¿Yachachinankuchu Diosmanta wawakunata?

Jonathan Swift nirqan: “Religionkunaqa cheqnikuyllatan yachachinku, manan munanakuytachu”, nispa.

YAQA kinsa pachak watakuna ñawpaqtan runakuna chhaynata yuyaykurqanku, kunanpas kaqllatan yuyaykushanku. Wakin runakunaqa ninku: “Wawakunataqa manapunin Diosmanta yachachinankuchu”, nispa. Hukkunataq ninku: “Religionniyoq familiapi uywasqa wawakunaqa waqllipunkun”, nispa.

Wakin runakunataq ninku:

● Tayta-mamakunaqa manan wawakunata Diosmanta yachachinankuchu, nispa.

● Tayta-mamakunaqa wawakuna wiñanantaraqmi suyananku Diosmanta yachachinankupaq, nispa.

● Wawakunataqa huch’uychankumantapachan Diosmanta yachachinanku, ichaqa wiñasqankuman hinan yanapananku iñiyninkuta akllakunankupaq, nispa.

● Wawakunaqa ch’inllan tayta-mamankuq religionninpi kananku, nispa.

¿Ima ninkin chay nisqankumanta?

¿Wawakunaq allinninpaqchu kanman religionniyoq kay?

Manan pipas wawankuq mana allinnintaqa munanmanchu. Wawakunaqa manan Diosmanta yachanankuchu niqkuna, ¿sut’illantachu rimashanku? Diosmanta wawankuta yachachiq tayta-mamakunamanta, ¿ima ninkun yachayniyoq runakuna?

Paykunaq nisqankuman hinaqa religionniyoq kayqa allinpunin wawakunapaq. 2008 watapi lloqsimuq qelqan willan: “Religionniyoq kayqa tayta-mamakunatan wawankuwan astawan hukllachan”, nispa.a Chay qelqan willallantaq: “Religionniyoq kay, Dioswan allinpi kaypas allinpunin wawakunapaq, familia ukhupi allinta kawsanankupaqpas”, nispa. Chay nisqankuqa allintan tupan Jesuspa kay nisqanwan: “Kusisamiyoqmi huch’uyyaykukuspa Diosta maskhaqkunaqa”, nispa (Mateo 5:3).

Tayta-mamakunaqa wawanku wiñanankutaraqmi suyananku Diosmanta yachachinankupaq, nispa nisqankumanta, ¿ima ninkin chaymanta? Chayta niqkunaqa manan reparankuchu wawakuna huch’uychankumantapacha yachachina kasqanta. Chaymi tayta-mamakunaqa wawankuta paykuna kikinku yachachinanku, mana chayqa huk runakunan munasqankuta yachachinqaku.

¿Imaynatan Diosmanta allinta yachachina?

Unaymantañan religionqa cheqninakuyllata maqanakuyllata apamun. Chhaynaqa, ¿imatan tayta-mamakuna ruwankuman Jonathan Swift nisqan, wawankupi mana hunt’akunanpaq? ¿Imaynatan yachachinkuman runamasinku munakuyta?

Diosmanta allinta yachachinapaqqa kaykunatan yachana: 1) ¿Imatan wawakunaman yachachina? 2) ¿Pin wawakunata yachachinan? 3) ¿Imaynatan allinta yachachikunman?

[Uranpi willakuy]