¿Kanchu Dios icha manachu?
¿Imaninkun runakuna?
◼ Wakinmi ninku: “Diosqa wayra hinan tukuyneqpi kashan”, nispa.
◼ Wakintaq ninku: “Diosqa kallpa hinan, manan yachakunchu imaynachus chay kasqanta”, nispa.
¿Imaniranmi Jesús?
◼ Khaynatan niran: “Yayaypa wasinpiqa askha wasikunan kashan”, nispa (Juan 14:2). Chay textoq nisqan hina, Diosqa kawsaqmi, cheqaqmi. Jesuspa nisqan hina huk ‘wasipitaqmi’ tiyanpas.
◼ Jesusqa allintan yacharan Diosqa cheqaq kasqanta maypi tiyasqantapas, chaymi nillarantaq: “Yayamantan lloqsimurqani, hinaspan kay pachaman hamurqani, kunantaq kay pachata saqespa Yayaman ripushani”, nispa (Juan 16:28).
JESUSPAQQA cheqaqmi Diosqa karan, manan wayrachu ni imapaschu karan. Chaymi payqa Dioswan rimaq, paymantan mañakuqpas. Chaymantapas Jesusqa sumaqtan Dioswan kawsaqku, chaymi nillaqpuni: “‘Yayay” otaq Papay, nispa (Juan 8:19, 38, 54).
Bibliaq nisqan hina, “Diosqa Espiritun” chaymi mana “pipas Diostaqa hayk’aqpas rikurqanchu” (Juan 4:24; 1:18). ¿Chaywanchu nisunman: “Diosqa mana cuerpoyoqmi”, nispa? Manan. Bibliaq nisqan hina “kanmi aychakaq cuerpo, kantaqmi espiritualkaq cuerpopas” (1 Corintios 15:44, Mosoq Rimanakuy). Chhaynaqa, ¿espiritual cuerpoyoqchu Dios?
Arí, chhaynapunin. Bibliaq willasqan hina, Jesuspas kawsarimpusqan qhepamanqa “kikin hanaq pachamanmi haykurqan, ñoqanchisrayku Diospa qayllanpi kunan rikhurinanpaq” (Hebreos 9:24). Chay texton yachachiwanchis Diosqa mana wayrallachu kasqanta aswanpas huk hawapi tiyanayoq kasqanta. Yachachiwallanchistaqmi Diosqa cheqaqpuni kasqanta.
Ichaqa yaqapaschá tapukuwaq: “Chhaynataq chayqa, ¿imaynapitaq rikuchin atiyniyoq otaq poderniyoq kasqantari?” nispa. Chaytaqa ruwan santo espiritunwanmi. Ari, Diosqa may k’uchumanpas chayachinmanmi santo espiritunta. Imaynan huk tayta makinta haywarin wawanta yanapananpaq, chhaynatan Jehová Diosqa santo espiritunwan ima munasqantapas hunt’an (Salmo 104:30; 139:7).
Chaymantapas Diosqa sienteq Diosmi, cheqnikunmi millay kaqta allin kaqtataq munakun. Bibliaq willasqan hina, payqa munakunmi llaqtanta, kusikunmi ima allinkuna ruwasqanmantapas, chaymantapas cheqnikunmi ídolo adoraqkunata, llakikuntaqmi millay kawsay kasqanmantapas (Génesis 6:6; Deuteronomio 16:22; 1 Reyes 10:9; Salmo 104:31). Bibliapiqa willallantaqmi kusikuq Dios kasqantapas. Chhaynataq chayqa, ¿manachu Jesuspa nisqan hina munakusunman tukuy sonqowan? (Marcos 12:30.)a
[Uranpi willakuy]
a Chaykunamanta astawan yachayta munanki chayqa qhawariy, ¿Imatapunin Biblia yachachin? nisqa libropi 1 capitulota, chaytaqa Jehová Diospa testigonkunan ruwan.
[8 paginapi willakuy]
Imaynan huk tayta makinta haywarin wawanta yanapananpaq, chhaynatan Jehová Diosqa santo espiritunwan ima munasqantapas hunt’an