¿Riwaqchu maypichus predicanata astawan necesitakushan chayman?

Ralphmi khaynata willakun: “Estados Unidos nacionpin tiyarayku, chaypiqa imaymanaykun karan. Chhaynaña kaqtinpas manchakusharaykun ñoqaykupas hinallataq iskaynin wawaykupas pisi-pisimanta qolqe sonqoman tukunaykumanta. Señoraywan kuska misionero kashaspaqa kusisqan imachus kapuqnillaykuwan kawsaq karayku, chaymi ñoqaykuqa chhaynallata kawsayta munarayku”, nispa.

RALPHQA Pam sutiyoq señoranpiwanmi munaranku maypichus necesitakusharan predicaqkuna chayman riyta, chaymi 1991 watapi askha sucursalkunaman cartata apachiranku. Hinan México nacionpi sucursalmanta paykunaman willaranku chay nacionpi inglés rimaqkunapaq predicaqkuna necesitakusqanta. Chay nacionpi inglés rimaqkunaqa cosechanapaq chakra hinañas kashasqaku (Juan 4:35). Chaymi Ralphqa señoranpiwan iskaynin wawankunapiwan ima alistakuyta qallariranku chay nacionman rinankupaq; sullk’a wawankun karan 8 watayoq, kuraqkaqtaq 12 watayoq.

Hatunmi predicananku llaqtaqa karan

Ralphmi nin: “Estados Unidos nacionmanta manaraq ripushaqtiykun wakin hermanokuna niwaqku: ‘Huk nacionman astakuyqa manachus hina allinchu kanman, onqonkichis chayri, ¿iman qankunamanta kanqa? Inglés rimaq runakunaqa manan kasukunkumanchu Diospa simintaqa’, nispa. Chay hermanokunaqa yaqapaschá ñoqaykupi piensaspa chayta niwaranku. Ñoqaykun ichaqa ña decidisqaña kasharayku llaqtaykumanta ripunaykupaq. Chaytaqa allin yuyaywanmi decidirayku. Chaymi mana manukuspalla qolqetapas huñurayku, chaymantapas askha kutipin familiantin rimarayku imaña kaqtinpas imatachus ruwanaykumanta”, nispa.

Ralph familianpiwan ima Mexicoman chayashaspaqa sucursaltan ñawpaqtaqa riranku, chaypin rikuchiranku huk mapata. Chaymantataq niranku: “Kay llaqtapin predicankichis”, nispa. Hinan paykunaqa San Miguel de Allende nisqa llaqtapi tiyaranku, chay llaqtapiqa askhan tiyasqaku huk nacionkunamanta runakuna, chaymantapas karun kasharan Mexicomanta chay llaqtakamaqa (240 kilómetros). Kinsa wata predicasqankuwanmi chay llaqtapi rikhuriran inglés simipi huk congregación, chaypiqa 19 predicaqkunan karan. Chay congregacionllan México nacionpiqa inglés rimaq karan, ichaqa chayraqmi inglés simipi predicayqa qallarikusharan.

Mexicopiqa askha runakunan rimanku inglesta, chaymantapas chay nacionpiqa askhapunin kashanku Estados Unidos nacionmanta runakuna. Ralphmi nillantaq: “Ñoqaykuqa Jehová Diosmantan mañakuqpuni kayku askha predicaqkunata kachamunanpaq. Chaymantapas wakin hermanokunaqa hamuqkun predicasqayku llaqtaman, chhaynapi necesitakushanchus yanapay icha manachus chayta yachanankupaq, paykunapaqqa kallaqpunin huk cuarto”, nispa (Núm. 13:2).

Imaymanatan saqeranku astawan predicanankupaq

Tiempowanqa huk hermanokunapas chayarankun Mexicoman chhaynapi astawan predicanankupaq. Paykunamanta hukninkun karan Bill señoran Kathywan, paykunan karanku Estados Unidos nacionmanta. Chaymantapas paykunaqa ñan 25 watata hinaña predicashasqaku pisi predicaqkunaq kasqan llaqtapi. Paykunaqa castellano rimaytas munashasqaku, Ajijic nisqa llaqtaman chayaspankun ichaqa reparasqaku chaypi Estados Unidosmanta askha jubilasqa runakuna kasqanta. Billmi nin: “Chay llaqtapiqa inglés rimaqkunatan astawan maskhaq kayku chhaynapi Bibliamanta yachachinaykupaq”, nispa. Bill señoranpiwan iskay wata chaypi kashaqtinkun rikhuriran inglés simipi huk congregacionpiwan, chaywanqa ñan iskayña karanku Mexicopi.

