Diospa Siminmanta yachachikuykuna

¿Pitaq Diosri?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Pitaq Diosri?

Diosqa tukuy imaymanata kamaqmi. Biblian sutichan ‘wiñay-wiñay Rey’ nispa, chaypin yachanchis Diosqa wiñay tiempomanta wiñay tiempokama kawsasqanta (1 Timoteo 1:17). Paymi kawsayta qowarqanchis chayraykun payllata yupaychananchis. (Leey Apocalipsis 4:11.)

2. ¿Imaynan Dios?

Payqa huk espiritun, runakunamanta aswan atiyniyoq, paytaqa manan pi runapas rikurqanchu (Juan 1:18; 4:24). Dios imayna kasqantan yachasunman kamasqanta qhawarispa. Imaymana clase frutakunata t’ikakunatapas qhawarispan yachanchis ancha yachayniyoq kasqanta munakuwasqanchistapas. Tukuy imaymana kamasqanpin yachanchis ancha atiyniyoq kasqanta. (Leey Romanos 1:20.)

Bibliata leespan Diosta reqsillasunmantaq. Chaypin yachanchis runakunata imayna tratasqanta, imakuna kusichisqanta, imakunata mana allinpaq qhawarisqanta, imayna sientekusqantapas. (Leey Salmo 103:7-10.)

3. ¿Sutiyoqchu?

Jesusmi willarqan Diosqa sutiyoq kasqanta. Nirqanmi: “Yayayku hanaq pachapi kaq, sutiyki yupaychasqa kachun”, nispa (Mateo 6:9). Sutinqa hukniraytan rimakun sapanka simikunapi. Español simipiqa Jehová ninchismi, wakintaq Yavé ninku. (Leey Salmo 83:18, NM [82:19 wakin Bibliakunapi].)

Askha Bibliakunapin mana rikhurinchu Jehová suti, Jehová sutiq rantintan Señor otaq Dios nisqa titulokuna rikhurin. Ichaqa chayraq Bibliata qelqakushaqtinqa qanchis waranqa kutita hinan rikhurirqan. Diospa Simin Qelqamanta yachachispan Jesusqa Diospa sutinta rimallaqpuni. Payqa murqanmi Taytanta aswan allinta reqsinankuta. (Leey Juan 17:26, NM.)

4. ¿Interesakunchu Dios ñoqanchispi?

Arí, chaytan rikuchin mañakusqanchista uyarispa (Salmo 65:2). Chhaynaqa, ¿Imaraykun hinallata qhawan ñak’ariykuna kananta? Wakin runakunan ninku: “Diosmi ñak’arichiwanchis pruebawananchispaq”, nispa. Ichaqa manan cheqaqchu. Job 34:12 texton nin: “Diosqa mana chanintaqa manan ruwanmanchu”, nispa. Arí, payqa manan hayk’aqpas ima mana allintapas ruwanmanchu. (Leey Santiago 1:13.)

Jehová Dio munanmi ñoqallanchismanta imatapas decidinanchista. Diosta servinapaq decidikuyqa ancha allinmi (Josué 24:15). Ichaqa askha runakunan decidinku mana allinkuna ruwayta, chayraykun ñak’ariykuna kan. Jehová Diosqa llakikunmi chay ñak’ariykunata rikuspa (Leey Génesis 6:5, 6.)

Pisi tiempollamantan Jehová Diosqa Jesuswan millay kawsayta, millay runakunatapas tukuchinqa. Chay tiempo chayamunankama ñak’ariykunata hinalla qhawananpaqqa kanmi allin razonkuna. Qhepamanmi chaymanta sut’inchakunqa. (Leey Isaías 11:4.)

5. ¿Ima ruwananchistan Dios munan?

Jehová Diosqa allin yuyayniyoqtan kamawarqanchis, chaymi munan payta allinta reqsispa munakunanchista (1 Timoteo 2:4). Bibliata estudiaspaqa paymanmi asuykunchis, chhaynapitaq amigontin kanchis. (Leey Proverbios 2:4, 5.)

Diosmi kawsayta qowarqanchis chaymi anchata munakunanchis. ¿Imaynatan munakusqanchista rikuchisunman? Paymanta mañakuspa kamachikuyninkunata kasukuspa ima (Proverbios 15:8). Huknin kamachikuyqa runamasinchista munakuywan trataymi (Leey Marcos 12:29-31; 1 Juan 5:3.)

Astawan yachayta munanki chayqa ¿Imatapunin Biblia yachachin? nisqa librota qhaway 1 capitulota, chaytaqa Jehová Diospa testigonkuna ruwan.

[23 paginapi foto]

Huk taytan wawanpa huk tiempo ñak’arinanta dejanman allin razonkunarayku