3 ¿Imaynatan mañakuna?

Askha religionkunapin Diosmanta otaq mañakuymanta rimaspaqa, astawanqa rimanku imayna formapi mañakunamanta, ima simikuna rimanamanta, imaymanakuna ruwanamantawan. Ichaqa Bibliaqa manan chaykunamantachu astawanqa riman, aswanpas imaynata mañakunamantan.

Bibliapiqa willashan Diosta serviqkuna askha lugarkunapi imaymana formapi mañakusqankumantan. Imaynapi tarikusqankuman jinan mayninpiqa mana imata rimaspalla mañakurqanku, mayninpitaq alto kunkawan. Wakinninkuqa janaq pachata qhawarispan mañakurqanku, wakintaq k’umuykukuspa. Paykunaqa manan imagenkunata, estampakunata, rosariokunata ima jap’irqankuchu mañakunankupaq. Aswanpas imachus sientesqallankutan sonqomanta rimarqanku. ¿Imanaqtintaq Diosri mañakusqankuta allinpaq qhawarirqan?

Ñaupaqtaqa, Jehová Diosmantan mañakurqanku. Chaymantapas, 1 Juan 5:14 nin: “Imataña Diospa munayninman jina mañakusunchis chaypas, Diosqa uyariwasunmi, manapunin chaymantaqa iskayananchischu”, nispa. Chhaynaqa imatapas mañakuspaqa Diospa munayninman jinan mañakunanchis, ¿Imatan chaywan nishanchis?

Ñaupaqtaqa imachus Diospa munaynin kasqantan yachananchis. Chhaynaqa Diospa Palabrantan estudiananchis. Jehová Diosqa manan Bibliata t’aqwiq allin estudioso runakuna jina kananchistaraqchu munan. Ichaqa munanmi munayninmanta yachananchista, chayman jina ruwananchistapas (Mateo 7:21-23). Bibliapi yachasqanchisqa imayna mañakusqanchispin rikukunan.

Astawan Jehová Diosmanta munayninmantapas yachaqtinchisqa astawanmi iñiyninchis wiñanqa. Mañakusqanchista Dios uyarinanpaqqa iñiyniyoqmi kananchis. Jesusmi nirqan: “Iñiywanchus tukuy imatapas mañakunkichis chayqa, chaskinkichismi”, nispa (Mateo 21:22). Iñiyniyoq kayqa mana rikusqanchispi creeyña chaypas, manan chayraykuchu engañasqa kashanchis. Jesuspi iñinapaqqa kashanmi pruebakuna (Hebreos 11:1). Jehová Diostaqa manan rikusunmanchu, ichaqa Bibliapiqa askhapunin pruebakuna kashan Diosqa kasqanmanta, payqa confianapaq jina kasqanmanta. Iñiyniyoq runakunaq mañakuyninman kutichisqanmantapas. Jehová Diosqa manan phiñakunqachu iñiyniyoq kanapaq mañakuqtinchisqa, aswanpas qowasunmi tukuy necesitasqanchista (Lucas 17:5; Santiago 1:17).

Chaymantapas, ¿imatawanmi ruwananchis mañakusqanchis uyarisqa kananpaq? Jesusmi nirqan: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa (Juan 14:6). Chhaynaqa Jesusllawanmi Jehová Diosmanqa asuykusunman. Chayraykun Jesusqa qatikuqninkunata yachachirqan sutinpi Diosmanta mañakunankupaq (Juan 14:13; 15:16). Ichaqa Jesuspa sutinpi mañakuymanta rimaspaqa “manan Jesusmantan mañakunanchis” nispachu nishanchis. Aswanpas reconocenanchismi Jesusraykulla otaq payllawan ch’uya taytanchis Jehová Diosman asuykuyta atisqanchista.

Juj kutinmi jujnin discipulon Jesusta nirqan: “Señor, yachachiwayku mañakuyta”, nispa (Lucas 11:1). Reparasqanchisman jina, paykunaqa manan ñaupaqpi rimasqanchis kaqkunamantachu tapukurqanku. Aswanpas paykunaqa imamanta mañakunankumantan tapukusharqanku.