Kenwan señoran Joannewanpas Canadá nacionmantapachan astakuranku México nacionpi huk llaqtachaman, chhaynapi astawan predicanankupaq, wawanku Britanytapas pusarankun. Kenmi nin: “Chay llaqtaman yachakuyqa sasan karan, mayninpiqa askha p’unchaymi mana luz kaqchu unuta q’oñichinaykupaq, manan telefonopas funcionaqchu”, nispa. Chhaynaña kaqtinpas kusisqallan paykunaqa predicaqku. Pisi tiempollaraq chaypi kashaqtinmi Kentaqa siervo ministerial kananpaq churaranku, iskay wata qhepamantaq umalliq kananpaq churaranku. Kenpa kasqan congregacionpiqa pisillan karanku inglés rimaq hermanokunaqa, wayna sipaskunapas pisillan karanku, chaymi ususinkupaqqa sasa karan. Huñunakuna Wasikunata ruwaypi yanapakusqanmantapachan ichaqa Mexicopi askha amigokunata tariran.

Patrickmi señoran Roxannepiwan uyarisqaku Monterrey nisqa llaqtapi inglés rimaqkuna askha kasqanta, paykunaqa Texas nisqa suyupin tiyasharanku, chaymi chay llaqtaman riyta munasqaku. Patrickmi khaynata willakun: “Monterrey llaqtaman rispaykuqa Jehová Diospas pusashawankuman hinan sientekurayku”, nispa. Hinan paykunaqa phisqa p’unchayllapi wasinkuta venderuspa astakuranku chay llaqtaman. Paykunapaqqa sasan karan chay llaqtapi tiyayqa ichaqa kusisqan kasharanku iskay watallapi 17 predicaqkunamanta 40 predicaqkunaman yapakusqankumanta.

Jeffwan señoran Debwanpas Estados Unidos nacionpi hatun wasinkuta venderuspankun astakapuranku Mexicopi Cancún nisqa llaqtaman. Tiyasqanku llaqtapi hatun huñunakuykunaq aparikusqan wasipiqa manan chiriqpaschu ni q’oñiqpaschu, aswanpas sumaqmi karan; manataqmi karutaraqchu rinankupas karan chayman chayanankupaqqa. Mexicopin ichaqa 8 horata hinaraq rinanku karan inglés rimaypi hatun huñunakuyman chayanankupaq, huk estadiollapitaq huñukuqku chayqa Intipas sinchitan ruphaq. Chhaynapiña tarikuranku chaypas chay ruwasqankuqa manan yanqapaqchu karan, predicasqanku llaqtapin rikhuriran huk congregación, chaypiqa 50 predicaqkunan karanku.

Mexicopi kaq wakin hermanokunapas inglés rimaypi predicaytan qallariranku. Paykunamanta wakinmi karan Rubén familianpiwan, paykunan uyarisqaku San Miguel de Allende nisqa llaqtapi inglés rimaypi huk congregación rikhurisqanta, hinallataq llapa Mexicopi chay hermanokuna predicanan kasqantawan, chaymi paykunaqa yanapakuyta munaranku. Ichaqa inglés rimaytan yachananku karan, chay llaqtapi imayna kawsasqankuman hinataq imatapas ruwananku karan, chaymantapas huñunakuykunamanqa karutaraqmi rinanku karan (800 kilómetros). Rubenmi nin: “¡Ima munaymi karan huk nacionmanta runakunawan rimayqa! Paykunamanta wakinqa askha watañan Mexicopi tiyashasqaku, ichaqa manan hayk’aqpas rimasqanku simipi allin willakuykunata uyarisqakuchu. Paykunamanta wakinmi waqasparaq agradecekuwaqku paykunaman visitasqaykumanta”, nispa. San Miguel de Allende nisqa llaqtapi yanapakusqankumantan Rubenqa familiantin riranku Guanajuato nisqa llaqtamanñataq, chaypin precursor karanku. Chaymantapas yanapakurankun inglés rimaypi huk congregación rikhurinanpaq, chaypiqa 30 predicaqkunan karanku. Kunanqa Irapuato nisqa llaqtapin yanapakushanku, chaypiqa pisillan inglés rimaq hermanokunaqa kanku.

