¿Riwaqchu Macedonia provinciaman?

TROAS llaqtapi kashaqtinkun apóstol Pablo mosqoypi hina rikurqan, Macedoniamanta huk runa payta valekushaqta: “Macedoniaman chimpamuspa yanapawayku”, nispa nishaqta. Pablopas viajaqmasinkunapas repararqankun chay provinciapi runakunaman ‘allin willakuykuna willamunankupaq Diospuni waqyashasqanta’. Chay llaqtapi predicaqtinku, ¿uyarikurqankuchu? Arí, askha runakunan iñirqanku, chaypi kaq Lidiapas, wasinpi kaqkunapas, paykunaqa Filipos llaqtapin tiyarqanku, Macedonia provinciamanta allin reqsisqa llaqtapi (Hech. 16:9-15).

Kay tiempopi Jehová Diospa testigonkunapas chay cristianokuna hinan kanku. Askha cristianokunan qolqenkuwan predicacionpi yanapanata necesitaq suyukunaman astakunku. Chaytan Lisa sutiyoq cristiana ruwarqan, Diospaq astawan llank’ayta munaspan Canadá suyumanta Kenia suyuman astakurqan. Trevor, Emily iñiqmasinchiskunapas astawan yanapakuyta munaspan Canadá suyunkumanta Malaui suyuman astakurqanku. Paul, Maggie jubilasqa iñiqmasinchiskunapas Diosta astawan serviyta munaspan Inglaterra suyumanta África oriental nisqaman rirqanku. ¿Qanri, munawaqchu paykuna hina yanapakuyta? ¿Riwaqchu huk suyuman? Qhawarisun Bibliaq nisqanta, huk suyupi yanapakuspa allin kanaykipaq imakuna ruwanaykimantawan.

Allinta qhawarikuy

Ñawpaqtaqa allintan qhawarikunayki imarayku huk suyupi yanapakuyta munanki chayta. Aswan hatun kamachikuymanta rimaspan Jesús nirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, nispa. Jehová Diosta munakuspa runamasinchista munakusqanchispiwan yanapawasun huk suyuman yanapakuq rinanchispaq. Jesusmi nillarqantaq: “Kaymi [iskaykaq kamachikuy]: Runamasiykitan qan kikiykita hina munakunki”, nispa. Runamasinchista munakusun chayqa yanapaytan munasun (Mat. 22:36-39; 28:19, 20). ¿Imaraykun munakuy yanapawanchis huk suyupi yanapakunapaq? Huk suyupi tiyayqa sasan, anchatan kallpachakunanchis. Remco, Suzanne iñiqmasinchiskunapas Países Bajos nisqamantan Namibia suyuman rirqanku, paykunan ninku: “Munakuymi yanapawanku kaypi qhepakunaykupaq”, nispa.

Namibia suyupi iñiqkunata watukuq Willie sutiyoq umallin nin: “Kay suyupi qhepakuq cristianokunaqa manan servichikuqchu hamunku, aswanpas iñiqmasinkuta yanapaqmi”, nispa.

Chaykunata qhawarispa, tapukuy: “¿Imakuna yachasqaymi yanapawanman? ¿Allin yachachiqchu kani? ¿Yachanichu huk rimaykunata? ¿Kallpachakuymanchu huk rimaykunata yachanaypaq?” nispa. Familiayoqña kanki chayqa, paykunawan parlay; tapurikuytaq umalliqkunata. Astawanqa Jehová Diosmanta mañakuy. Chaykunata ruwaymi yanapasunki yanapakunaykipaq hinachus kashanki icha manachus chayta yachanaykipaq (qhawariy “¿Allintachu reqsikunki?” nisqa recuadrota).

¿Maykunapin yanapakuwaq?

