Diosta allinta reqsiy
Diosqa akllakuy atiytan qowarqanchis
ASKHA tayta-mamakunan allin ejemplo kaspa wawankuta yanapanku allin runa kanankupaq allin kaqta akllakunankupaqpas. Ichaqa manan llapa tayta-mamakunachu allin ejemplo kanku. Chhayna tayta-mamayoq wawakuna, ¿paykuna hinapunichu kanqaku? Manan, Diosqa llapa runakunamanmi akllakuy atiyta qowarqanchis. 2 Reyes 18:1-7 textopi Ezequiasmanta willasqanmi yanapawasun chayta entiendenapaq.
Ezequiasqa Judá suyupi kamachikuq ‘Ahazpa churinmi’ karqan (versículo 1). Rey Ahazqa llaqtapi runakunatan kallpacharqan Jehová Diosta qhepanchaspa Baal diosta yupaychanankupaq, chay diosman runakunata sacrificiopi haywanankupaqwan. Biblian willan huk churinta sacrificasqanta. Paymi Dios yupaychana wasita wisq’achispa “Jerusalén sapanka calle esquinakunapi altarta ruwarqan”. Chaykuna ruwaspan Diosta “sinchita phiñachirqan” (2 Crónicas 28:3, 24, 25). Arí, payqa manan allin ejemplochu karqan churin Ezequiaspaq. ¿Taytan hinachu Ezequiaspas kanan karqan?
Kamachikuq kaspan Ezequiasqa rikuchirqan mana taytan hinachu kasqanta. “Ezequiasqa Señor Diospa munayninman hinan chaninta ruwarqan.” (Versículo 3.) Hunt’aq sonqowanmi Diosta servirqan, chaymi “Judá suyupi reykunaqa ñawpaqkaqpas qhepakaqpas manan pay hinaqa karqanchu” (versículo 5). Kamachikuyta qallarishaspan llapa idolokuna yupaychananku altarkunata thuninankupaq kamachirqan. Yapamantan “Señor Dios yupaychana wasi punkukunata kicharispa allichachirqan”, kallpacharqantaqmi runakunata cheqaq Diosta yupaychanankupaq (versículo 4; 2 Crónicas 29:1-3, 27-31). “Ezequiasqa Señor Diosman k’askan kawsarqan [...] Chayraykun Señor Diosqa payta yanaparqan.” (Versículos 6, 7.)
¿Imaraykun Ezequías taytanmanta hukniray karqan? Yaqapaschá maman Abia paypaq allin ejemplo karqan, otaq Isaiaspa ejemplonta qhawarirqan (Isaiasqa Ezequías manaraq naceshaqtinmi profetizarqan).a Bibliaqa manan willanchu pin Ezequiasta yanaparqan allin runa kananpaq chayta. Chaywanpas payqa manan taytan hinachu karqan, aswanmi allin ñanta akllakurqan.
Ezequiaspa ejemplonmi yanapan wawa kayninpi ñak’ariq wayna-sipaskunata otaq mana allin tayta-mamayoqkunata. Manan ñawpa kawsasqanchista cambiayta atisunmanchu nitaq ñawpaqpi ñak’arisqanchista qonqayta atisunmanchu. Ichaqa manan chayraykuchu mana allin ñanpi purisun. Qhepaman kawsayninchisqa kunan imachus akllakunanchismantan kanqa. Ñoqanchispas Ezequías hinan Diosta munakusunman munaynintapas ruwasunman. Chayta akllakusun chayqa, kusisqan kawsasun qhepa tiempomantaq Diospa prometesqan mosoq pachapi wiñaypaq kawsasun (2 Pedro 3:13; Apocalipsis 21:3, 4). ¿Manachu ñoqallanchismanta akllakuy atinanchispaq Dios kamawasqanchis tanqariwanchis payta astawan reqsinapaq?
[Uranpi willakuy]
a Isaiasqa 778 watapin profetizayta qallarirqan manaraq Jesús hamushaqtin, 732 watakama. Ezequiastaq 745 watapi kamachikuyta qallarirqan 25 watanpi kashaspa.