¿Allinchu Bibliaq nisqan?

“Chunka wataypi kashaspan waynakunawan lloqsiyta qallarirqani. Qallariypiqa makillaykumantan hap’inakuq kayku much’anakuqtaq kayku, pisi tiempomantan ichaqa imaymanaykutañan llaminakuyta qallarirqayku. 15 watallayoqraqmi llank’ayta qallarirqani qharikunataq ñoqawan puñunankupaq niwaqkuña. Imaymana mana allin ruwanakunatan ruwayta munaq kani, wiñaymasiykuna hina chhaynapi allinta paykunawan qhawarichikunaypaq. Chaymi imaymana clase warmi-qhari puñuyta ruwarqani.” (PAOLA, AUSTRALIA)a

PAOLAQA Dios sonqo familia ukhupin uywasqa karqan. Tayta-mamanña yachachirqan Diospa kamachikuyninkunata chaypas, manan chayman hinachu ruwarqan aswanpas munasqanman hinallan kawsarqan.

Yaqapaschá askha runakuna Paola hina yuyaykunku hinaspa warmi-qhari puñuymanta Bibliaq nisqanta mana kay tiempopaq hinachu qhawarinku. Hukkunataq ninku: “Dios sonqo runa kaytaqa atikunmanmi, warmi-qhari puñuypitaq sapankaña qhawarinan”, nispa.

Ichaqa, ¿allinchu kanman warmi-qhari puñuymanta Bibliaq nisqanman hina kawsay? Biblian kutichin: “Diospa Simin Qelqakunaqa llapallanmi Diospa yuyaychasqan”, nispa (2 Timoteo 3:16). Chhaynaqa, sichus pipas Diospi creen Bibliatataq Diospa Siminta hina qhawarin chayqa, allinmi kanman warmi-qhari puñuymanta imachus nisqanta yachaynin.

Askha runakunan ichaqa mana yachankuchu warmi-qhari puñuymanta Bibliaq nisqanta. Religionpi umalliqkunapas Bibliaq nisqanta respetasqankuta hinan qhawarichikunku, ichaqa chaykunamanta rimaspaqa manan chayman hinachu yuyaykunku. Chaymi mana huk nisqallachu kawsanku.

Chhaynaqa, hukkunaq imapas nisqankuta kasushanamantaqa allinmi kanman ñoqanchis kikinchispuni Bibliapi chaykunata t’aqwiy. Qatimuqpi yachasun Bibliaq nisqanman hina chunka tapuykunaq kutichiyninta. Tukuypitaq yachasun imaraykus ancha allinpuni Bibliaq nisqanta kasukuy.

[Uranpi willakuy]