Apóstol Pablotaqa Jehová Diosmi huk rikhuriypi kamachirqan Macedonia provinciapi yanapakunanpaq. Manañan kay tiempopi chhaynatachu kamachiwanchis chaypas, kay qelqapi otaq huk qelqakunapin yachasun ima suyukunapi necesitakushan predicaqkunata chayta. Chaymantapas huk listata ruwakunanchis chay suyukunamanta. Sichus mana huk rimaykunata yachanaykipaq hinachu kashanki, otaq manan unaytachu chay suyupi qhepakuyta munanki chayqa, rimasqayki simita rimaq suyukunallapi yuyaykuy. Hinaspapas chay rinayki suyumanta kaykunata yachay: ima documentokuna necesitakun chay suyuman haykunapaq, tiyanapaq hinachu, chirichu otaq q’oñichu, yachanallaykitaq imapin viajanku, sinchitachu imapas cuestan icha manachu chayta. Tapurikuytaq huk suyukunapi yanapakuq cristianokunata, mañakuytaq Jehová Diosmantapas. Yaqapaschá unaypi decidinayki kanqa ima suyupi yanapakuytapas. Yuyariy apóstol Pablota puriysiqmasinkunatawan, manaraq Macedonia provinciapi predicanankupaq kamachikuyta chaskishaqtinkun ‘Diospa [...] Santo Espiritun hark’arqan’ Asia llaqtaman haykunankuta, hinallataq Bitinia llaqtaman haykushaqtinku ‘Jesuspa Espiritun hark’allarqantaq’ (Hech. 16:6-10).

Sichus akllakunkiña ima suyukunapi yanapakunaykita chayqa, chay suyukunapi kaq sucursalkunaman huk cartata qelqay; willaytaq imakunapin Diospa llaqtanpi yanapakushanki chayta. Tapukuy: “¿Chay suyupi tiyanapaq askha qolqetachu necesitakun, kanchu wasikuna alquilanapaq, kanchu hospitalkuna, kanchu llank’ana?” nispa. Chay cartaykitataq comité de servicio nisqaman qoy paykunañan carta de recomendación nisqatawan apachinqaku akllasqayki suyukunapi sucursalman. Paykunaq decidisqanku yanapasunki ima suyukunapi allinta yanapakuwaq chayta.

Willie sutiyoq umalli nillantaq: “Yanapakusqanku suyupi cristianokunaqa ñawpaqtan reqsiq hinalla viajanku akllasqanku suyuta, maykunapin allin kankuman chayta qhawarinankupaq. Huk casarasqa iñiqmasinchiskunan hawa llaqtapi tiyayta sasapaq hina qhawarirqanku, chaymi llaqta ukhupi yanapana necesitasqankuta qhawarispa chayllapiña qhepakurqanku”, nispa.

¿Imakunan sasa ruway kanman?

Huk suyuman yanapakuq risqaykirayku wasiykita, familiaykita, amigoykikunata ima saqeyqa sasan kanman. Lisa iñiqmasinchis nillantaq: “Huk suyupi mana piniyoq kayqa sinchi sasan”, nispa. ¿Imaynatan pay atiparqan chay llakikuyninta? Payqa kallpachakun iñiqmasinkunawan sumaqta kawsananpaqmi. Chaypaqmi manaraq huñunakuy qallarishaqtin otaq tukuqtinpas sapankankuq sutinta yachananpaq paykunawan parlarin. Chaymantapas paykunawan kuskan predican wasinmanpas invitan. Chhaynapin askha amigakunata tarirqan. Chaymi nin: “Manan pesapakunichu ima saqesqaymanta, Jehová Diosmi chaykunamantaqa saminchawan”, nispa.

Paulwan Maggiewanmi wawanku kurakña kaqtinku, huk suyuman astakunankupaq decidikurqanku, chaymi saqepurqanku kinsa chunka wata tiyasqanku wasita. Paulmi nin: “Imapas kaqniykuta saqeyqa facilmi karqan, familiaykuta saqeymi ichaqa sasan karqan. Chaymi avionpiña kashaspayku khuyayta waqarqayku. Yaqapaschá niykuman karqan: ‘Yanqachus hina kaytaqa ruwashanchis’, nispa. Ichaqa Jehová Diospin hap’ipakurqayku. Chaymantapas askha amigokunatan tarirqayku, chaymi astawan kallpachawarqanku chay suyupi llank’ashanallaykupaq.