Ñawpaqpi mana uyarikuqkunapas kunanqa uyarikushankun

Mexicopiqa manan huk nacionmanta runakunallachu inglestaqa rimanku, rimallankutaqmi chay nacionmanta askha runakunapas. Chay runakunaqa qhapaqkunaq tiyasqallanpin tiyanku chaymi paykunaman predicayqa sasa, punkunkuta hermanokuna tocaqtinkuqa llank’apakuqkunallan lloqsimunku. Chay qhapaq runakunamanta wakin lloqsimunkuña chaypas manan uyarikunkuchu, paykunaqa Testigokuna secta kanallanpaqmi piensanku. Huk nacionkunamanta hermanokuna predicaqtinkun ichaqa allinta uyarikunku.

Kunan yachasunchis Gloriamanta, payqa Querétaro nisqa llaqtapin tiyan. Paymi khaynata willakun: “Jehová Diospa testigonkunaqa hamullaqkun wasiytaqa, ichaqa manan uyarikuqchu kani. Huk kutinmi familiay amigoykuna ima sinchi sasachakuykunapi tarikusharanku chaymi ñoqaqa llakisqa kasharani. Hinan Diosmanta mañakurani yanapawananpaq, chayllamanmi wasiyman hamuran huk inglés rimaq señora. Payqa inglés rimaqkunatan maskhashasqa, chaymi ñoqaqa nirani: ‘Ñoqapas yachanin inglés rimaytaqa’, nispa. Bibliamanta rimapayawashanankaman ñoqaqa sonqollaypi tapukusharani: ‘¿Imatataq kay señorari kaypi ruwashan?’ nispa. Chaymi mañakusqayta yuyarispa: ‘Dioschá kachamuwashan paytaqa’, nispa nirani”, nispa. Hinan Gloriaqa Bibliamanta estudiayta qallariran, chaymantataq familianña mana munaranchu chaypas, payqa bautizakapuran. Kunanqa precursoran Gloriaqa kashan, qosanpas wawanpas Diostan servishanku.

Astawan predicaqkunapaqmi askha bendicionkuna kan

Maypichus predicaqkunata necesitakun chaypi serviyqa sasan, ichaqa imaymana bendicionkunan kan. Ralphmi nillantaq: “Bibliamantan yachachirayku China, Gran Bretaña, Jamaica, Suecia nisqa nacionkunamanta runakunata; chaymantapas yachachiraykun Ghana nacionmanta qhapaq runakunatapas. Paykunamanta wakinqa bautizakurankun, chaymantataq tukuy tiemponkuwan Diospaq llank’aq kapuranku. Ñoqaykuqa qanchis congregacionkuna inglés rimaypi rikhurisqantan rikurayku. Iskaynin wawaykupas ñoqaykuwan kuskan precursor karanku, kunantaq Estados Unidospi kaq Betelpi kashanku”, nispa.

Mexicopiqa ñan 88 congregacionkunaña kashan inglés rimaypi, kallantaqmi huch’uy grupokunapas. ¿Imaraykun ratulla chhaytukuyman tukuranku? Paykunamanta wakinmi mana hayk’aqpas rimasqakuchu testigokunawan chayraykun. Chaymantapas manataq nacesqanku llaqtapichu kasharanku chayqa, manan pipas hark’aqchu Bibliata estudianankuta. Wakinqa ñan jubilasqaña karanku, chaymi tiemponku karan Bibliata estudianankupaq. Chaymantapas inglés rimaq congregacionkunapiqa askha precursorkunan kanku, chayraykupiwanmi askhaman yapakuran.

Ancha kusikuytan tarinki

Askha runakunan manaraq uyarishankuchu rimasqanku simipi allin willakuykunata, sichus predicasunman paykunaman chayqa, yaqapaschá uyarikuspa Diosta servinkuman. Allin yachayniyoq cristiano wayna sipaskuna, kuraqkuna, casarasqakuna, solterokunapas astawan predicanankurayku huk llaqtakunaman astakusqankuqa ancha kusikunapaqmi. Chay ruwasqanku sasaña chaypas, anchatan kusikunku Diosmanta yachay munaq runakunata tarispankuqa. ¿Astakuwaqchu huk nacionman otaq llaqtaykipi kaq huk ayllukunaman chhaynapi astawan predicanaykipaq?a (Luc. 14:28-30; 1 Cor. 16:9.) Chayta ruwaqtiykiqa askha bendicionkunatan chaskinki.

