Diosta allinta reqsiy
¿Ima ruwananchistan Jehová Dios munan?
MAYNINPIQA sasan kasukuy. Millay jefepaq llank’aqkunaqa astawanraqmi rimapakuspa imatapas kasukunku. Diospa serviqninkunan ichaqa sonqomanta kasukunku. ¿Imaraykun kasukuq kanku? Deuteronomio 10:12, 13 textopin chaymanta astawan yacharisun.a
Diospa kamachikuyninkunamanta rimashaspan Moisés tapurqan: “¿Imatataq Diosniykichis Señor Diosqa qankunaq ruwanaykichista munan?” nispa (Deuteronomio 10:12). Jehová Diosllan Ancha Hatun Kamachiwaqninchis, kawsay Qowaqninchispas (Salmo 36:9; Isaías 33:22). Chayraykun payqa derechonpi kashan tukuy imatapas mañawananchispaq, kamachiwananchispaqpas. Chaywanpas payqa manan munanchu munaspa mana munaspa kasukunanchista. Aswanmi ‘tukuy sonqowan kasukunanchista’ munan (Romanos 6:17).
Ichaqa, ¿iman yanapawasun tukuy sonqomanta kasukunanchispaq? ‘Jehová Diosta manchakuymi’ yanapawasun, 12 versiculopi nisqan hina.b Chay manchakuyqa manayá ima castigotapas khatatatasparaq manchakuymantachu rimashan, aswanmi rimashan tukuy sonqo kasukunanchismanta respetananchismantawan. Chaykunan yanapawasun allin kaqllata ruwanapaq.
Manchakunanchisña Jehová Diosta chaypas, payqa “tukuy sonqo tukuy alma” munakunanchista kasukunanchistan munan (Deuteronomio 10:12). Chhaynaqa Diosta munakusqanchisraykun kasukunanchis. Chay munakuyqa manayá “Diostan tukuy sonqo munakuni” niyllachu, aswanpas ruwayninchiskunawanmi rikuchinanchis. Huk libroq nisqan hinapas, chay munakuyqa ruwaykunawan rikuchiymantas rimashan. Arí, Diosta munakuqqa ruwayninkunawanmi rikuchin munakusqanta; payta kusichinanpaq hinataqmi kallpachakun imatapas ruwananpaq (Proverbios 27:11).
¿Tukuypichu Diosta kasukunanchis? Arí, chaymi Moisés nirqan: ‘Tukuy kamachikuynintan kasukunaykichis’, nispa (Deuteronomio 10:12). Wakinpaqqa manapaschá allinchu kanman chay ruway. Ichaqa yachanchismi Jehová Diosta kasukuyqa allinninchispaqpuni kasqanta.
Tukuy sonqomanta Jehová Diosta kasukuyqa allinninchispaqmi. Chaymanta rimashaspan Moisés nirqan: ‘Kamachisqan unanchayninkunata kamachikuyninkunatan hunt’anaykichis, ahinapin allillan kankichis’, nispa (Deuteronomio 10:13). Imataña Jehová Dios kamachiwasun chaypas, allinllapunin ñoqanchispaqqa kanqa. Bibliaq nisqan hina, “Diosqa munakuymi” (1 Juan 4:8). Chayraykun kamachikuyninkunaqa allinninchispaqpuni kanqa (Isaías 48:17). Sichus Jehová Diospa kamachikusqanman hina kawsasun chayqa, manan sinchi llakikuykunapichu tarikusun, Diospa Gobiernon chayamuqtintaq wiñaypaq ancha kusisqa kawsasun.c
Chhaynaqa, imataña Jehová Dios kamachiwasun chaypas, tukuy sonqomantan kasukunanchis. Chhaynapin paywan hukllachakusun. Payqa ancha munakuqmi, allinninchispaqtaqmi imatapas kamachiwanchis.
[Uranpi willakuykuna]
a Chay textopiqa Israel llaqtaman Moisespa rimaykusqanmi kashan, chay yuyaychaykunaqa ancha chaniyoqraqmi Diosta yupaychay munaqkunapaq (Romanos 15:4).
b Deuteronomio libropin askha kutipi willashan Jehová Diosta manchakuspa kawsananchismanta (Deuteronomio 6:24; 8:6; 13:4; 31:12, 13).
c Chaymanta astawan yachanaykipaq ¿Imatapunin Biblia yachachin? nisqa libropi maskhay 3 capitulota, “¿Imatan Dios munan Hallp’apaq?” nisqa temata. Chay librotaqa Jehová Diospa testigonkunan ruwan.