¿Pikunan wakmanta nacenku?
ASKHA runakunan ninku: “Salvasqa kanapaqqa wakmantan nacena”, nispa. Jesusmi ichaqa mana chaytachu niran, aswanmi payqa niran: “Pipas Diospa qhapaqsuyunpi kananpaqqa wakmantan nacenan”, nispa (Juan 3:3). Chhaynaqa, manan salvakunapaqchu wakmanta nacena, aswanpas Diospa qhapaqsuyunpi kanapaqmi. Wakinmi ichaqa piensanku Diospa qhapaqsuyunman haykuspalla pipas salvasqa kananta. Ichaqa manan Diospa qhapaqsuyunman haykuqkunallachu salvasqaqa kanqaku. Chaypaqqa ñawpaqtan entiendenanchis imachus ‘Diospa qhapaqsuyun’ kasqanta.
Quechua Bibliapi qhapaqsuyu nisqa simiqa, Griego rimaypiqa Diospa gobiernon ninanmi. Bibliaq nisqan hinaqa, chay gobiernopiqa ‘runaq churin’ Jesucristo huk t’aqa runakunapiwanmi kamachikunku (Daniel 7:1, 13, 14; Mateo 26:63, 64). Apóstol Juanmi mosqoypi hina rikusqa Cristowan kuska kamachikuqkuna “lliw ayllumanta, rimaymanta, llaqtamanta, suyumantawan” akllasqa kasqankuta, hinallataq ‘kay pachata kamachinankuta’ ima (Apocalipsis 5:9, 10; 20:6). Chaymantapas Bibliaqa willallantaqmi chay kamachikuqkuna “pisi t’aqa oveja” hinalla kasqankuta, hinallataq “kay pachamanta qespichisqa” otaq rantisqa kasqankutawan, paykunaqa 144.000 runakunan kanku (Lucas 12:32; Apocalipsis 14:1, 3).
¿Maymantapachataq paykunari Jesuswan kamachimunqaku? Hanaq pachamantapachan, chaymi Bibliapiqa ‘Diospa gobiernonta’ sutichakullantaq ‘hanaq pacha gobierno’ nispa (Lucas 8:10; Mateo 13:11). Rikusqanchis hina, Diospa gobiernonpiqa kashanku Jesucristo wakin akllasqa qatikuqninkunapiwanmi.
Chhaynaqa, ¿imaraykutaq Jesusri niran: ‘Pipas Diospa Gobiernonpi kananpaqqa wakmantan nacenan’, nispa? Chaywanmi rikuchisharan Cristowan kuska hanaq pachapi kamachikuq kanapaqqa wakmanta nacena kasqanta. Arí, pikunachá Jesuswan kuska kamachimunqaku paykunallan wakmanta nacenanku.
Kaykamaqa yacharunchis wakmanta naceyqa ancha importante kasqanta, Dioslla chaypaq akllasqanta, hinallataq Cristowan kamachikuqkunalla wakmanta nacenanku kasqantawan. Qatiqninpin yachasunchis imaynapichus wakmanta nacey sucedesqanta.
[7 paginapi willakuy]
Pikunachá Jesuswan kuska kamachimunqaku paykunallan wakmanta nacenanku
[7 paginapi dibujo]
Diospa Gobiernonpiqa kashanku Jesucristo wakin akllasqa qatikuqninkunapiwanmi