Greg, Crystal iñiqmasinchiskunan Canadá suyumanta Namibia suyuman astakurqanku, chay suyupi inglés simita rimasqankurayku. Chay qhepamanña huk rimayta yachanankupaq yuyaykusqaku. Paykunan ninku: “Mayninpiqa saqepuytan munarqayku. Ichaqa predicasqayku llaqtapi runakunaq costumbrenta yachanaykupaqqa paykunaq rimasqanku simitan yachanayku karqan. Hinaspapas iñiqmasiykunawan kuska kasqaykun yanapawarqanku chaypi qhepakunaykupaq”, nispa.

Chay llaqtapi tiyaq iñiqmasikunaqa manan qonqankuchu chay cristianokuna k’umuykukuq yanapakuq kasqankuta. Jenny Irlanda suyupi tiyan llaqtanman predicaq riq familiakunata sumaqta yuyarin. Paymi nin: “Paykunaqa servinankupaqmi hamurqanku manan servichikunankupaqchu, sumaqtan wasinkupipas chaskiwaqku. Kusikuywan llank’asqankuta qhawarispan ñoqapas munarqani paykuna hina yanapakuyta”, nispa. Kunanqa Jenny qosanpiwan Gambia suyupi misionero hina yanapakushanku.

Jehová Diospa “saminchayninqa qhapaqyachinmi”

Apóstol Pablo Macedonia provinciaman serviq risqanqa ancha allinpunin karqan. Chunka wata qhepaman hinan, Filipos iñiqmasinkunaman qelqarqan: “Sapa kuti qankunamanta yuyarikuspaymi Diosniyman graciasta qoni”, nispa (Fili. 1:3).

Trevor Emily iñiqmasikunan Malaui llaqtapi Diosta servisharqanku manaraq Escuela Bíblica de Galaad de la Watchtower nisqaman rishaspanku. Pay nin: “Mayninpin tapukuq kayku: ‘¿Allinpaqchu Malaui llaqtaman hamurqanchis?’ nispa. Ichaqa kusisqan karqayku. Chaypi kaspaykun astawan casado kawsayniykupi hukllachakurqayku, Diospa saminchaynintapas chaskikurqayku”, nispa. Greg Crystal iñiqmasinchiskunan nillankutaq: “Diospaq llank’asqaykuqa manan imawanpas tupanmanchu”, nispa.

Ichaqa manan llapan iñiqmasinchiskunachu huk suyuman yanapakuq riyta atinku. Wakinqa tiyasqanku suyullapin astawan necesitakusqan llaqtakunapi yanapakunku. Hukkunataq tiyasqankuq llaqtallapi yanapakunku. Maypiña yanapakusun chaypas, Diosta serviymi aswan importante (Col. 3:23). Chaypin yachasun kay textoq nisqanqa cheqaqpuni kasqanta: “Señor Diospa saminchayninqa qhapaqyachinmi, chay saminchayqa manan llakichinchu”, nispa (Pro. 10:22).

[5 paginapi foto recuadropiwan]

¿Allintachu reqsikunki?

Qatiqninpi kaq tapuykuna yanapasunki huk suyuman rinaykipaq hinachu kashanki icha manachu chayta decidikunaykipaq. Diosmanta mañakuy, allintataq qhawarikuy imayna tarikusqaykita. Chaypaq qhawariy Qhawaq nisqa revistakunata.

• ¿Dios sonqochu kani? (“Medidas que conducen a la felicidad”, w97-S 15/10, pág. 6.)

• ¿Allin yachachiqchu kani? (“El camino al éxito en el ministerio de precursor”, w89-S 15/5, pág. 21.)

• ¿Saqeymanchu familiayta amigoykunatapas? (“Cómo enfrentarse a la nostalgia en el servicio de Dios”, w94-S 15/5, pág. 28.)

• ¿Yachaymanchu huk rimayta? (“El reto de servir en una congregación de habla extranjera”, w06-S 15/3, pág. 17.)

• ¿Kashanchu qolqey mantenekunaypaq? (“¿Puede usted servir en el extranjero?”, w99-S 15/10, pág. 23.)

[6 paginapi foto]

K’umuykukuq yanapakuq cristianokunata allinpaq qhawarinku chay llaqtapi tiyaq iñiqmasikuna

[7 paginapi foto]

Tukuy sonqowan yanapakuy yuyaywan riqkunan kusikuywan predicanku