Tawakaq
Allin amigokunata akllananchis
BIBLIAN NIN: “Yachayniyoqkunawan puriqqa yachayniyoqmi kapunqa”, nispa (Proverbios 13:20).
¿IMA SASACHAKUYMI KAN? Amigonchiskunaq mana allin yuyaykusqanku rimasqanku iman samaykuwasunman (1 Corintios 15:33).
Qhawarisun ñawpa tiempopi sucedesqanta. Huk kutinmi Israel runakuna chunka iskayniyoq runakunata kacharqanku Canaán llaqtata qhawamunankupaq. Bibliaq nisqan hina, chunka runakunan ‘qhamiyaq risqanku suyumanta mana allin willakuyta’ aparqanku. Iskaytaq risqanku llaqtamanta allinta rimaspa nirqanku: “¡Qhamiyaq risqayku hallp’aqa ancha allinpunin!” nispa. Ichaqa chunka runakunata uyarispan “qapariyta qallarirqanku” hinan llapallanku ‘rimapakurqanku’ (Números 13:30–14:9).
Kunanpas askha runakunan ‘chhuchupakunku, qhepallapi rimanku’ quejakunkutaq imayna kawsasqankumanta (Judas 16). Amigonchiskuna mana allinllamanta rimaqtinkuqa sasan ñoqanchispaq kanman allinkunamanta rimay.
¿IMAN YANAPAWASUNMAN? Qhawarinan imamanta amigonchiskuna astawan rimasqankuta, chaypin yachasun imayna kasqankuta. ¿Hatunchakunkuchu imakunayoqpas kasqankumanta? ¿Sapa kutillachu quejakunku imankupas mana kasqanmanta? Ñoqanchisri, ¿hukkuna ñoqanchismanta envidiakunankupaqchu imatapas ruwanchis, icha yanapanchischu kapuqnillankuwan kusisqa kawsanankupaq?
Davidwan Jonatanwan imayna kawsasqankun rikuchin imaynan allin amigokuna kananku chayta. Jonatanqa rey Saulpa churinmi karqan, chaymi qhepaman pay rey kapunan karqan. Ichaqa Diosmi prometerqan David rey kapunanta, chaymi Davidqa Saulpa wañuchinanta manchakuspa ch2’inneq cheqasman ayqekuspa chaypi tiyamurqan. ¿Imanirqanmi Jonatán Davidmanta? Manan payqa cheqnipakurqanchu aswanmi Diospa nisqanta kasukuspa amigon Davidta yanaparqan (1 Samuel 19:1, 2; 20:30-33; 23:14-18).
Allin amigokunaqa allin kananchistan munanku manataqmi imamantapas envidiakunkuchu (Proverbios 17:17). Ichaqa chhayna amigokunayoq kanapaqqa ñoqanchisraqmi kallpachakunanchis allin amigo kanapaq (Filipenses 2:3, 4).
[7 paginapi foto]
¿Allinkunata ruwanapaqchu amigonchiskuna yanapawanchis?