¿Imatan ruwana Bibliata entiendenapaq?

3. Hukkunawanmi yanapachikuna

Edward John Eyre sutiyoq karu llaqtakunata puriq runan, viajasqanpi tupasqa Nullarbor (Australia) pampapi tiyaq runakunawan. Paykunan yachachisqaku aqo pampapi kashaspa maymantachus unu horqoyta, eucalipto sach’akunamanta unu horqoytawan. Chayta yachachisqankuraykun payqa mana wañuranchu chay viajasqanpi.

CHAY pasasqanmi yachachiwanchis ima sasa ruwaytapas hunt’anapaqqa allin yachaqkunaq yanapaynin allinpuni kasqanta. Kaqllataqmi Bibliata entiendenapaqpas hukkunaq yanapawananchista necesitanchis.

Jesusqa manan suyaranchu qatikuqninkuna mana piqpa yanapasqallan Diospa Simin Qelqata yachanankutaqa. Chaymi huk kuti pay kikinpuni qatikuqninkunaq “yuyayninkuta kicharirqan Diospa Simin Qelqata entiendenankupaq” (Lucas 24:45). Arí, Jesusqa yacharanmi Biblia leeqkunaqa hukkunaq yanapayninta necesitasqankuta.

¿Pikunan yanapawasunman?

Jesusqa qatikuqninkunatan kamachiran hukkunata yanapanankupaq. Manaraq hanaq pachaman wichashaspan paykunata niran: “Chayrayku, rispa llapa suyu runakunata yachachimuychis, yachachisqaykuna kanankupaq [...]. Qankunaman lliw kamachisqaykunata paykunaman yachachimuychis kasukunankupaq”, nispa (Mateo 28:19, 20). Chaypi nisqan hina yachachiymi cristianokunaq aswan allin ruwananqa, chaypaqmi hukkunata allinta entiendechinanku Bibliaq nisqanman hina imayna kawsayta. Arí, cheqaq cristianokunan runakunata yanapananku Bibliaq yachachisqanta entiendenankupaq.

Chaypaq yachasunchis Jesuspa: “Riychis, yachachimuychis”, nispa nisqan qhepallaman huk Etiopía llaqtayoq runawan ima pasasqanmanta. Paysi Diospa Simin Qelqata leeshasqa, ichaqa manan entiendeshasqachu. Chay leesqanmi kay hinata niran: “Wañuchinapaqmi oveja hina apasqa karqan, millman rutuqninpa qayllanpi upallakuq Cordero hinan paypas mana rimarirqanchu. Huch’uyyaykukuqtinpas, manan chaninchayta ruwapurqankuchu, paytaqa kay pachapi wañuchirqankun”, nispa (Hechos 8:32, 33; Isaías 53:7, 8).

¿Imatan chay runa ruwaran? Felipe sutiyoq allin yachaq cristianotan valekuran: “Ama hinachu kay, willaykuway, ¿pimantan profetaqa kayta nin? ¿Pay kikinmantachu? Icha, ¿hukmantachu?” nispa (Hechos 8:34). Chay Etiopía llaqtayoq runaqa Dios sonqo runan karan, chaymi Jerusalenpi yupaychana wasimanta kutimusharan. Payqa Diosmanta mañakuspachá tukuy sonqowan leesharan. Chaywanpas manan entiendesharanchu leesqanta. Chaymi llamp’u sonqowan Felipeta valekuran entiendechinanpaq, paytaq chay ratopacha entiendechiran. Hinan Etiopía runaqa allinta entiendespaña mayta kusikuran, hinaspan cristianoman tukupuran (Hechos 8:35-39).

Imaynan Felipepas huk cristianokunapas runakunata yachachiqku, kaqllataqmi Jehová Diospa testigonkunapas kay tiempopi ruwashanku 235 llaqtakunapi. Chaypaqmi huk-hukmanta Bibliaq yachachikuyninkunata runakunaman yachachinku askha kutipi.a (Qhaway “Bibliallan allinta yachachin”, nisqata.)

‘Tukuy mana yachasqaytan Biblia yachachiwan’

Kinsa paginapin yacharanchis Stevenmanta, Valvaneramanta, Jo-Annemantawan. Paykunaqa Jehová Diospa testigonkunawanmi Biblia estudiayta qallariranku. Stevenmi nin: “Bibliapin facilllata tarirani tukuy ima yachay munasqayta, chayqa Bibliapi textokunata willakuykunatawan tupachinallamantan kasqa. Ñawpaqpiqa manan hayk’aqpas chayta yachachiwarankuchu. Chaymi kunan anchata kusikuni mana piwanpas hap’inakuspalla Bibliaq nisqanta entiendesqaymanta”, nispa.

Valvanerapas nillantaqmi: “Bibliata estudiasqayman hinan repararani Bibliaq yachachiyninkuna allin tupachisqa, cheqaqpuni kasqanta. Chaykunapiqa iñirani manan ‘iñinaykin’ niwasqankuraykuchu, aswanmi chay yachachikuykuna creenapaq hinapuni kasqanrayku”, nispa. Jo-Annepas nillantaqmi: “Tukuy ima mana yachasqayta Bibliapi yachaqtiymi Diosta respetayta qallarinani. Payqa imapas yachay necesitasqanchistan Bibliapi saqewasqanchis”, nispa.

Qanri, ¿reqsinkichu Jehová Diospa testigonkunata? Chhayna kaqtinqa, mayqenninkutapas tapuwaq Bibliamanta imayna yachachisqankuta. Mana reqsinkichu chayqa, qelqawaqmi 4 paginapi kaq direccionman chhaynapi wasiykiman visitanasunkikupaq. Kaypi yachasqanchis hina, Bibliaqa manan mana entiendey atiychu. Ichaqa entiendenapaqqa Diosmantan mañakunanchis santo espiritunta, manan kasunanchischu Bibliaq contranpi rimaqkunata, Bibliamanta allin yachaqkunawantaq yanapachikuna.

[Uranpi willakuy]

[8 paginapi foto recuadropiwan]

Bibliallan allinta yachachin

Jehová Diospa testigonkunan Bibliawan kay tapuykunata kutichinku:

• ¿Imapaqmi Dios kay pachata kamaran?

• ¿Maypin wañuqkuna kashanku?

• ¿‘Tukukuy p’unchaykunapiñachu’ kawsashanchis?

• ¿Imaraykun Dios mana tukuchinchu ñak’ariykunata?

• ¿Iman familiakunata yanapanman kusisqa kawsanankupaq?

[7 paginapi fotokuna]

Bibliaq nisqanta entiendenapaqqa Diosmantan mañakuna, manan kasunachu Bibliaq contranpi rimaqkunata, hukkunawantaq yanapachikuna