan, aswanpas servinanpaqmi, hinaspa askha runa kacharichisqa kananrayku wañunanpaq”, nispa (Mateo 20:28). Chaypi nisqan hina, Jesusqa wañusqanwanmi wañuymanta kacharichiwaranchis. Paymi nillarantaq: “Ñoqan ichaqa hamuni kawsanankupaq, t’ikarishaq kawsayniyoq kanankupaqwan”, nispa (Juan 10:10). Wañusqakuna kawsarimpunankumanta astawan yachanapaqqa allintan yachana imaynapichus tarikusqankumanta.

¿Imaynapitaq wañusqakunari kashanku?

Amigon Lázaro wañupuqtinmi Jesusqa willaran wañusqakuna imaynapi tarikusqankumanta. Qatikuqninkunatan niran: “Amigonchis Lazaron puñushan, payta rikch’arichimuqmi risaq”, nispa. Paykunataq yuyaykuranku puñuyllamanta rimasqanta. Chaymi Jesusqa paykunata sut’ita niran: “Lazaroqa wañupunmi”, nispa. Chaypi rikusqanchis hina Jesusqa puñuyllawanmi wañuytaqa tupachiran, chaymi rikuchiwanchis wañusqakunaqa puñusqa hinalla kashasqankuta (Juan 11:1-14).

Lázaro tawa p’unchayña wañusqa kashaqtinmi Jesusqa kawsarichiran. ¿Yuyarinmanchu karan Lázaro chay tawantin p’unchaymanta imatapas? Manan, Bibliaqa manan imatapas willanchu imaynapi tarikusqanmantaqa. ¿Imarayku? Bibliaq nisqan hina wañusqakunaqa manan yuyayninkupichu kanku, arí, paykunaqa manan imatapas yachankuchu, ¿chaychu Lázaro imatapas yachanman karan? (Eclesiastés 9:5, 10; Juan 11:17-44).

¿Iman pasanqa wañusqakunawan?

Wañusqakunaqa kawsarimpunqakun, chaymantataq wiñaypaq kay pachapi tiyanqaku. Jesús kikinmi niran: “Ama kay nisqaywanqa musphaychischu [admirakuychischu], aya p’ampanakunapi lliw kaqkunaq Runaq Churinpa kunkanta uyarinanku tiempon chayamunqa”, nispa (Juan 5:28, 29).

Chaykunan rikuchiwanchis Jehová Dios anchatapuni munakuwasqanchista. Jesuspa nisqan hina “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq” (Juan 3:16; Apocalipsis 21:4, 5).

Sichus chaykunamanta astawan yachayta munanki chayqa, ¿Imatapunin Biblia yachachin? nisqa librota qhawariy 6 capitulopia

[Uranpi willakuy]