[Uranpi willakuy]

[21 paginapi recuadro]

Kusisqa kasqankuta rikuspankun cristianoman tukupuranku

Beryl sutiyoq señoramanta yachasun. Paymi Gran Bretaña nacionmanta Canadá nacionman ripusqa, chaypin llank’asqa askha empresakunapi directora hina. Chaymantapas payqa allintan yacharusqa caballopi sillaykuspa phawayta, chaymi 1980 watapi Juegos Olímpicos nisqapi Canadá nacionmanta rinanpaq payta akllasqaku. Jubilakuspan paypas qosanwan kuska Chapala nisqa llaqtaman ripusqaku. Chay llaqtapin pensionman haykuspa rikullaqkupuni kasqa inglés rimaq jubilasqa runakunata, chay runakunaqa kusisqallas kaqku chaysi paykunaqa qayllaykuspa tapuqku imatachus chay llaqtapi ruwasqankuta. Paykunamanta yaqa llapansi Jehová Diospa testigonkuna kasqaku. Chaysi Berylqa qosanwan kuska ninakusqaku: “Chay runakunaqa Diosta reqsisqankuraykutaq kusisqa kashanku chayqa, ñoqanchispas Diostayá reqsisun kusisqa kawsakunanchispaq”, nispa. Hinan paykunaqa huñunakuykunaman rillaqkupuni, Beryltaq Biblia estudiayta qallariran, chaymantataq bautizakapuspa askha wata precursora regular karan.

[22 paginapi recuadro]

“May allinmi paykunawan kuska predicayqa”

Llaqtankuta wasinkuta ima saqespa huk llaqtakunaman riq hermanokunaqa ancha munasqan kanku ima congregacionpichus yanapakushanku chaypi. Huk sucursalmantapachan niranku: “Sichus huk nacionmanta hamuq hermanokuna ripunkuman chayqa, pisipankumanpaschá congregacionpi hermanokunaqa. ¡May allinmi paykunawan kuska predicayqa!”, nispa.

Bibliapin nin: “Sumaq willakuykunatan askha warmikuna willarqanku”, nispa (Sal. 68:11). Chayqa cheqaqpunin, askha hermanakunan paykuna kikinkuta qonqakusparaq huk nacionkunaman rinku predicaq. Huk sucursalmantapachan khaynata nillarankutaq: “Kaypi congregacionkunapiqa askha hermanakunan kanku, yaqa llapankutaqmi chayllaraq bautizasqa kanku. Paykunatan allinta yanapanku huk nacionkunamanta hamuq soltera precursorakunaqa. ¡May allinpunin chay hermanakunaq yanapakusqanqa!” nispa.

¿Imaynatan sientekunku chay precursorakuna huk nacionman predicaq risqankumanta? Paykunaqa ancha kusisqan sientekunku. Angelicamanta yachasunchis, 35 watanpin payqa kashan, payqa askha watakunatan precursora hina servisharan huk nacionpi, paymi khaynata willakun: “Huk nacionkunapi predicayqa sasan. Huknin predicanay llaqtapi ñankunaqa t’urullañan kaq, chay llaqtapi runakunapas sinchitan sufriqku. Chayta rikuspaymi sinchita llakikuq kani. Chhaynaña kaqtinpas anchatan kusikuq kani runakunaman predicaspa. Chaymantapas ñañaykunaqa anchatan munakuwaqku. Hukninmi niwaran: ‘Karu llaqtamantaraq hamuspayki kaypi predicasqaykita rikuspaymi ñoqapas kallpachakurani qan hina precursora kanaypaq’, nispa. Chaykunawanmi mayninpiqa sonqoyraq kuyuriq”, nispa.

Huk precursoramantawan yachasun, paypa sutinmi Sue, payqa 50 watanpi hinañan kashan. Paymi khaynata willakun: “Kanña sasachakuykuna chaypas, bendicionkunaqa aswan askhan. Predicaspa puriyqa ima munaymi. Chaypin ñoqaqa askha sipas hermanakunawan purispa rimapayani Bibliapi imaymana yachasqaymanta hinallataq ima sasachaykunatapas imayna allichanamanta revistakunapi willasqanmantawan. Paykunamanta askhan niwanku: ‘Ima sasachakuytapas imayna allichasqaykiqa yanapawankun ñoqaykupas chhaynata ruwanaykupaq’, nispa. Chaymi ñoqaqa anchatapuni kusikuni paykunata yanapasqaymanta”, nispa.

[20 paginapi mapa]

(Imaynapuni kasqanta yachanaykipaq, qelqata qhaway)

MÉXICO NACIÓN

Monterrey

Guanajuato

Irapuato

Ajijic

Chapala

Lago Chapala

San Miguel de Allende

Querétaro

MÉXICO LLAQTA

Cancún

[23 paginapi foto]

Huk nacionkunamanta wakin runakunaqa manan hayk’aqpas uyarisqakuchu Diosmanta allin willakuykunata