Diospa Siminmanta yachachikuykuna

¿Kanchu suyakuy wañupuqkunapaq?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Ima suyakuymi kan wañupuqkunapaq?

Jerusalenpa cercallanpi tarikuq Betania llaqtaman Jesús chayaqtinmi amigon Lázaro tawa p’unchayña wañusqa kasharqan. Jesusqa Lazaroq panankunawanmmi maypichus p’ampasqa kasqanman rirqan, chayllamanmi askha runakuna hamullarqankutaq. ¡Martawan Mariawanqa anchatachá kusikurqanku turanku Lazarota Jesús kawsarichipuqtinqa! (Leey Juan 11:20-24, 38-44.)

Martaqa iñirqanmi kawsarimpuy kananpi. Diosta serviqkunaqa ñawpa tiempomantaraqmi yachanku qhepa tiempoman Dios wañusqakunata kay Hallp’api kawsarichinpunanta (Leey Job 14:14, 15.)

2. ¿Imaynapin wañusqakuna tarikunku?

Espirituqa kawsay “samaymi”, chay samaywanmi runakunapas animalkunapas kawsanku. Chhaynaqa cuerponchis wañupuqtinqa manan espiritupas otaq almapas kawsashaqlla qhepanchu (Eclesiastés 3:19; Génesis 7:21, 22). Hallp’amanta ruwasqan kanchis (Génesis 2:7; 3:19). Ñosqhonninchis wañupuqtinqa lliw yuyaykusqakunan chinkapun. Wañusqakunaqa manan yachankuchu nitaq sientinkuchu, chayraykun Lázaro kawsarimpuspaqa mana imatapas willakurqanchu. (Leey Salmo 146:4; Eclesiastés 9:5, 10.)

Rikusqanchis hina, wañusqakunaqa manan ñak’arinkuchu. Chhaynaqa wañupusqanku qhepaman mana allin runakuna ñak’arichisqa kanku nisqa yachachikuyqa manan cheqaqchu. Chay yachachikuyqa Diostan mana allinpaq qhawarichin, payqa runakunata ninapi ruphachiytaqa sinchitan cheqnikun. (Leey Jeremías 7:31.)

3. ¿Rimasunmanchu wañusqakunawan?

Wañuqkunaqa manan rimankuchu (Salmo 115:17). Supaykunan ichaqa runakunawan rimayta atinku, wañuqkunamantataqmi pasachikunkupas (2 Pedro 2:4). Chayraykun Jehová Diosqa kamachiwanchis wañuqkunawan ama rimananchispaq (Leey Deuteronomio 18:10, 11.)

4. ¿Pikunan kawsarimpunqaku?

Mosoq pachapiqa millonninpi runakunan kawsarimpunqaku, Diospa kamachikuyninkunamanta mana yachasqankurayku mana allinta kawsaq runakunapas (Leey Lucas 23:43; Hechos 24:15.)

Kawsarimpuq runakunapaqqa kanqan tiempo Diosmanta yachanankupaq Jesuspi iñinankupaqpas (Apocalipsis 20:11-13). Kasukuq runakunaqa kay Hallp’apin wiñaypaq kusisqa kawsanqaku. Mana allinllata ruwaq runakunan ichaqa mana wiñaypaqchu kawsanqaku, chay runakunaqa Jesuspa nisqan hina, ‘Diospa huchachasqan kanankupaqmi kawsarimpunqaku’ (Leey Juan 5:28, 29.)

5. ¿Imatan Diosmanta yachanchis kawsarimpuy kasqanwan?

Kawsarimpuyqa kanqa churinta Dios kay pachaman kachamusqanraykun. Chhaynapin Jesusqa ñoqanchisrayku kawsayninta qorqan. Chaymi kawsarimpuyqa kanqa Jehová Diospa munakuynin khuyapayakuyninrayku (Leey Juan 3:16; Romanos 6:23.)

Astawan yachayta munanki chayqa ¿Imatapunin Biblia yachachin? nisqa librota qhaway 6, 7 capitulokunata chaytaqa Jehová Diospa testigonkunan ruwan.

[16 paginapi dibujo]

Adanqa hallp’amanta ruwasqan karqan